ભારતીય નેવીની તાકાતમાં થશે વધારો, આજે 7મું યુદ્ધજહાજ ‘INS મહેન્દ્રગીરી’ કરાશે લોન્ચ , જાણો શું છે ખાસ

• આજે ‘મહેન્દ્રગીરી’નું લોન્ચિંગ કરવામાં આવશે
• મહેન્દ્રગિરી એક તકનીકી રીતે અદ્યતન યુદ્ધ જહાજ
• અંદાજે 149 મીટર લાંબુ અને 17 મીટર પહોળું છે

સમુદ્રમાં ભારતની તાકાત વધુ વધવા જઈ રહી છે. ભારતીય નૌકાદળના કાફલામાં યુદ્ધ જહાજ મહેન્દ્રગીરીનો સમાવેશ કરવાની તૈયારીઓ પૂર્ણ કરી લેવામાં આવી છે. દેશના ઉપરાષ્ટ્રપતિ જગદીપ ધનખરની હાજરીમાં 1 સપ્ટેમ્બર 2023ના રોજ એટલે કે, આજે આ મહેન્દ્રગીરીનું લોન્ચિંગ કરવામાં આવશે. પ્રોજેક્ટ 17A હેઠળ બનાવવામાં આવેલ આ યુદ્ધ જહાજને મુંબઈમાં મઝાગોન ડોક શિપબિલ્ડર્સ લિમિટેડમાં કાર્યરત કરવામાં આવશે.

પ્રાપ્ત વિગતો અનુસાર,‘મહેન્દ્રગીરી’ જહાજનું નામ ઓડિશામાં સ્થિત પૂર્વી ઘાટમાં એક પર્વત શિખર પરથી રાખવામાં આવ્યું છે. પ્રોજેક્ટ 17A ફ્રિગેટનું આ 7મું યુદ્ધ જહાજ છે. આ પ્રોજેક્ટ 17 ક્લાસ ફ્રિગેટ્સ પછીના છે જેમાં વધુ સારી સ્ટીલ્થ ફીચર્સ, અદ્યતન શસ્ત્રો અને સેન્સર છે. સાથે જ નૌકાદળે જણાવ્યું હતું કે ‘મહેન્દ્રગીરી’ એક તકનીકી રીતે અદ્યતન યુદ્ધ જહાજ છે અને સ્વદેશી સંરક્ષણ ક્ષમતાઓના ભવિષ્ય તરફ આગળ વધતાની સાથે તેના સમૃદ્ધ નૌકા વારસાને અપનાવવાના ભારતના સંકલ્પનું પ્રતીક છે.

મહેન્દ્રગીરી અંદાજે 149 મીટર લાંબુ અને 17 મીટર પહોળું
મહેન્દ્રગિરીને ભારતીય નૌકાદળના બ્યુરો ઓફ નેવલ ડિઝાઇન દ્વારા ડિઝાઇન કરવામાં આવી છે અને તે અદ્યતન અત્યાધુનિક શસ્ત્રો, સેન્સર, સંચાર સુવિધાઓ અને અન્ય સિસ્ટમોથી સજ્જ છે. મહેન્દ્રગિરીની કીલ જૂન 2022 માં નાખવામાં આવી હતી અને અગાઉના સંસ્કરણોની જેમ તે સંકલિત બાંધકામ પદ્ધતિ સાથે બનાવવામાં આવ્યું છે. P-17A શ્રેણીની કુલ કિંમત રૂ. 27,500 કરોડ છે અને MDL મુંબઈ આ વર્ગના 7માંથી 4 જહાજોનું નિર્માણ કરી રહ્યું છે. મહેન્દ્રગિરી અંદાજે 149 મીટર લાંબુ અને 17 મીટર પહોળું બનાવવામાં આવ્યું છે. તેનું વિસ્થાપન લગભગ 6,600 ટન હશે અને તેની ઝડપ 30 નોટ પ્રતિ કલાક હશે.

મહેન્દ્રગીરીના શસ્ત્રો દુશ્મનો પર પડશે ભારે
જહાજ મહેન્દ્રગીરીમાં 2 RBU-6000 એન્ટી સબમરીન રોકેટ લોન્ચર ફીટ કરવામાં આવ્યા છે. એટલે કે એક સાથે 72 રોકેટ છોડી શકાય છે. આ સિવાય તેમાં 76 mm ઓટો મેલારા નેવલ ગન લગાવવામાં આવી છે. સાથે જ 2 AK-630M CIWS બંદૂકો છે, જે દુશ્મનના જહાજો, હેલિકોપ્ટર, બોટ અથવા મિસાઇલોને નષ્ટ કરવામાં સક્ષમ છે. આ યુદ્ધ જહાજમાં બે ધ્રુવ હેલિકોપ્ટર અથવા બે સી કિંગ MK હેલિકોપ્ટર તૈનાત કરી શકાય છે.

સમુદ્રમાં ભારતની તાકાતમાં વધારો થશે
P-17 આલ્ફા ક્લાસનું પ્રથમ જહાજ સપ્ટેમ્બર 2019માં ‘નીલગીરી’માં લોન્ચ કરવામાં આવ્યું હતું અને તેના સમુદ્રી પરીક્ષણો 2024ના મધ્યમાં શરૂ થવાની ધારણા છે. આ જ વર્ગનું બીજું જહાજ ‘ઉદયગિરી’ મે 2022માં લોન્ચ કરવામાં આવ્યું હતું જેનું સમુદ્રી પરીક્ષણ 2024ના ઉત્તરાર્ધમાં યોજાવાનું છે. ત્રીજું જહાજ ‘તારાગિરી’ સપ્ટેમ્બર 2020 માં લોન્ચ કરવામાં આવ્યું હતું અને તેની ડિલિવરી ઓગસ્ટ 2025 સુધીમાં અપેક્ષિત છે.

પાણીની નીચે ત્રણ પરિમાણોમાં જોખમોને બેઅસર કરવામાં સક્ષમ
આ જહાજનું હલ બનાવવા માટે વપરાતું સ્ટીલ સ્વદેશી રીતે વિકસિત DMR 249A છે, જે SAIL દ્વારા ઉત્પાદિત લો-કાર્બન માઇક્રો-એલોય ગ્રેડનું સ્ટીલ છે. P-17 આલ્ફા જહાજો ભારતીય નૌકાદળ દ્વારા સંચાલિત કોઈપણ અન્ય યુદ્ધ જહાજ કરતાં વધુ અદ્યતન, શક્તિશાળી શસ્ત્રો અને સેન્સરથી સજ્જ છે. જે હવામાં, સમુદ્રની સપાટી પર અને પાણીની નીચે ત્રણ પરિમાણોમાં જોખમોને બેઅસર કરવામાં સક્ષમ છે. સ્વદેશી રીતે તૈયાર કરાયેલા મહેન્દ્રગીરીમાં અત્યાધુનિક શસ્ત્રો, સેન્સર, અદ્યતન એક્શન ઇન્ફર્મેશન સિસ્ટમ, ઇન્ટિગ્રેટેડ પ્લેટફોર્મ મેનેજમેન્ટ સિસ્ટમ, વર્લ્ડ ક્લાસ મોડ્યુલર એકોમોડેશન, અત્યાધુનિક પાવર ડિસ્ટ્રિબ્યુશન સિસ્ટમ અને અન્ય આધુનિક સુવિધાઓ હશે.

આ પણ વાંચો : ISROએ ગતિરોધક પેરાશૂટ તૈનાતીનું સફળ પરીક્ષણ કર્યું, જૂઓ ઈસરોએ શેર કરેલો શાનદાર નજારો