અબુ ધાબીમાં બની રહ્યું છે પહેલું હિન્દુ મંદિર, PM મોદી ઉદઘાટનમાં હાજરી આપશે

• અબુ ધાબીમાં પહેલું હિન્દુ મંદિર તૈયાર થઈ રહ્યું છે.
• આવતા વર્ષે ફેબ્રુઆરીમાં તેનું ઉદ્ઘાટન કરવામાં આવશે
• આ કાર્યક્રમમાં પીએમ મોદી પણ ભાગ લેશે.

UAE, 10 ડિસેમ્બર: સંયુક્ત આરબ અમીરાત (UAE) માં ફેબ્રુઆરી મહિનામાં પ્રથમ હિન્દુ મંદિરનું ઉદ્ઘાટન કરવામાં આવશે. વડાપ્રધાન નરેન્દ્ર મોદી આ મંદિરના ઉદ્ઘાટન સમારોહમાં ભાગ લેવાના છે. આ મંદિર UAEની રાજધાની અબુ ધાબીમાં બનાવવામાં આવી રહ્યું છે. આ મંદિર પશ્ચિમ એશિયાનું સૌથી મોટું મંદિર છે. તેને BAPS હિન્દુ મંદિર તરીકે ઓળખવામાં આવે છે.

મંદિરના નિર્માણમાં 700 કરોડ રૂપિયાનો ખર્ચ કરવામાં આવ્યો છે. મંદિર અબુ ધાબી શહેરની બહાર 50 કિલોમીટર દૂર સ્થિત છે. અહીં મંદિરનું નિર્માણ કાર્ય પૂરજોશમાં ચાલી રહ્યું છે અને હવે તે અંતિમ તબક્કામાં પહોંચી ગયું છે. આ ભવ્ય મંદિરને તૈયાર કરવા માટે મોટી સંખ્યામાં કલાકારો, મજૂરો અને એન્જિનિયરો સાથે મળીને કામ કરી રહ્યા છે. ફેબ્રુઆરી 2024માં ભક્તો માટે ખુલતું આ મંદિર એટલું મજબૂત છે કે 1000 વર્ષ સુધી તેને કંઈ થવાનું નથી.

મંદિરનો પાયો કેવી રીતે નાખવામાં આવ્યો?

2015માં જ્યારે વડા પ્રધાન નરેન્દ્ર મોદી UAEની મુલાકાતે ગયા હતા, ત્યારે ત્યાંના રાષ્ટ્રપ્રમુખે દુબઈ-અબુ ધાબી હાઈવે પર 17 એકર જમીન ભેટમાં આપી હતી. બે વર્ષ બાદ આ જમીન પર મંદિરનો શિલાન્યાસ વડાપ્રધાન નરેન્દ્ર મોદીએ કર્યો હતો. પાયો નાખ્યો ત્યારથી મંદિરનું નિર્માણ ઝડપથી ચાલી રહ્યું છે. આ મંદિરનું ઉદ્ઘાટન એવા સમયે થશે જ્યારે રામ મંદિર પણ ભક્તો માટે ખુલ્લું મુકવામાં આવશે.

મંદિરનું નિર્માણ કોણ કરાવે છે?

ગલ્ફ કન્ટ્રીમાં બની રહેલા આ મંદિરના નિર્માણ પાછળ હિંદુ સંપ્રદાય ‘બોચાસણવાસી અક્ષર પુરુષોત્તમ સ્વામિનારાયણ સંસ્થા’ છે, જે BAPS સંસ્થા તરીકે ઓળખાય છે. BAPS એ વિશ્વભરમાં 1,100 થી વધુ હિન્દુ મંદિરોનું નિર્માણ કર્યું છે. નવી દિલ્હીમાં અક્ષરધામ મંદિર અને એશિયા બહારના સૌથી મોટા મંદિરનું તાજેતરમાં ન્યુ જર્સી, યુએસએમાં ઉદ્ઘાટન કરવામાં આવ્યું છે.

શું છે મંદિરની વિશેષતા?

BAPS હિન્દુ મંદિર એ વાસ્તુશિલ્પ કૌશલ્યનો જીવંત પુરાવો છે. મંદિરના નિર્માણમાં વૈદિક વાસ્તુકલા અને શિલ્પોથી પ્રેરિત ગુલાબી સેનડસ્ટોન અને આરસનો ઉપયોગ કરવામાં આવ્યો છે. મંદિરમાં ઘણી જટિલ કોતરણી અને શિલ્પો ભારતમાં કારીગરો દ્વારા બનાવવામાં આવ્યા હતા અને સ્થળ પર પહોંચાડવામાં આવ્યા હતા. મંદિરની ઉંચાઈ 108 ફૂટ છે, જેમાં 40 હજાર ક્યુબિક મીટર આરસ અને 180 હજાર ક્યુબિક મીટર સેન્ડસ્ટોનનો ઉપયોગ કરવામાં આવ્યો છે.

ભારતના વિદેશ મંત્રી એસ જયશંકર, અભિનેતા સંજય દત્ત અને અક્ષય કુમાર સહિત 50,000 થી વધુ લોકોએ મંદિરના નિર્માણમાં ફાળો આપ્યો છે. સાત શિખરોને મંદિરની ડિઝાઇનમાં એકીકૃત કરવામાં આવશે, જેમાંથી દરેક સંયુક્ત આરબ અમીરાતનું પ્રતીક દર્શાવશે. મંદિર પરિસરમાં બાળકો માટે વર્ગો, પ્રદર્શન કેન્દ્રો અને રમતનું મેદાન પણ હશે.

તેનું ઉદ્ઘાટન ક્યારે થશે?

મંદિરનું ઉદ્ઘાટન ફેબ્રુઆરીમાં કરવામાં આવશે, જેમાં અગ્રણી હસ્તીઓ હાજરી આપશે. વડાપ્રધાન મોદી ઉપરાંત અબુ ધાબીના શેખ અને UAEના અગ્રણી નેતાઓ તેમાં સામેલ થઈ શકે છે. 10મી ફેબ્રુઆરીથી ‘હાર્મની ફેસ્ટિવલ’ શરૂ થશે, જેમાં ભારતીય સમુદાયના લોકો ભાગ લેશે. આ પછી 15 ફેબ્રુઆરી 2024 ના રોજ બે કલાક લાંબા સમારોહમાં મંદિરનું ઉદ્ઘાટન કરવામાં આવશે.

આ પણ વાંચો, 7.43 લાખ નકલી મનરેગા જોબ કાર્ડ કાઢવામાં આવ્યા, યુપીમાં સૌથી વધુ !