શેરબજારની તેજી: IPO દ્વારા ભંડોળ એકઠું કરવામાં ભારત દુનિયામાં ચોથા ક્રમે!
નવી દિલ્હી, તા. 10 ઓક્ટોબર, 2025: ઘરેલું શેર બજારોમાં સતત ઉતાર-ચઢાવ જોવા મળવા છતાં, ભારત IPO દ્વારા નાણાં એકઠા કરવાના મામલે વિશ્વમાં ચોથા સ્થાને રહ્યું છે. બર્નસ્ટીનના એક વિશ્લેષણ મુજબ,વર્ષ 2025 દરમિયાન ભારતીય કંપનીઓએ IPO દ્વારા કુલ 14.2 અબજ ડોલર (લગભગ 85,241 કરોડ રૂપિયા) ની રકમ એકઠી કરી છે.
વૈશ્વિક સ્તરે ભારતની સ્થિતિ
| ક્રમ | દેશ | IPO દ્વારા એકત્રિત ભંડોળ |
| 1 | અમેરિકા | $52.9 અબજ |
| 2 | હોંગકોંગ | $23.4 અબજ |
| 3 | ચીન | $16.2 અબજ |
| 4 | ભારત | $14.2 અબજ |
2025માં 74 ભારતીય કંપનીઓએ IPO દ્વારા ₹85,241.08 કરોડ એકઠા કર્યા છે. છેલ્લા પાંચ વર્ષમાં પ્રાઇમરી માર્કેટમાંથી એકઠી થયેલી આ ત્રીજી સૌથી મોટી રકમ છે. આમાં બીવર્ક ઇન્ડિયા, ટાટા કેપિટલ અને એલજી ઇલેક્ટ્રોનિક્સ ઇન્ડિયા જેવી કંપનીઓના મોટા IPOનો સમાવેશ થતો નથી. અગાઉ 2024માં 91 IPO દ્વારા ₹1,59,783.76 કરોડ અને 2021માં 63 IPO દ્વારા ₹1,18,723.17 કરોડ એકઠા કરવામાં આવ્યા હતા.
જાન્યુઆરી, 2024 થી અત્યાર સુધીમાં એટલે કે છેલ્લા 21 મહિનામાં ભારતમાં 161 કંપનીઓના IPO લિસ્ટેડ થયા છે. આ શેરોએ રોકાણકારોને સરેરાશ 22 ટકાનું વળતર આપ્યું છે. આ વળતર લાર્જ કેપ ઇન્ડેક્સની તુલનામાં સારું પ્રદર્શન છે. આ શેરોએ છેલ્લી સાત ત્રિમાસિકમાંથી પાંચમાં નિફ્ટીના વળતરને પાછળ છોડી દીધું છે. 161માંથી 61 ટકા શેરોએ છ મહિનાના ગાળામાં નિફ્ટી સૂચકાંક કરતાં રોકાણકારોને વધુ સારું વળતર આપ્યું છે.
વિશ્લેષણ મુજબ, નાના કદના IPO લિસ્ટિંગ પર રોકાણકારોને વધુ સારો નફો આપે છે. $2 કરોડથી ઓછા કદના IPOએ લગભગ 40 ટકાનું વળતર આપ્યું છે. $2 થી $4 કરોડના IPOએ 31 ટકાનો નફો આપ્યો છે. તેનાથી વિપરીત, $1 અબજથી વધુ કદના IPO સૌથી ઓછા સફળ રહ્યા છે, જેમણે સરેરાશ માત્ર 9 ટકાનું વળતર આપ્યું છે.
