‘વિદેશી ધરતી પર દેશથી ઉપર કંઈ નહીં…’ રાહુલ ગાંધીના નિવેદન પર સપા સાંસદનો જવાબ

નવી દિલ્હી: 23 ડિસેમ્બર, 2025: કોંગ્રેસ નેતા રાહુલ ગાંધીએ જર્મનીની રાજધાની બર્લિનમાં ભાજપ સરકાર પર ભારતીય લોકશાહીને નબળી પાડવાનો અને તપાસ એજન્સીઓનો દુરૂપયોગ કરવાનો આરોપ લગાવ્યો છે. ભાજપે આ નિવેદનને ‘દેશ વિરોધી’ ગણાવ્યું છે. આ દરમિયાન, કોંગ્રેસની સહયોગી પાર્ટી સમાજવાદી પાર્ટી (SP) એ આ મામલે સંતુલિત વલણ અપનાવ્યું છે.

વિદેશમાં સંયમ રાખવો જોઈએઃ રાજીવ રાય

સપાના પ્રવક્તા અને ઘોષી બેઠકના સાંસદ રાજીવ રાયે પક્ષ કે વિપક્ષ બંનેને મર્યાદા જાળવવાની સલાહ આપી છે. રાજીવ રાયે કહ્યું કે, જ્યારે તેઓ વિદેશ જાય છે અને ભારતની આંતરિક બાબતો પર સવાલ પૂછવામાં આવે છે, ત્યારે તેઓ સ્પષ્ટ કહે છે કે આ અમારો અંગત મામલો છે અને અમે તેના પર વિદેશમાં વાત નહીં કરીએ.

વડાપ્રધાન મોદીનો ઉલ્લેખ

તેમણે યાદ અપાવ્યું કે, વડાપ્રધાન મોદીએ તેમની સિઓલ યાત્રા દરમિયાન કહ્યું હતું કે, પહેલા ભારતીય કહેવડાવવામાં શરમ આવતી હતી. આ રીતે ભારતને નાનું બતાવવું પણ ખોટું છે. પરંતુ, વિદેશી ધરતી પર જઈને રાજકીય વાતો કરવાની પરંપરા ભાજપે શરૂ કરી છે, તેથી તેમને હવે વાંધો ઉઠાવવાનો કોઈ નૈતિક અધિકાર નથી.

“રાષ્ટ્ર સર્વોપરી છે”

રાજીવ રાયે ભારપૂર્વક જણાવ્યું કે 140 કરોડ ભારતીયો એક છે એવો સંદેશ વિદેશમાં જવો જોઈએ કે, જો તમે વિદેશમાં જઈને દેશ વિશે સકારાત્મક બોલી શકતા નથી, તો નકારાત્મક પણ ન બોલવું જોઈએ. આ નિયમ વડાપ્રધાન અને વિપક્ષના નેતા બંનેને લાગુ પડે છે.

બ્રેઇન વોશનો આરોપ

તેમણે આક્ષેપ કર્યો કે, વિદેશોમાં આરએસએસ અને અન્ય સંગઠનો દ્વારા એવું ‘બ્રેઇન વોશ’ કરવામાં આવે છે કે વિપક્ષી નેતાઓ પાકિસ્તાન કે દુશ્મનોના ઈશારે કામ કરે છે, જે અત્યંત ખોટું છે. જ્યારે પણ દેશ પર સંકટ આવ્યું છે, ત્યારે આખો દેશ એકજૂથ રહ્યો છે. રાજકારણ પછીની વાત છે, પહેલા રાષ્ટ્રહિત છે.

પ્રિયંકા ગાંધીને PM ફેસ બનાવવાની માંગ?

જ્યારે તેમને પૂછવામાં આવ્યું કે કોંગ્રેસમાં પ્રિયંકા ગાંધીને પીએમ પદના ઉમેદવાર બનાવવાની માંગ ઉઠી રહી છે, ત્યારે તેમણે કહ્યું કે નેતૃત્વનો નિર્ણય લેવો એ કોઈપણ પક્ષનો આંતરિક મામલો છે અને સપા તેમાં દખલ નહીં કરે.