IPL મેચના પહેલા દિવસે સ્ટેડિયમ પહોંચશે આટલા દર્શકો, મફતમાં મળશે આ સુવિધા !
ઇન્ડિયન પ્રીમિયર લીગ (IPL) 2023, 31 માર્ચે શહેરના મોટેરા વિસ્તારમાં સ્થિત 1.32 લાખ દર્શકોની ક્ષમતા ધરાવતું વિશ્વનું સૌથી મોટું મેદાન, નરેન્દ્ર મોદી ક્રિકેટ સ્ટેડિયમ ખાતે શરૂ થવાની છે. ગુજરાત ટાઇટન્સ અને ચેન્નાઇ સુપર કિંગ્સ વચ્ચેની પ્રથમ મેચમાં એક લાખથી વધુ દર્શકો હાજર રહેશે. તે જોતા અમદાવાદ શહેર પોલીસે શહેરમાં અને બહારગામથી આવતા વાહનચાલકોના પાર્કિંગ માટે 20 પાર્કિંગ પ્લોટ બનાવ્યા છે. વાહન ક્યાં પાર્ક કરવું તે માટે ઓનલાઈન પાર્કિંગ પ્લોટ બુક કરાવવાનો રહેશે. આ માટે ચાર્જ પણ લાગશે. વિસત અને તપોવન સર્કલ પાસે આવેલા પાર્કિંગ પ્લોટથી સ્ટેડિયમની નજીક સુધી 79 શટલ વાહનો દ્વારા ડ્રાઈવરોને વિનામૂલ્યે લઈ જવામાં આવશે. મેચ દરમિયાન ટ્રાફિક અને સુરક્ષા વ્યવસ્થા માટે 3100 પોલીસકર્મીઓ તૈનાત રહેશે.
આ પણ વાંચો : AAP Gujarat : દિલ્હી બાદ અમદાવાદમાં પણ લાગ્યા ‘મોદી હટાવો, દેશ બચાઓ’ ના બેનર !
અમદાવાદ શહેરના ડેપ્યુટી ટ્રાફિક કમિશનર (વેસ્ટ) નીતા દેસાઈએ જણાવ્યું હતું કે 31 માર્ચે મેચ સાંજે 7.30 વાગ્યે શરૂ થશે, જેના કારણે સ્ટેડિયમમાં એન્ટ્રી બપોરે 3 વાગ્યાથી શરૂ થશે. મેચ જોવા આવનારાઓ માટે સરળતા રહે તે માટે મેટ્રો ટ્રેનની સુવિધા મેચના દિવસોમાં દરેક સ્ટેશનેથી 8 થી 10 મિનિટના અંતરે ઉપલબ્ધ થશે. મેટ્રો સેવા સવારે 1.30 થી 2.30 સુધી શરૂ રહેશે. 29 વધારાની BRTS બસ મોટેરા સુધી દોડશે. વધારાની AMTS બસો પણ દોડાવવામાં આવશે. 20 પાર્કિંગ પ્લોટ બનાવવામાં આવ્યા છે, જેમાં ચાર ટુ વ્હીલર માટે, 15 ફોર વ્હીલર માટે અને એક વીવીઆઈપી પ્લોટ છે. જો શક્ય હોય તો, મેટ્રો, BRTS, AMTS બસ દ્વારા સ્ટેડિયમ પહોંચો. મોબાઈલ, પર્સ સિવાયની તમામ વસ્તુઓ પ્રતિબંધિત છે.
અમદાવાદ પૂર્વના ટ્રાફિક પોલીસના ડેપ્યુટી કમિશનર અને ઝોન 2ના ઈન્ચાર્જ સફીન હસને જણાવ્યું હતું કે મેચના દિવસો દરમિયાન ટ્રાફિક અને સુરક્ષા વ્યવસ્થા માટે 3,100 પોલીસકર્મીઓ તૈનાત કરવામાં આવશે. જેમાં 9 DCP, 16 ACP, 36 PI, 96 PSI અને 3021 પોલીસકર્મીઓનો સમાવેશ થાય છે. સ્ટેડિયમની અંદર 800 ખાનગી સુરક્ષા કર્મચારીઓ રહેશે. દર્શકોને તેમના મોબાઈલ ફોન અને પર્સ સિવાય સ્ટેડિયમની અંદર પ્રવેશ આપવામાં આવશે નહીં. જેથી તેઓ પોતાની સાથે અન્ય વસ્તુઓ ન લાવે. જનપથથી મોટેરા સુધીનો રસ્તો બપોરે 2 વાગ્યાથી બંધ રાખવામાં આવ્યો છે. જનપથથી મોટેરા સુધીનો રસ્તો મેચના દિવસે, 31 માર્ચ અને અન્ય દિવસોમાં તમામ પ્રકારના વાહનો માટે બંધ રહેશે. તેના બદલે વાહનચાલકો વિસતથી ONGC સર્કલ થઈને તપોવન સર્કલ તરફ જઈ શકશે.
