રાહુલ ગાંધીએ પીએમ મોદીના અંબાણી-અદાણીના નિવેદનનો આપ્યો વળતો જવાબ
દિલ્હી, 8 મે: લોકસભાની ચૂંટણી વચ્ચે રાજકીય નેતાઓ એક બીજા રાજકીય પક્ષો પર નિવેદનો આપી રહ્યા છે. કોંગ્રેસ નેતા રાહુલ ગાંધીએ વડાપ્રધાન મોદીના એ નિવેદન પર પ્રતિક્રિયા આપી છે જેમાં તેમણે અંબાણી-અદાણીનું નામ લઈને પ્રહારો કર્યા હતા. રાહુલ ગાંધીએ સોશિયલ મીડિયા પ્લેટફોર્મ X પર એક વીડિયો શેર કર્યો છે. વીડિયોમાં રાહુલ ગાંધી કહી રહ્યા છે કે, “હેલો મોદીજી, તમે થોડા નર્વસ છો? સામાન્ય રીતે તમે અદાણી અને અંબાણી જી વિશે બંધ રૂમમાં જ વાત કરો છો. તમે પહેલીવાર જાહેરમાં અંબાણી, અદાણીનું નામ લીધું છે. તમે એ પણ જાણો છો કે તેઓ ટેમ્પોમાં પૈસા આપે છે. શું તે વ્યક્તિગત અનુભવ છે?”
અહીં જૂઓ રાહુલ ગાંધીએ શું કહ્યું?
भाजपा के भ्रष्टाचार के टेम्पो का ‘ड्राइवर’ और ‘खलासी’ कौन है, देश जानता है। pic.twitter.com/62N5IkhHWk
— Rahul Gandhi (@RahulGandhi) May 8, 2024
રાહુલ ગાંધીએ કહ્યું કે, ‘એક કામ કરો. CBI અને EDને તેમની પાસે મોકલો. સંપૂર્ણ માહિતી મેળવો, પરીક્ષણ કરો. તે શક્ય તેટલી વહેલી તકે આ કામ પૂર્ણ કરો. મોદીજી ગભરાશો નહીં. હું ફરીથી દેશને કહી રહ્યો છું કે આપણે ભારતના ગરીબોને એટલા જ પૈસા આપવા જઈ રહ્યા છીએ જેટલા પૈસા નરેન્દ્ર મોદીજીએ આપ્યા છે. તેઓએ 22 અબજોપતિ બનાવ્યા છે. અમે કરોડો કરોડપતિ બનાવીશું.
પીએમ મોદીએ શું કહ્યું હતું?
વડાપ્રધાન નરેન્દ્ર મોદીએ આજે તેલંગાણાના કરીમનગરમાં અદાણી અને અંબાણીનું નામ લઈને કોંગ્રેસ નેતા રાહુલ ગાંધી પર પ્રહારો કર્યા હતા. તેમણે કહ્યું હતું કે, “જ્યારથી ચૂંટણી જાહેર થઈ છે ત્યારથી તેઓએ અંબાણી અને અદાણીનું નામ લેવાનું બંધ કરી દીધું છે. આજે હું તેલંગાણાની ધરતીને પૂછવા માંગુ છું કે રાજકુમાર જાહેર કરે કે તેમણે ચૂંટણીમાં અંબાણી અને અદાણી પાસેથી કેટલી સંપત્તિ એકઠી કરી છે. કાળા નાણાની કેટલી બોરીઓ લીધી છે? શું ટેમ્પો ભરાઈને નોટો કોંગ્રેસ સુધી પહોંચી છે?
પીએમ મોદીએ વધુમાં કહ્યું કે, “શું ડીલ થઈ છે. તમે રાતોરાત અંબાણી અને અદાણીનું નામ લેવાનું બંધ કરી દીધું. ચોક્કસપણે દાળમાં કંઈક કાળું છે. અંબાણી અને અદાણીને પાંચ વર્ષ સુધી ગાળો આપી અને હવે રાતોરાત ગાળો બંધ થઈ ગઈ. મતલબ, ક્યાંકથી તો ટેમ્પો ભરીને ચોરીનો માલ તમારી પાસે આવ્યો છે. દેશને આનો જવાબ આપવો પડશે.”
આ પણ વાંચો: ‘કોઈ ટિપ્પણી ના કરે તો સારું’, BSP ચીફ માયાવતીનો અખિલેશ યાદવ પર પલટવાર
