પંજાબ પોલીસે અમૃતપાલ સિંહને ભાગેડુ જાહેર કર્યો, પરિસ્થિતિ ન વણસે માટે ઈન્ટરનેટ બંધ

પંજાબ પોલીસે ખાલિસ્તાન સમર્થક અને કટ્ટરપંથી અમૃતપાલ સિંહ વિરુદ્ધ મોટી કાર્યવાહી કરી છે. પોલીસે અમૃતપાલને ભાગેડુ જાહેર કર્યો છે. તેની બે કાર જપ્ત કરવામાં આવી છે તેમજ તેના ગનર્સને પણ પકડવામાં આવ્યા છે. તેમના હથિયારોની કાયદેસરતાની તપાસ કરવામાં આવી રહી છે. જલંધર પોલીસ કમિશનર કુલદીપ સિંહ ચહલના જણાવ્યા અનુસાર પંજાબ પોલીસના જવાનો અમૃતપાલ સિંહની ધરપકડ કરવા માટે એકઠા થઈ રહ્યા છે. અત્યાર સુધીમાં 78 લોકોની ધરપકડ કરવામાં આવી છે અને સઘન ચેકિંગ ઓપરેશન ચાલી રહ્યું છે.

રાજ્યભરમાં સર્ચ ઓપરેશન શરૂ

પંજાબ પોલીસના જણાવ્યા અનુસાર અમૃતપાલ વિરુદ્ધ રાજ્યમાં મોટાપાયે સર્ચ ઓપરેશન શરૂ કરવામાં આવ્યું છે. જ્યારે અન્ય ઘણા ખાલિસ્તાન સમર્થકોની અટકાયત કરવામાં આવી છે. અમૃતપાલ સિંહ સહિત અન્ય કેટલાક લોકો ફરાર છે અને તેમને પકડવા માટે મોટાપાયે શોધખોળ ચાલી રહી છે. વારિસ પંજાબ દે સંગઠનનો વડા અમૃતપાલ કેટલાક સાથીઓ સાથે ફરાર થઈ ગયો છે. પકડાયેલા આરોપીઓ પાસેથી એક 315 બોરની રાઈફલ, સાત 12 બોરની રાઈફલ, એક રિવોલ્વર અને વિવિધ કેલિબરના 373 કારતૂસ મળી આવ્યા હતા.

ઈન્ટરનેટ બંધ, 144 લાગુ

આ દરમિયાન સમગ્ર પંજાબ હાઈ એલર્ટ પર છે. વાતાવરણ બગડવાની આશંકાથી પંજાબમાં રવિવારે બપોર સુધી મોબાઈલ ઈન્ટરનેટ સેવાઓ બંધ કરી દેવામાં આવી છે. અમૃતસર, ફાઝિલ્કા, મોગા, ભટિંડા અને મુક્તસર સહિત અનેક જિલ્લાઓમાં કલમ 144 લાગુ કરીને ભારે સુરક્ષા તૈનાત કરવામાં આવી છે. પંજાબની હિમાચલ અને જમ્મુ-કાશ્મીર સાથેની સરહદ સીલ કરી દેવામાં આવી છે. અમૃતપાલ અજનાલા પોલીસ સ્ટેશનમાં પોલીસ પર હુમલાનો આરોપી છે.