પાકિસ્તાને સોશિયલ મીડિયા X ઉપર લગાવ્યો પ્રતિબંધ, જાણો કારણ
- પાકિસ્તાને ઈલોન મસ્કના સોશિયલ મીડિયા પ્લેટફોર્મ X પર મૂક્યો પ્રતિબંધ, પાકિસ્તાની યુઝર્સ છેલ્લા બે મહિનાથી X (Twitter) એક્સેસ કરી શક્યા નથી
પાકિસ્તાન, 17 એપ્રિલ: ઈલોન મસ્કના સોશિયલ મીડિયા પ્લેટફોર્મ X પર પાકિસ્તાનમાં પ્રતિબંધ મૂકવામાં આવ્યો છે. આ વર્ષે પાકિસ્તાનમાં યોજાયેલી સામાન્ય ચૂંટણીઓ પછીથી વપરાશકર્તાઓ ‘X’ એક્સેસ કરી શક્યા નથી. પાકિસ્તાન સરકારે હવે મસ્કના સોશિયલ મીડિયા પ્લેટફોર્મ પર કામચલાઉ પ્રતિબંધ લગાવી દીધો છે. પાકિસ્તાન સરકારે રાષ્ટ્રીય સુરક્ષાને ટાંકીને એક્સ પર આ પ્રતિબંધ લગાવ્યો છે.
રોઇટર્સના અહેવાલ મુજબ, X (ટ્વિટર) ફેબ્રુઆરી 2024 થી પાકિસ્તાનમાં કામ કરી રહ્યું નથી. સરકાર દ્વારા લાદવામાં આવેલ આ પ્રતિબંધ સોશિયલ મીડિયા પ્લેટફોર્મના લાંબા સમય સુધી સસ્પેન્શનની પુષ્ટિ કરે છે. ઘણા વપરાશકર્તાઓએ VPN (વર્ચ્યુઅલ પ્રાઇવેટ નેટવર્ક) દ્વારા X પર પ્રતિબંધની પુષ્ટિ પણ કરી છે.
આ વર્ષે ફેબ્રુઆરીમાં ઘણા પાકિસ્તાની યુઝર્સે અન્ય સોશિયલ મીડિયા પ્લેટફોર્મ પર X નો ઉપયોગ ન કરી શકવાની સમસ્યા શેર કરી હતી. રિપોર્ટ અનુસાર, પાકિસ્તાન સરકારમાં આંતરિક બાબતોના મંત્રીએ કોર્ટમાં એફિડેવિટ દાખલ કરીને X પર પ્રતિબંધની પુષ્ટિ કરી છે. જોકે X પર પ્રતિબંધ મૂકવાની સરકાર દ્વારા કોઈ સત્તાવાર જાહેરાત કરવામાં આવી નથી.
X (Twitter) has been blocked in Pakistan for exactly two months today.
— Benazir Shah (@Benazir_Shah) April 17, 2024
સુરક્ષાના કારણે પાકિસ્તાને X પર મુક્યો પ્રતિબંધ
પાકિસ્તાનની કોર્ટમાં દાખલ કરાયેલી એફિડેવિટમાં સરકારે કહ્યું, ‘અહીં એ ઉલ્લેખ કરવો ખૂબ જ સુસંગત છે કે પાકિસ્તાન સરકારની કાયદેસર સૂચનાઓનું પાલન કરવામાં અને તેના પ્લેટફોર્મના દુરુપયોગ અંગેની ચિંતાઓને દૂર કરવામાં X (ટ્વિટર) ની નિષ્ફળતાને કારણે પ્રતિબંધ જરૂરી બન્યો હતો.’ X દ્વારા હજી સુધી આ મામલે કોઈ નિવેદન આપવામાં આવ્યું નથી.
ફેબ્રુઆરીથી યુઝર્સ ચિંતિત
પાકિસ્તાનમાં 8 ફેબ્રુઆરીએ યોજાયેલી સામાન્ય ચૂંટણી દરમિયાન ત્યાંની સરકારે ઘણા સોશિયલ મીડિયા પ્લેટફોર્મને બ્લોક કરી દીધા હતા. મતદાનના દિવસે સમગ્ર પાકિસ્તાનમાં ઈન્ટરનેટ સેવાઓ પણ બંધ કરવામાં આવી હતી. જો કે ચૂંટણી પછી ઘણા સોશિયલ મીડિયા પ્લેટફોર્મ્સ પહેલાની જેમ ચાલુ કરી દેવામાં આવ્યા હતા. પરંતુ X વપરાશકર્તાઓ તેને ઍક્સેસ કરવામાં સક્ષમ ન હતા. પાકિસ્તાનની સિંધ હાઈકોર્ટે પણ ત્યાંની ટેલિકોમ ઓથોરિટીને સોશિયલ મીડિયા પ્લેટફોર્મ Xની સેવા પુનઃસ્થાપિત કરવાનો આદેશ આપ્યો હતો, પરંતુ સરકારે Xની સેવા ફરી શરૂ કરી નથી. હવે સરકારે Xને રાષ્ટ્રીય સુરક્ષા માટે ખતરો ગણાવીને કોર્ટમાં એફિડેવિટ દાખલ કરી છે.
આ પણ વાંચો: શું દુબઈમાં કૃત્રિમ વરસાદના કારણે સર્જાઈ તારાજી? રેતાળ જમીન પર આટલો અચાનક વરસાદ પડ્યો કેમ?
