નવી દિલ્હી, 29 એપ્રિલ : એન્ફોર્સમેન્ટ ડિરેક્ટોરેટ (ED) એ તાજેતરમાં કૌભાંડ સંબંધિત મામલામાં તેની કાર્યવાહી ઝડપી કરી છે. જેના કારણે રાજકીય પક્ષોના સમર્થકો દ્વારા ED ટીમ પર પણ હુમલો કરવામાં આવ્યો છે. હવે સતત વધી રહેલી હુમલા સહિતની પ્રવૃત્તિ અને EDની ધમકીને ધ્યાનમાં રાખીને CISF ને નિયમિત ટીમ સાથે તૈનાત કરવામાં આવશે.
વધતા હુમલાના પગલે લેવાયો નિર્ણય
ગૃહ મંત્રાલય સાથે સંકળાયેલા સૂત્રોએ જણાવ્યું હતું કે EDની સતત વધી રહેલી ગતિવિધિ અને ટીમ માટેના ખતરાને ધ્યાનમાં રાખીને CISFને દેશભરમાં EDની ઓફિસોમાં નિયમિત રીતે તૈનાત કરવામાં આવશે. કહેવામાં આવી રહ્યું છે કે છેલ્લા કેટલાક દિવસોમાં ED ઓફિસ અને તેના અધિકારીઓ પર વધી રહેલા ખતરાને જોતા અને IBના ધમકીના રિપોર્ટના આધારે ગૃહ મંત્રાલયે આ નિર્ણય લીધો છે.
પ્રથમ પોસ્ટિંગ આ ED ઓફિસોમાં કરવામાં આવશે
માહિતી અનુસાર, શરૂઆતમાં CISF દળોને કોલકાતા, રાંચી, રાયપુર, મુંબઈ, જલંધર, જયપુર, કોચી તેમજ અન્ય સ્થળોએ સ્થિત ED ઓફિસમાં તૈનાત કરવામાં આવશે. ઉલ્લેખનીય છે કે, જાન્યુઆરીમાં પશ્ચિમ બંગાળના સંદેશખાલીમાં એક ટોળાએ ઈડીની ટીમ પર હુમલો કર્યો હતો. આ હુમલામાં એન્ફોર્સમેન્ટ ડિરેક્ટોરેટના ઘણા સભ્યો ઘાયલ થયા હતા. આ ઘટના ઉત્તર 24 પરગણા જિલ્લામાંથી નોંધાઈ હતી, જ્યાં અધિકારીઓ, અર્ધલશ્કરી દળો સાથે, કથિત અનાજ વિતરણ કૌભાંડના સંબંધમાં સ્થળોએ દરોડા પાડવા ગયા હતા. ટીમ જ્યારે તૃણમૂલ કોંગ્રેસ (TMC)ના નેતા શાહજહાં શેખના ઘર નજીક પહોંચી ત્યારે હુમલો કરવામાં આવ્યો હતો.
