મણિપુરમાં ઈન્ટરનેટ પ્રતિબંધ ફરી લંબાયો, હિંસામાં અત્યાર સુધીમાં 120ના મોત
HD ન્યુઝ ડેસ્કઃ હવે મણિપુરમાં ઇન્ટરનેટ સેવાઓ પરનો પ્રતિબંધ 10મી જુલાઈના રોજ બપોરે 3 વાગ્યા સુધી લંબાવવામાં આવ્યો છે. મણિપુર સરકારે બુધવારે જણાવ્યું હતું કે તેણે શાંતિ અને જાહેર વ્યવસ્થામાં કોઈ ખલેલ ન પહોંચે તે માટે રાજ્યમાં ઈન્ટરનેટ સેવાઓના સસ્પેન્શનને પાંચ દિવસ સુધી લંબાવ્યું છે.
ઈન્ટરનેટ પર પ્રતિબંધનું આ છે કારણઃ ગૃહ કમિશનર ટી. રણજિત સિંહ દ્વારા જારી કરાયેલા નિવેદનમાં કહેવામાં આવ્યું છે કે, “એવી આશંકા છે કે કેટલાક અસામાજિક તત્વો સોશિયલ મીડિયાનો વ્યાપકપણે ઉપયોગ કરીને તસવીરો, દ્વેષપૂર્ણ ભાષણો અને જાહેર લાગણીઓને ઉશ્કેરતા વિડિયો સંદેશાઓનું પ્રસારણ કરી શકે છે.” મણિપુરમાં મેઇતેઈ અને કુકી સમુદાયો વચ્ચેની અથડામણમાં લગભગ 120 લોકોએ જીવ ગુમાવ્યા છે અને 3,000 થી વધુ લોકો ઘાયલ થયા છે. 3 મેના રોજ પ્રથમ વખત હિંસા ફાટી નીકળી હતી જ્યારે મેઇટી સમુદાયની અનુસૂચિત જનજાતિના દરજ્જાની માંગના વિરોધમાં રાજ્યના પહાડી જિલ્લાઓમાં ‘આદિવાસી એકતા કૂચ’નું આયોજન કરવામાં આવ્યું હતું.
સર્વપક્ષીય બેઠક બોલાવવી જોઈએઃ મણિપુરની વસ્તીમાં મીતેઈ સમુદાયના લગભગ 53 ટકા લોકો છે અને તેઓ મોટાભાગે ઈમ્ફાલ ખીણમાં રહે છે. આદિવાસી નાગાઓ અને કુકીઓની વસ્તી 40 ટકા છે અને તેઓ પહાડી જિલ્લાઓમાં રહે છે. કોંગ્રેસે બુધવારે કહ્યું કે તે સંસદના આગામી ચોમાસુ સત્રમાં મણિપુર હિંસા મામલે સરકાર પાસેથી સ્પષ્ટ જવાબ અને જવાબદારીની માંગ કરશે. મુખ્ય વિરોધ પક્ષે એમ પણ કહ્યું કે વડાપ્રધાન નરેન્દ્ર મોદીએ મણિપુરની મુલાકાત લેવી જોઈએ અને તેમના નેતૃત્વમાં સર્વપક્ષીય બેઠક બોલાવવી જોઈએ.
આ પણ વાંચોઃ ઈમરાન ખાન જામીન મળ્યા બાદ ઘરે પહોંચ્યા, પાકિસ્તાનમાં ઈન્ટરનેટ સેવા પુનઃસ્થાપિત
