સાવધાન! કોઈની લોનમાં ગેરંટર બનતા પહેલા જાણી લો આ નિયમો, લોન લેનાર પૈસા નહીં ભરે તો તમારે ભોગવવું પડશે

નવી દિલ્હી: 10 માર્ચ. 2026: Loan Guarantor Rules: સામાન્ય રીતે જ્યારે કોઈ વ્યક્તિ બેન્કમાંથી મોટી રકમની લોન લે છે, ત્યારે બેન્ક સુરક્ષાના ભાગરૂપે ‘ગેરંટર’ (જામીનદાર) ની માંગણી કરે છે. ઘણા લોકો મિત્રતા કે સંબંધો નિભાવવા માટે લોન ફાઇલમાં ગેરંટર તરીકે સહી કરી દે છે, પરંતુ જો લોન લેનાર વ્યક્તિ હપ્તા ભરવામાં નિષ્ફળ જાય તો ગેરંટરની હાલત કફોડી થઈ શકે છે.

કોણ હોય છે લોન ગેરંટર?

લોન ગેરંટર એ વ્યક્તિ છે જે બેંકને લેખિતમાં ખાતરી આપે છે કે જો લોન લેનાર વ્યક્તિ (Borrower) કરજ ચૂકવવામાં નિષ્ફળ જશે, તો તેની જગ્યાએ બાકીના પૈસા ગેરંટર પોતે ચૂકવશે. જ્યારે બેંકને લોન લેનારની પ્રોફાઇલ પર સંપૂર્ણ વિશ્વાસ ન હોય ત્યારે તે ગેરંટરની માંગણી કરે છે.

શું ગેરંટરે પૈસા ચૂકવવા પડશે?

કાયદાકીય નિષ્ણાતોના મતે જો મુખ્ય લોન લેનાર વ્યક્તિ EMI નથી ભરતો, તો બેંક ગેરંટર પાસેથી પૈસા વસૂલવાનો કાયદેસરનો અધિકાર ધરાવે છે.

ઇન્ડિયન કોન્ટ્રાક્ટ એક્ટ: આ કાયદા મુજબ, ગેરંટરની જવાબદારી મુખ્ય લોન લેનાર જેટલી જ સમાન હોય છે.

સુપ્રીમ કોર્ટનો ચુકાદો: એક કેસમાં સુપ્રીમ કોર્ટે પણ સ્પષ્ટ કર્યું હતું કે બેંક સીધી ગેરંટર પાસેથી વસૂલાત કરી શકે છે. જો લોન લેનાર વ્યક્તિ ગાયબ થઈ જાય અથવા નાદાર જાહેર થાય, તો સંપૂર્ણ બોજ ગેરંટર પર આવે છે.

ક્રેડિટ સ્કોર પર ખરાબ અસર

ગેરંટર બનવાનું સૌથી મોટું નુકસાન એ છે કે જો મુખ્ય લેણદાર લોન ડિફોલ્ટ કરે છે, તો તેની સીધી અસર તમારા (ગેરંટરના) CIBIL સ્કોર પર પડે છે. આનાથી ભવિષ્યમાં જ્યારે તમારે હોમ લોન કે પર્સનલ લોન લેવી હશે, ત્યારે બેંક તમારી અરજી ફગાવી શકે છે.

કોઈના ગેરંટર બનતા પહેલા તે વ્યક્તિની આર્થિક ક્ષમતા અને તમારા પર આવી શકતી જવાબદારીઓનો ગંભીરતાથી વિચાર કરવો જોઈએ.