અંતરિક્ષ વિજ્ઞાની શુભાંશુ શુક્લા વતન પરત ફર્યા, દિલ્હી એરપોર્ટ પર થયું ભવ્ય સ્વાગત

નવી દિલ્હી, 17 ઓગસ્ટ 2025:   ભારતના બીજા અંતરિક્ષ વિજ્ઞાની અને આંતરરાષ્ટ્રીય અંતરિક્ષ સ્ટેશન (ISS) પર જનાર પ્રથમ ભારતીય, ગ્રૂપ કેપ્ટન શુભાંશુ શુક્લા પોતાના વતન પરત ફર્યા છે. 15 જુલાઈએ કેલિફોર્નિયાના દરિયાકાંઠે સ્પ્લેશડાઉન બાદ તેઓ રવિવારે વહેલી સવારે દિલ્હી પહોંચ્યા. એરપોર્ટ પર તેમનું સ્વાગત તેમના પરિવાર, વિજ્ઞાન અને ટેક્નોલોજી મંત્રી જિતેન્દ્ર સિંહ, દિલ્હીના મુખ્યમંત્રી રેખા ગુપ્તા અને મોટી સંખ્યામાં અન્ય લોકોએ કર્યું. તેમના સ્વાગતમાં એરપોર્ટ પર ઢોલ-નગારા વાગતા જોવા મળ્યા અને લોકોએ તિરંગો લહેરાવ્યો. અહીં હાજર લોકોએ ‘ભારત માતા કી જય’ના નારા પણ લગાવ્યા.

શુભાંશુ શુક્લાની અંતરિક્ષ યાત્રા અને મિશન

ગ્રૂપ કેપ્ટન શુભાંશુ શુક્લા એક્સિયમ-4 (Axiom-4) મિશનના પાયલટ હતા. આ મિશન 25 જૂને અમેરિકાના ફ્લોરિડા સ્થિત કેનેડી સ્પેસ સેન્ટરથી લોન્ચ થયું હતું અને 26 જૂને ISS સાથે જોડાયું હતું. શુક્લા ગયા એક વર્ષથી અમેરિકામાં નાસા, એક્સિયમ અને સ્પેસએક્સની સુવિધાઓ પર તાલીમ લઈ રહ્યા હતા.

A moment of pride for India! A moment of glory for #ISRO! A moment of gratitude to the dispensation that facilitated this under the leadership of PM @narendramodi.

India’s Space glory touches the Indian soil… as the iconic son of Mother India, #Gaganyatri Shubhanshu Shukla… pic.twitter.com/0QJsYHpTuS

— Dr Jitendra Singh (@DrJitendraSingh) August 16, 2025

ભારતના અંતરિક્ષ સપનાઓને પાંખો

શુક્લાનો અનુભવ ભારતના મહત્વાકાંક્ષી માનવ અંતરિક્ષ કાર્યક્રમ ગગનયાન (2027)માં મહત્વની ભૂમિકા ભજવશે. આ ઉપરાંત, ભારતે 2035 સુધીમાં ભારતીય અંતરિક્ષ સ્ટેશન (Bharatiya Antariksh Station) અને 2040 સુધીમાં માનવયુક્ત ચંદ્ર મિશનનું લક્ષ્ય રાખ્યું છે.

પીએમ મોદી સાથે મુલાકાત

વડાપ્રધાન નરેન્દ્ર મોદીએ સ્વતંત્રતા દિવસના ભાષણમાં શુક્લાનો ઉલ્લેખ કર્યો હતો. હવે શુક્લા પીએમ સાથે મુલાકાત કરશે અને 23 ઓગસ્ટે રાષ્ટ્રીય અંતરિક્ષ દિવસના કાર્યક્રમમાં ભાગ લેશે. પીએમે તેમને તેમના અનુભવો અને શીખને દસ્તાવેજમાં નોંધવાની વિનંતી કરી છે જેથી ભવિષ્યના મિશનમાં મદદ મળી શકે.

સંસદમાં ચર્ચા

સૂત્રોના જણાવ્યા અનુસાર, સોમવારે લોકસભામાં પણ શુક્લાના મિશન પર વિશેષ ચર્ચા થશે, જેમાં એ વાત પર ભાર મૂકવામાં આવશે કે અંતરિક્ષ કાર્યક્રમ ભારતને 2047 સુધીમાં વિકસિત રાષ્ટ્ર બનાવવામાં કેવી રીતે મદદ કરશે.

સોશિયલ મીડિયા પર ભાવનાત્મક પોસ્ટ

ભારત પરત ફરતી વખતે શુક્લાએ ઇન્સ્ટાગ્રામ પર એક તસવીર શેર કરી અને લખ્યું કે તેઓ મિશ્ર લાગણીઓમાંથી પસાર થઈ રહ્યા છે. તેમણે લખ્યું, “અમેરિકામાં મળેલા મિત્રો અને પરિવારને છોડવાનું દુઃખ છે, પરંતુ ભારત પરત ફરીને મારા પરિવાર અને દેશવાસીઓને મળવાની ખુશી પણ છે. જેમ કે મારા કમાન્ડર પેગી વ્હિટ્સન કહે છે – અંતરિક્ષ યાત્રામાં પરિવર્તન જ સ્થાયી છે, અને આ જીવનમાં પણ સાચું છે.” તેમણે ફિલ્મ ‘સ્વદેશ’ના ગીત ‘યૂં હી ચલા ચલ રાહી’ની પંક્તિઓ લખીને પોસ્ટ પૂર્ણ કરી.

શુભાંશુ શુક્લાના પરિવારની ખુશી

લખનઉમાં રહેતા શુક્લાનો પરિવાર લોન્ચ અને લેન્ડિંગ બંને પ્રસંગે હાજર હતો. તેમના પિતા શંભુ દયાલ શુક્લાએ કહ્યું, “અમને ખૂબ ખુશી છે કે અમારા દીકરાએ સફળ મિશન પૂર્ણ કર્યું અને હવે તે ભારત પરત આવ્યો છે. અમે દિલ્હીમાં તેને મળવા માટે ઉત્સુક છીએ.”

આ પણ વાંચો : એક તરફ ઓપરેશન સિંદૂરને 100 દિવસ પૂર્ણ, બીજી તરફ દેશને 23.47 લાખ કરોડનો નફો થયો, જાણો કેમ