90000 કરોડનો પ્રોજેક્ટ 75i ભારત માટે કેમ છે મહત્ત્વનો? જર્મની સાથે રાજનાથ સિંહ કરશે મોટી ડિફેન્સ ડીલ

National news: સંરક્ષણ પ્રધાન રાજનાથ સિંહ મંગળવારથી જર્મનીની ત્રણ દિવસની સત્તાવાર મુલાકાતે રવાના થશે. આ મુલાકાતનો ઉદ્દેશ્ય બંને દેશો વચ્ચે વ્યૂહાત્મક સંરક્ષણ ભાગીદારીને વધુ મજબૂત બનાવવાનો છે. આ મુલાકાત દરમિયાન રાજનાથ સિંહ તેમના જર્મન સમકક્ષ બોરિસ પિસ્ટોરિયસ અને અન્ય વરિષ્ઠ સરકારી નેતાઓ સાથે દ્વિપક્ષીય વાટાઘાટો કરશે. સંરક્ષણ મંત્રાલય દ્વારા જારી કરાયેલા એક નિવેદન અનુસાર બંને નેતાઓ વચ્ચેની ચર્ચા સંરક્ષણ ઉદ્યોગમાં સહયોગ વધારવા અને મિલિટ્રી ટુ મિલિટ્રી એન્ગેજમેન્ટને મજબૂત બનાવવા પર કેન્દ્રિત રહેશે. ચર્ચામાં સાયબર સુરક્ષા, આર્ટિફિશિયલ ઈન્ટેલિજન્સ અને ડ્રોન જેવા ઉભરતા ક્ષેત્રોમાં તકો શોધવાની પણ અપેક્ષા છે. આ મુલાકાત દરમિયાન પ્રોજેક્ટ 75I (P-75I) અંગે મહત્ત્વપૂર્ણ નિર્ણય લેવામાં આવે તેવી પણ શક્યતા છે.

રાજનાથ સિંહ જર્મનીની મુલાકાત અને ડિફેન્સ ડીલ પર દેશની નજર

21 થી 24 એપ્રિલ સુધી જર્મનીની ત્રણ દિવસીય મુલાકાત દરમિયાન રાજનાથ સિંહ એક મુખ્ય સંરક્ષણ સોદા પર ચર્ચા કરશે. મંત્રીઓની હાજરીમાં ડિફેન્સ ઈન્ડસ્ટ્રિયલ કોઓપરેશન રોડમેપ અને સંયુક્ત રાષ્ટ્ર શાંતિ અભિયાનોમાં તાલીમ સહયોગ સંબંધિત કરારો પર હસ્તાક્ષર થવાની અપેક્ષા છે. આ બેઠક દરમિયાન તેઓ ‘પ્રોજેક્ટ 75I’ (P-75I) હેઠળ ભારતમાં છ આગામી પેઢીની પરંપરાગત સબમરીન બનાવવા માટે પ્રસ્તાવિત ભારત-જર્મની કરાર પર ચર્ચા કરશે. ભારત અને જર્મની ઘણા સમયથી આ સબમરીન સોદાને અંતિમ સ્વરૂપ આપવાનો પ્રયાસ કરી રહ્યા છે.

પ્રોજેક્ટ-75I ભારત માટે કેમ મહત્ત્વપૂર્ણ છે?

• પ્રોજેક્ટ 75I હેઠળ છ સબમરીન ડીલનો ખર્ચ ભારત માટે રૂ. 70,000 કરોડથી રૂ. 99,000 કરોડની વચ્ચે થઈ શકે છે.
• એવી અપેક્ષા છે કે આ છ સબમરીન ભારતમાં મુંબઈ સ્થિત મઝગાંવ ડોક શિપબિલ્ડર્સ દ્વારા બનાવવામાં આવશે.
• આ કાર્યમાં જર્મનીની અગ્રણી સંરક્ષણ કંપની ‘થિસેનક્રુપ મરીન સિસ્ટમ્સ’નો પણ સહયોગ લેવામાં આવશે
• ભારત નવી પરંપરાગત સબમરીન માટે 10 અબજ ડોલરના સોદા પર હસ્તાક્ષર કરવાની આરે છે, જેમાં જર્મન કંપની TKMS ટેકનિકલ ભાગીદાર છે.
• હસ્તગત કરવામાં આવનારી છ સબમરીન એર ઇન્ડિપેન્ડન્ટ પ્રોપલ્શન (AIP) સિસ્ટમથી સજ્જ હશે, જે તેમને અઠવાડિયા સુધી પાણીની અંદર રહેવા સક્ષમ બનાવશે.
• એક આંતર-સરકારી કરાર, જે આ મુખ્ય કરાર માટે એક વ્યાપક માળખા તરીકે કામ કરશે.
  બંને દેશો વચ્ચે કરાર પહેલેથી જ અંતિમ સ્વરૂપ પામી ચૂક્યો છે, ટૂંક સમયમાં ઔપચારિક નિર્ણય લેવાની અપેક્ષા છે.
• આ સબમરીનનું નિર્માણ મઝગામ ડોકયાર્ડ્સ લિમિટેડ તરફથી બનાવવામાં આવશે, જેમાં 50 ટકાથી વધુ સ્વદેશી સામગ્રીનો ઉપયોગ કરવામાં આવશે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

ભારત-જર્મનીમાં થઈ શકે છે ડિફેન્સ ડીલ

રાજનાથ સિંહની આ જર્મનીની મુલાકાત બંને દેશો વચ્ચે ચાલી રહેલા સંરક્ષણ સહયોગ પહેલની સમીક્ષા કરવાની અને બંને દેશોના સંરક્ષણ ઉદ્યોગો વચ્ચે સહયોગના નવા માર્ગો શોધવાની તક પૂરી પાડશે. તેઓ મેક-ઇન-ઇન્ડિયા પહેલ હેઠળ સંયુક્ત વિકાસ અને સહ-ઉત્પાદનને પ્રોત્સાહન આપવાના હેતુથી જર્મન સંરક્ષણ ઉદ્યોગના મુખ્ય પ્રતિનિધિઓ સાથે પણ વાતચીત કરે તેવી અપેક્ષા છે.

સાત વર્ષ પછી જર્મનીના પ્રવાસે સંરક્ષણ પ્રધાન

સંરક્ષણ પ્રધાનની જર્મનીની મુલાકાત સાત વર્ષના અંતરાલ પછી થઈ રહી છે. ભારતીય સંરક્ષણ પ્રધાન દ્વારા જર્મનીની છેલ્લી મુલાકાત ફેબ્રુઆરી 2019 માં નિર્મલા સીતારમણે કરી હતી. પિસ્ટોરિયસે છેલ્લે જૂન 2023 માં ભારતની મુલાકાત લીધી હતી અને રાજનાથ સિંહ સાથે વ્યાપક વાટાઘાટો કરી હતી. રાજનાથ સિંહની મુલાકાતમાં ઔદ્યોગિક સહયોગ પર વાટાઘાટો તેમજ એક ખાસ સંરક્ષણ રોકાણકાર સમિટનો સમાવેશ થશે, જેમાં બંને દેશોના ટોચના લશ્કરી ઉત્પાદકો ભાગ લે તેવી અપેક્ષા છે.

રાજનાથ સિંહની જર્મની મુલાકાત દરમિયાન આ મુદ્દાઓ ઉઠી શકે

• રાજનાથ સિંહની મુલાકાત દરમિયાન મ્યુનિકમાં એક ખાસ ભારત-જર્મની સંરક્ષણ રોકાણકારો શિખર સંમેલનનું આયોજન કરવામાં આવ્યું છે.
• તેનો ઉદ્દેશ્ય જર્મન સંરક્ષણ ઉદ્યોગના મુખ્ય ખેલાડીઓ સાથે જોડાણ કરીને સહયોગ, રોકાણ અને ભાગીદારી માટેના માર્ગો શોધવાનો છે.
• બંને દેશો દ્વિપક્ષીય સહયોગનો વિસ્તાર કરી રહ્યા છે, જેમાં સંરક્ષણ ટેકનોલોજીની વહેંચણીનો પણ સમાવેશ થાય છે.
• ભારતીય કંપનીઓ પણ જર્મન સશસ્ત્ર દળો અને અન્ય યુરોપીયન સૈન્યને તેમના ઉત્પાદનો ઓફર કરવામાં રસ દાખવી રહી છે.
• સમગ્ર ખંડમાં સંરક્ષણ ખર્ચ ઝડપથી વધી રહ્યો હોવાથી, તેમને ઓર્ડર મળશે તેવી આશા છે.
• કેટલીક કંપનીઓ ભારતમાં મોટા પાયે સંરક્ષણ પ્રણાલીઓના ઉત્પાદન માટે ઉપયોગમાં લઈ શકાય તેવી ટેકનોલોજી મેળવવા માટે જર્મન કંપનીઓમાં હિસ્સો ખરીદવાનું વિચારી રહી છે.

આ પણ વાંચોઃ હોર્મુઝમાં જહાજો પર ફાયરિંગ બાદ ભારતે નવી એડવાઇઝરી જાહેર કરી, જાણો શું કહ્યું?