એશિયા કપની ટ્રોફીને લઈને ભારત-પાકિસ્તાન ફરી આમને-સામને, ICC મીટિંગમાં BCCI અપનાવશે કડક વલણ
નવી દિલ્હી: 22 ઓક્ટોબર, 2025: એશિયા કપના પુરસ્કાર વિતરણ સમારોહ દરમિયાન થયેલા વિવાદને લઈને BCCI (ભારતીય ક્રિકેટ કંટ્રોલ બોર્ડ) અને PCB (પાકિસ્તાન ક્રિકેટ બોર્ડ) ફરી એકવાર સામસામે આવી ગયા છે. PCBના અધિકારી નકવીએ ગંભીર દાવો કર્યો છે કે ભારતીય ટીમે ટ્રોફી અને પુરસ્કાર સ્વીકારવાનો ઇનકાર કરતાં સમારોહમાં લાંબો વિલંબ થયો હતો.
PCBનો મોટો આરોપ
નકવીએ કહ્યું, “જ્યારે સમારોહ શરૂ થવાનો હતો અને વિશેષ અતિથિઓ મંચ પર પોતાનું સ્થાન ગ્રહણ કરી ચૂક્યા હતા, ત્યારે જ BCCIના પ્રતિનિધિએ જાણ કરી કે ભારતીય ક્રિકેટ ટીમ એશિયા કપ ટ્રોફી અને પુરસ્કાર ગ્રહણ કરશે નહીં. આ મડાગાંઠ દૂર કરવા માટે પ્રયાસો કરવામાં આવ્યા, જેના કારણે સમારોહમાં ઘણો વિલંબ થયો.”
જવાબમાં એવું પણ કહેવામાં આવ્યું છે કે, “એશિયન ક્રિકેટ કાઉન્સિલ (ACC)ના અધ્યક્ષે પ્રતિષ્ઠિત અતિથિઓ સાથે લગભગ 40 મિનિટ સુધી રાહ જોઈ, જેથી પુરસ્કાર વિતરણ સમારોહની અખંડિતતા જળવાઈ રહે અને રાજનીતિથી તેના પર કોઈ પ્રતિકૂળ અસર ન પડે, પરંતુ આ પ્રયાસ વ્યર્થ ગયો.”
વિવાદ ICC બોર્ડ સુધી પહોંચશે:
સૂત્રો પાસેથી મળતી માહિતી મુજબ, બોર્ડના કાયદાકીય વિભાગને પહેલેથી જ એક ડોઝિયર (વિવાદ સંબંધિત દસ્તાવેજો) તૈયાર કરવાનો નિર્દેશ આપવામાં આવ્યો છે. આ તૈયારી એટલા માટે કરવામાં આવી છે કે જો BCCIના અધિકારીઓ ICC બોર્ડની બેઠકમાં નકવીની નિંદા કરવાનો પ્રયાસ કરશે, તો PCB તેનો જડબાતોડ જવાબ આપી શકે. BCCI એ પહેલેથી જ સંકેત આપી દીધા છે કે તે આ મામલાને ICCની બેઠકમાં ઉઠાવવા જઈ રહ્યું છે. આ વિવાદથી બંને ક્રિકેટ બોર્ડ વચ્ચેનો તણાવ વધુ વધી ગયો છે.
આ પણ વાંચોઃ સિદ્ધારમૈયા પોતાના રાજકીય કરિયરના અંતિમ તબક્કામાં, કર્ણાટકના મુખ્યમંત્રીના પુત્રએ આપ્યું મોટું નિવેદન
આ પણ વાંચોઃ રણવીર સિંહ અને દીપિકા પાદુકોણે દીકરીનો ફેસ રિવીલ કર્યો, ફેન્સે કહ્યું- મા જેવી લાગે છે…
