ટેલિકોમ સેક્ટરમાં આત્મનિર્ભર બની રહ્યું છે ભારત, PLI સ્કીમ દ્વારા ત્રણ વર્ષમાં રૂ. 3,400 કરોડનું રોકાણ

• દેશમાં ટેલિકોમ સાધનોનું ઉત્પાદન વેચાણ ત્રણ વર્ષમાં રૂ. 50,000 કરોડના સર્વોચ્ચ સ્તરને પાર કરી ગયું
• ટેલિકોમ સેક્ટરમાં વેપાર ખાધ 68,000 કરોડ રૂપિયાથી ઘટીને 4,000 કરોડ રૂપિયા થઈ ગઈ

નવી દિલ્હી, 11 જુલાઈ : પ્રોડક્શન લિન્ક્ડ ઇન્સેન્ટિવ (PLI) સ્કીમ અને મેક ઇન ઇન્ડિયાના આધારે, દેશ ટેલિકોમ્યુનિકેશન અને નેટવર્કિંગ પ્રોડક્ટ્સના ક્ષેત્રમાં વડાપ્રધાન નરેન્દ્ર મોદીના ‘આત્મનિર્ભર ભારત’ના સ્વપ્નને સાકાર કરવાની દિશામાં ઝડપથી આગળ વધી રહ્યો છે. PLI સ્કીમની મદદથી દેશમાં ટેલિકોમ સાધનોનું ઉત્પાદન વેચાણ ત્રણ વર્ષમાં રૂ. 50,000 કરોડના સર્વોચ્ચ સ્તરને પાર કરી ગયું છે. કેન્દ્ર સરકારે કહ્યું કે, આ દેશ માટે એક મોટી ઉપલબ્ધિ છે. આ વેચાણમાં આશરે રૂ. 10,500 કરોડની નિકાસ પણ સામેલ છે.

17,800થી વધુ લોકોને પ્રત્યક્ષ અને પરોક્ષ રોજગારી

PLI યોજનાની મદદથી ટેલિકોમ સેક્ટરે ત્રણ વર્ષના આ સમયગાળામાં રૂ. 3,400 કરોડનું રોકાણ આકર્ષ્યું છે અને 17,800 થી વધુ લોકોને પ્રત્યક્ષ અને પરોક્ષ રોજગારી પૂરી પાડી છે. સરકારે જણાવ્યું હતું કે, આત્મનિર્ભર ભારતના વિઝનને અનુરૂપ, ટેલિકોમ્યુનિકેશન અને નેટવર્કિંગ ઉત્પાદનો અને ઇલેક્ટ્રોનિક્સના મોટા પાયે ઉત્પાદન માટેની PLI યોજનાએ દેશમાં ઉત્પાદન, રોજગાર સર્જન, આર્થિક વૃદ્ધિ અને નિકાસમાં નોંધપાત્ર વધારો કર્યો છે.

આયાત અને નિકાસ વચ્ચેનું અંતર ઘટ્યું

PLI સ્કીમ સિવાય, સરકારના અન્ય પ્રયાસોએ ટેલિકોમ આયાત અને નિકાસ વચ્ચેના તફાવતને નોંધપાત્ર રીતે ઘટાડ્યો છે. ટેલિકોમ સાધનો અને મોબાઈલ સહિત, 2023-24માં 1.49 લાખ કરોડ રૂપિયાના ઉત્પાદનોની નિકાસ કરવામાં આવી હતી. આ સમયગાળા દરમિયાન આયાત રૂ. 1.53 લાખ કરોડથી વધુ રહી હતી.

આ પણ વાંચો : રાષ્ટ્રપતિ દ્રૌપદી મૂર્મૂ અને સાયના નેહવાલ વચ્ચે બેડમિન્ટન કોર્ટમાં થઈ મેચ, જૂઓ વીડિયો

ટેલિકોમ વેપાર ખાધમાં મોટો ઘટાડો

PLI યોજનાએ આયાતી ટેલિકોમ સાધનો પર ભારતની નિર્ભરતા લગભગ 60 ટકા ઘટાડી છે. આ કારણે દેશ કેટલીક પ્રોડક્ટ્સમાં લગભગ આત્મનિર્ભર બની ગયો છે. ભારતીય ઉત્પાદકો હવે વૈશ્વિક સ્તરે સ્પર્ધા કરી રહ્યા છે. આ જ કારણ છે કે છેલ્લા પાંચ વર્ષમાં ટેલિકોમ સેક્ટર (ટેલિકોમ સાધનો અને મોબાઈલ)માં વેપાર ખાધ 68,000 કરોડ રૂપિયાથી ઘટીને 4,000 કરોડ રૂપિયા થઈ ગઈ છે.

ભારત મોબાઈલ ફોનના આયાતકારમાંથી નિકાસકાર બની ગયું

ઈલેક્ટ્રોનિક સેક્ટરમાં PLI સ્કીમની મદદથી દેશમાં મોબાઈલ ફોનના ઉત્પાદન અને નિકાસમાં નોંધપાત્ર વધારો થયો છે. ભારત હવે મોબાઈલ ફોનના આયાતકારમાંથી નિકાસકાર બની ગયું છે. 2014-15માં દેશમાં માત્ર 5.8 કરોડ મોબાઈલ ફોનનું ઉત્પાદન થયું હતું અને 21 કરોડ યુનિટની આયાત કરવામાં આવી હતી. 2023-24માં દેશમાં મોબાઈલ ફોનનું ઉત્પાદન વધીને 33 કરોડના સ્તરે પહોંચી જશે. આ સમયગાળા દરમિયાન 5 કરોડ મોબાઈલ ફોનની નિકાસ પણ કરવામાં આવી હતી. મૂલ્યની દ્રષ્ટિએ, ભારત, જેણે 2014-15માં રૂ. 1,556 કરોડ અને 2017-18માં રૂ. 1,367 કરોડના મોબાઇલ ફોનની નિકાસ કરી હતી, તે 2023-24માં વિવિધ દેશોને રૂ. 1,28,982 કરોડના મોબાઇલ ફોનનું વેચાણ કરે તેવી ધારણા છે.

આ પણ વાંચો : ગુજરાતના આ શહેરમાં રૂ.2800 કરોડનું હવાલા કૌભાંડ, EDના દરોડામાં થયો પર્દાફાશ