‘હું ન હોત તો પાકિસ્તાનના 3.5 કરોડ લોકો મરી ગયા હોત’ – ઓપરેશન સિંદૂર અંગે ડોનાલ્ડ ટ્રમ્પનો નવો દાવો

 અમેરિકા, 25 ફેબ્રુઆરી 2026:   અમેરિકાના રાષ્ટ્રપતિ Donald Trump એ ફરી એકવાર ભારત અને પાકિસ્તાન વચ્ચે સંભવિત પરમાણુ યુદ્ધ અટકાવ્યાનો દાવો કર્યો છે. પોતાના ‘સ્ટેટ ઓફ ધ યુનિયન’ સંબોધનમાં ટ્રમ્પે ચોંકાવનારો ખુલાસો કરતા કહ્યું કે ભારતના ‘ઓપરેશન સિંદૂર’ દરમિયાન તેમણે હસ્તક્ષેપ કરીને અંદાજે 3.5 કરોડ લોકોની જાન બચાવી હતી.

ટ્રમ્પના દાવા મુજબ, પાકિસ્તાનના વડાપ્રધાન Shehbaz Sharif એ તેમને કહ્યું હતું કે જો અમેરિકા વચ્ચે પડ્યું ન હોત, તો ગયા વર્ષે થયેલા સૈન્ય તણાવ દરમિયાન ભારે જાનહાનિ થઈ હોત.

‘આઠ યુદ્ધ રોક્યા’ – ટ્રમ્પનો દાવો

ટ્રમ્પે પોતાના બીજા કાર્યકાળના પ્રથમ ‘સ્ટેટ ઓફ ધ યુનિયન’ ભાષણ દરમિયાન જણાવ્યું કે પોતાના પહેલા 10 મહિનામાં તેમણે આઠ યુદ્ધો અટકાવ્યા. તેમાં ઇઝરાયલ-હમાસ, ઇઝરાયલ-ઇરાન, મિસર-ઇથિઓપિયા, ભારત-પાકિસ્તાન, સર્બિયા-કોસોવો, રવાંડા-કોંગો, આર્મેનિયા-અજરબૈજાન અને કમ્બોડિયા-થાઇલેન્ડ વચ્ચેના સંઘર્ષોનો સમાવેશ કર્યો.

તેમણે કહ્યું કે ભારત અને પાકિસ્તાન વચ્ચે પરમાણુ યુદ્ધની શક્યતા ઉભી થઈ હતી, પરંતુ તેમના હસ્તક્ષેપથી પરિસ્થિતિ કાબૂમાં આવી.

ભારતે દાવો ફગાવ્યો

ભારતે ટ્રમ્પના દાવાને વારંવાર નકારી કાઢ્યો છે. વિદેશ મંત્રી S. Jaishankar ને જ્યારે પૂછવામાં આવ્યું કે સંઘર્ષ દરમિયાન અમેરિકાની શું ભૂમિકા હતી, ત્યારે તેમણે કૂટનીતિક અંદાજમાં જવાબ આપ્યો હતો: “યુએસ, યુનાઇટેડ સ્ટેટ્સ ઓફ અમેરિકા માં જ હતું.” તેમના આ જવાબનો અર્થ એવો લેવાયો કે યુદ્ધવિરામમાં અમેરિકાની કોઈ ભૂમિકા નહોતી.

ભારતના વિદેશ સચિવ Vikram Misri એ પણ તૃતીય પક્ષના હસ્તક્ષેપને નકારી કાઢ્યો હતો. તેમના જણાવ્યા મુજબ, પાકિસ્તાનના DGMO એ હોટલાઇન દ્વારા ભારતીય સમકક્ષનો સંપર્ક કરીને સંઘર્ષ સમાપ્ત કરવાની વિનંતી કરી હતી, જેના આધારે બંને દેશો વચ્ચે યુદ્ધવિરામ લાગુ પડ્યો.

રાજનૈતિક ચર્ચા તેજ

ટ્રમ્પના આ તાજા નિવેદનથી આંતરરાષ્ટ્રીય રાજનૈતિક મંચ પર ફરી ચર્ચા તેજ થઈ છે. ભારત સ્પષ્ટપણે કહી ચૂક્યું છે કે ભારત-પાકિસ્તાન મુદ્દાઓ દ્વિપક્ષીય છે અને તેમાં કોઈ તૃતીય પક્ષની ભૂમિકા નહોતી.

આ પણ વાંચો : સુરતના વેસુ વિસ્તારની હચમચાવી નાખતી ઘટના, સામુહિક આપઘાતના પ્રયાસમાં 3ના મોત, દીકરીનો બચાવ