પટનામાં રિસેપ્શન પાર્ટીમાં ગોળીબાર: બે સગા ભાઈઓની હત્યા

પટના, 23 ફેબ્રુઆરી 2026:   Patnaમાં ગોળીબારની ચોંકાવનારી ઘટના સામે આવી છે. શહેરના ગોપાલપુર થાણા વિસ્તારમાં આવેલા શાહપુરમાં એક રિસેપ્શન પાર્ટી દરમિયાન અજાણ્યા શખ્સોએ અંધાધૂંધ ફાયરિંગ કરી બે સગા ભાઈઓની હત્યા કરી દીધી.

માહિતી મુજબ, દૌલત રાયના પુત્રના રિસેપ્શન કાર્યક્રમમાં મોટી સંખ્યામાં લોકો હાજર હતા. કાર્યક્રમ ચાલી રહ્યો હતો ત્યારે અચાનક ગોળીબાર શરૂ થતાં અફરાતફરી મચી ગઈ.

વિવાદ બાદ ફાયરિંગ

ચશ્મદીદોના જણાવ્યા મુજબ, 32 વર્ષીય મનીષ કુમાર અને તેના 23 વર્ષીય ભાઈ મંજીત કુમારનો કોઈ મુદ્દે વિવાદ થયો હતો. આ દરમિયાન આરોપીઓએ હથિયાર કાઢી તાબડતોબ ગોળીઓ ચલાવી. ગોળી વાગતા બંને ભાઈઓ ગંભીર રીતે ઘાયલ થયા.

પરિવારજનો અને હાજર લોકોએ બંનેને તાત્કાલિક નજીકની હોસ્પિટલમાં પહોંચાડવાનો પ્રયાસ કર્યો, પરંતુ હોસ્પિટલ પહોંચતા પહેલાં જ બંનેએ દમ તોડી દીધો.

સ્થળ પરથી પુરાવા એકત્ર

ઘટનાની જાણ થતાં જ ગોપાલપુર થાણા પોલીસ ઘટનાસ્થળે પહોંચી અને તપાસ શરૂ કરી. પોલીસે આસપાસના સીસીટીવી કેમેરાની ફૂટેજ તપાસવાની પ્રક્રિયા હાથ ધરી છે. સ્થળ પરથી કારતૂસના ત્રણ ખોખા મળી આવ્યા છે.

ફોરેન્સિક ટીમની મદદથી પુરાવા એકત્ર કરી આરોપીઓની ઓળખ અને ધરપકડ માટે કાર્યવાહી તેજ કરવામાં આવી છે.

પોલીસ અધિકારીઓએ જણાવ્યું કે આ ઘટના રિસેપ્શન પાર્ટી દરમિયાન બની હતી અને બંને ઘાયલને હોસ્પિટલ લઈ જવાના પહેલાં જ મોત નીપજ્યું. હાલ સમગ્ર મામલે વધુ તપાસ ચાલી રહી છે અને આરોપીઓની શોધખોળ શરૂ કરવામાં આવી છે.

આ પણ વાંચો : પવિત્ર ભવનાથમાં વિવાદ સર્જનાર કીર્તિ પટેલની રાજસ્થાનથી ધરપકડ; કોર્ટે એક દિવસના રિમાન્ડ મંજૂર કર્યા