I.N.D.I.A વિવાદઃ રાજકીય જોડાણના નામ બાબતે અમે કશું ન કરી શકીએઃ ચૂંટણીપંચ

• ચૂંટણી પંચ પાસે રાજકીય જોડાણોને નિયંત્રિત કરવાની સત્તા નથી
• I.N.D.I.A નામ આપવા સામે વાંધો ઉઠાવતી PIL દાખલ કરાઈ હતી
• વિરોધ પક્ષ પર મત મેળવવા માટે નામનો ઉપયોગ કરવાનો આરોપ

નવી દિલ્હી, 30 ઑક્ટોબર: I.N.D.I.A ગઠબંધન નામના વિવાદ પર ચૂંટણી પંચે દિલ્હી હાઈકોર્ટમાં જવાબ આપ્યો છે. પંચે જવાબ આપતા કહ્યું કે, ભારતીય ચૂંટણી પંચ પાસે રાજકીય જોડાણોને નિયંત્રિત કરવાની સત્તા નથી. ચૂંટણી પંચે વિપક્ષી રાજકીય પક્ષો દ્વારા INDIA એલાયન્સ નામને પડકારતી અરજીના જવાબમાં દિલ્હી હાઈકોર્ટને જણાવ્યું છે. ECI એ તેના સોગંદનામામાં જણાવ્યું હતું કે જ્યારે લોક પ્રતિનિધિત્વ અધિનિયમની કલમ 29A હેઠળ રાજકીય પક્ષો તરીકે વ્યક્તિઓના સંગઠનો અથવા સંસ્થાઓની નોંધણી કરવાનો અધિકાર છે, ત્યારે રાજકીય જોડાણોને કાયદા અથવા બંધારણ હેઠળ નિયંત્રિત સંસ્થાઓ તરીકે માન્યતા આપવામાં આવતી નથી.

ECI એ સ્પષ્ટ કર્યું કે તે તેની ભૂમિકા મર્યાદિત છે. ગઠબંધનનું નામ I.N.D.I.A હોવું જોઈએ કે નહીં તેની માન્યતા સાબિત કરવાની સત્તા ચૂંટણી પંચ પાસે નથી. પંચે કોર્ટને કહ્યું કે અમે ઇન્ડિયન નેશનલ ડેવલપમેન્ટ અલયાન્સના નામે કંઈ કરી શકતા નથી કારણ કે લોક પ્રતિનિધિત્વ અધિનિયમ 1951 તેની મંજૂરી આપતું નથી. મહત્વનું છે કે, ઉદ્યોગપતિ ગિરીશ ભારદ્વાજે વિરોધ પક્ષોના ગઠબંધનને ‘I.N.D.I.A’ નામ આપવા સામે વાંધો ઉઠાવતી PIL દાખલ કરી હતી. અરજીમાં કહેવામાં આવ્યું છે કે વિરોધ પક્ષો આ નામનો ઉપયોગ માત્ર મત મેળવવા માટે કરી રહ્યા છે.

ગિરીશ ભારદ્વાજે અરજીમાં રજૂઆત કરી હતી કે રાજકીય હેતુઓ માટે INDIA ટૂંકાક્ષરનો ઉપયોગ એ પ્રિવેન્શન ઓફ અનફેર યુઝ એક્ટ, 1950નું ઉલ્લંઘન છે. તેમણે ચિંતા વ્યક્ત કરી હતી કે આનાથી 2024ની લોકસભા ચૂંટણી દરમિયાન શાંતિપૂર્ણ, પારદર્શક અને ન્યાયી મતદાન પર ગંભીર અસર થઈ શકે છે. જે સંભવિત રીતે બિનજરૂરી હિંસા તરફ દોરી શકે છે અને આ નામ દેશમાં કાયદો અને વ્યવસ્થાને અસર પણ પહોંચાડશે.

આ પણ વાંચો:  I.N.D.I.A જોડાણે મજબૂરીમાં મહિલા અનામત બિલનું સમર્થન કર્યુંઃ PM મોદી