કોંગ્રેસે તેમના પૂર્વ ઉમેદવાર ખોવાયા હોવાનું કર્યું જાહેર, પોસ્ટર લગાવી રાખ્યું 5100 રુપિયાનું ઈનામ
- ઈન્દોર શહેરમાં ઠેર-ઠેર લાગ્યા અક્ષય કાંતિ બમ ગુમ થયાના પોસ્ટર
- કોંગ્રેસ અક્ષય કાંતિ બમ વિશે માહિતી આપનારને આપશે 5,100 રુપિયાનું રોકડ ઈનામ
ઈન્દોર, 22 મે: કોંગ્રેસે સ્થાનિક ઉદ્યોગપતિ અક્ષય કાંતિ બમ વિરુદ્ધ શહેરમાં અલગ-અલગ જગ્યાએ પોસ્ટર લગાવ્યા છે, જેમણે છેલ્લી ક્ષણે પોતાનું નામાંકન પાછું ખેંચી લીધું હતું અને મધ્યપ્રદેશના ઈન્દોર લોકસભા મતવિસ્તારમાંથી કોંગ્રેસના ઉમેદવાર તરીકે ભાજપમાં જોડાયા હતા. આ પોસ્ટરોમાં બમ (46)ને હત્યાના કથિત પ્રયાસના 17 વર્ષ જૂના કેસમાં ફરાર તરીકે વર્ણવવામાં આવ્યો છે અને તેના વિશે માહિતી આપનારને 5,100 રૂપિયાના રોકડ ઈનામની જાહેરાત કરવામાં આવી છે.
શું છે સમગ્ર મામલો?
આ કેસમાં સેશન્સ કોર્ટે 10 મેના રોજ બમ અને તેના 75 વર્ષીય પિતા કાંતિલાલ સામે ધરપકડ વોરંટ જારી કર્યું હતું. ખજરાના પોલીસ સ્ટેશનના પ્રભારી સુજીત શ્રીવાસ્તવે બુધવારે જણાવ્યું કે બંને આરોપીઓની શોધ ચાલી રહી છે.
કોંગ્રેસ શહેર એકમના કાર્યકારી પ્રમુખ દેવેન્દ્ર સિંહ યાદવે કહ્યું કે, ‘કોંગ્રેસ સાથે દગો કરનાર બમ હત્યા પ્રયાસ કેસમાં ફરાર છે. તેમની ધરપકડમાં પોલીસને સહકાર આપવા માટે, અમે શહેરના મુખ્ય ચોક, થ્રી-વ્હીલર અને ફોર-વ્હીલર પર પોસ્ટર લગાવ્યા છે.’
અહીં જૂઓ વીડિયો:
पूरे इंदौर में अक्षय बम के पाेस्टर pic.twitter.com/vKGSn2fHf6
— Raju Sharma (@RajuSha98211687) May 22, 2024
જે કોઈ બમ વિશે માહિતી આપશે તેને કોંગ્રેસ આપશે ઈનામ
તેમણે વધુમાં કહ્યું કે, ‘જો કોઈ કોંગ્રેસ કાર્યકર અથવા સામાન્ય નાગરિક બમ વિશે પોલીસને માહિતી આપશે તો તેમને તેમના દ્વારા 5,100 રૂપિયાનું રોકડ ઈનામ આપવામાં આવશે. કથિત હત્યાના પ્રયાસના કેસમાં બમ અને તેના પિતાની આગોતરા જામીન અરજી પર મધ્યપ્રદેશ હાઈકોર્ટની ઈન્દોર બેંચમાં 24 મે (શુક્રવાર)ના રોજ સુનાવણી થવાની છે.
શહેરના ફર્સ્ટ ક્લાસ જ્યુડિશિયલ મેજિસ્ટ્રેટ (JMFC) એ જમીન વિવાદને લઈને સ્થાનિક ખેડૂત યુનુસ પટેલ પર 2007માં કથિત હુમલાના સંબંધમાં બમ અને તેના પિતા વિરુદ્ધ નોંધાયેલી FIRમાં ભારતીય દંડ સંહિતાની કલમ 307 (હત્યાનો પ્રયાસ) ઉમેરવાનો 24મી એપ્રિલે આદેશ આપ્યો હતો. આ આદેશના માત્ર પાંચ દિવસ પછી 29 એપ્રિલે બમે ઈન્દોરથી કોંગ્રેસના ઉમેદવાર તરીકે પોતાનું નામ પાછું ખેંચી લીધું હતું. ત્યારપછી તેઓ ભાજપમાં જોડાયા હતા.
આ પણ વાંચો: ધારાસભ્યે મતદાન મથક પહોંચી મચાવી ધમાલ, મતદાન દરમિયાન EVM તોડ્યું
