બંગાળના મંત્રીએ CM મમતા બેનર્જીને ભગવાન ગણાવ્યા : BJP એ કહ્યું, તેઓ હતાશ થઇ ગયા

પશ્ચિમ બંગાળના મંત્રી શોભનદેવ ચટ્ટોપાધ્યાયે રાજ્યના સીએમ મમતા બેનર્જીને ભગવાન ગણાવ્યા છે. તેમણે રવિવારે કહ્યું કે મુખ્યમંત્રી મમતા બેનર્જી કોઈ ખોટું કરી શકે નહીં કારણ કે તેઓ ભગવાન સમાન છે. રાજ્યના કૃષિ પ્રધાન શોભનદેવે તો ત્યાં સુધી કહ્યું કે તેઓ ચોર હોઈ શકે છે, પરંતુ મમતા બેનર્જી એવા નથી. તેમની આ ટિપ્પણીએ એક વિવાદને જન્મ આપ્યો છે. તેના પર પ્રતિક્રિયા આપતા ભાજપે કહ્યું કે ટીએમસી નેતાઓમાં હતાશા ફેલાઈ ગઈ છે. એટલા માટે તેઓ આવા નિવેદનો આપી રહ્યા છે.

પૂજારી ચોર હોય શકે છે પણ ભગવાન નહીં

પશ્ચિમ બંગાળ સરકારના મંત્રી શોભનદેવ ચટ્ટોપાધ્યાયે ઉત્તર 24 પરગણા જિલ્લાના ખરદાહ ખાતે જાહેર સભાને સંબોધિત કરતી વખતે આ ટિપ્પણી કરી હતી. અહીં તેમણે કહ્યું કે મમતા બેનર્જી એક ભગવાન સમાન છે જેની આપણે પૂજા કરીએ છીએ. ભગવાનની પૂજા કરનારા પૂજારીઓ પણ ક્યારેક ચોર હોઈ શકે છે, પરંતુ ભગવાન નહીં, તેઓ જેની પૂજા કરે છે. તેણે વધુમાં કહ્યું કે હું પણ ચોર બની શકું છું, પરંતુ મમતા બેનર્જી નહીં.

ડાબેરી મોરચાની સરકાર પર ગંભીર આરોપો લગાવ્યા

પોતાના સંબોધનમાં કૃષિ મંત્રી ચટ્ટોપાધ્યાયે રાજ્યમાં અગાઉની ડાબેરી મોરચાની સરકાર પર ગંભીર આરોપો લગાવ્યા હતા. તેમણે કહ્યું કે સીપીઆઈ (એમ)ના શાસન દરમિયાન રાજ્યની શૈક્ષણિક સંસ્થાઓમાં ઘણી ગેરરીતિઓ થઈ હતી, પરંતુ તેની ક્યારેય તપાસ થઈ નથી. તેમણે આરોપ લગાવ્યો કે સ્નાતક અને અનુસ્નાતકમાં 50 ટકા માર્ક્સ ન હોવા છતાં ડાબેરી મોરચાની સરકાર દરમિયાન એક વ્યક્તિને યુનિવર્સિટીના રજિસ્ટ્રાર તરીકે નિયુક્ત કરવામાં આવ્યા હતા. આ દરમિયાન, તેમણે દાવો કર્યો હતો કે અગાઉની સરકારમાં રાજ્ય સંચાલિત વિવિધ યુનિવર્સિટીઓમાં ઘણા અયોગ્ય ઉમેદવારોને પ્રોફેસર તરીકે નિયુક્ત કરવામાં આવ્યા હતા, પરંતુ તત્કાલીન સરકાર દ્વારા તેમની અવગણના કરવામાં આવી હતી.