અયોધ્યાના રામ મંદિરમાં પ્રથમ વખત CEOની નિમણૂક થશે, જાણો પગાર, બંગલો, SUV અને અન્ય VIP સુવિધાઓ વિશે
અયોધ્યા: અયોધ્યાના ભવ્ય રામ મંદિરના સંચાલનને વધુ વ્યવસ્થિત અને આધુનિક બનાવવા માટે શ્રી રામ જન્મભૂમિ તીર્થ ક્ષેત્ર ટ્રસ્ટે ઐતિહાસિક નિર્ણય લીધો છે. ટ્રસ્ટ પ્રથમ વખત ચીફ એક્ઝિક્યુટિવ ઓફિસર (CEO)ની નિમણૂક કરવા જઈ રહ્યું છે. આ પદ માત્ર ધાર્મિક સંચાલન પૂરતું નહીં, પરંતુ કોર્પોરેટ સ્ટાઇલ મેનેજમેન્ટ સાથે જોડાયેલું ફુલ-ટાઈમ પદ હશે.
રામ મંદિરમાં દરરોજ લાખો શ્રદ્ધાળુઓ દર્શન માટે આવે છે. આવા સંજોગોમાં સમગ્ર મંદિર પરિસરનું સંચાલન, સુરક્ષા, વિકાસ કાર્યો અને નાણાકીય વ્યવસ્થાને વધુ કાર્યક્ષમ બનાવવા માટે CEOની નિમણૂક કરવામાં આવી રહી છે.
CEOની મુખ્ય જવાબદારીઓ
રામ મંદિરના પ્રથમ CEO સમગ્ર મંદિર સંકુલના વહીવટી વડા તરીકે કામ કરશે. તેમની જવાબદારીઓમાં શ્રદ્ધાળુઓ માટે દર્શન વ્યવસ્થા, સુરક્ષા વ્યવસ્થાનું સંકલન, મંદિર ટ્રસ્ટના ફંડ અને દાનની પારદર્શક નાણાકીય દેખરેખ, ઓડિટ તેમજ મંદિર પરિસરમાં ચાલી રહેલા વિકાસ કાર્યોના મોનિટરિંગનો સમાવેશ થશે.
પગાર, બંગલો અને VIP સુવિધાઓ
આ પદ માટે ટ્રસ્ટ આકર્ષક સુવિધાઓનું પેકેજ આપશે.
- ઉચ્ચ કક્ષાનો માસિક પગાર
- અયોધ્યામાં સર્વસુવિધાસભર સરકારી અથવા ટ્રસ્ટનો બંગલો
- ડ્રાઇવર સાથે અધિકૃત SUV ગાડી
- સુરક્ષા માટે વિશેષ ગાર્ડ્સ
- મેડિકલ ઈન્શ્યોરન્સ
- ટ્રાવેલ એલાઉન્સ
- ફોન અને ઈન્ટરનેટ સહિતની અન્ય ઓફિશિયલ સુવિધાઓ
ટ્રસ્ટના સૂત્રો મુજબ CEOનો પગાર કોઈ મોટા સરકારી અધિકારી અથવા મોટી કંપનીના ટોચના અધિકારીને મળતા વેતનના સમકક્ષ હોઈ શકે છે.
કોણ બની શકે રામ મંદિરના CEO?
- આ પદ માટે અનુભવ ધરાવતા અધિકારીઓને જ પ્રાથમિકતા આપવામાં આવશે.
- ઉમેદવાર નિવૃત્ત IAS અથવા IPS અધિકારી હોવો જોઈએ.
- કેન્દ્ર અથવા રાજ્ય સરકારમાં મુખ્ય સચિવ અથવા તેનાથી ઉચ્ચ પદ પર સેવા આપી હોવી જોઈએ.
- ઉમેદવારનો સર્વિસ રેકોર્ડ નિષ્કલંક હોવો જરૂરી રહેશે.
- વહીવટી અને મેનેજમેન્ટ ક્ષેત્રનો લાંબો અનુભવ હોવો આવશ્યક રહેશે.
ખર્ચ કોણ ઉઠાવશે?
CEOના પગાર, રહેઠાણ, વાહન અને અન્ય તમામ સુવિધાઓનો ખર્ચ કેન્દ્ર સરકાર અથવા ઉત્તર પ્રદેશ સરકાર નહીં ઉઠાવે. આ સમગ્ર ખર્ચ શ્રી રામ જન્મભૂમિ તીર્થ ક્ષેત્ર ટ્રસ્ટ પોતાના ફંડમાંથી કરશે. ટ્રસ્ટને દેશ-વિદેશમાંથી મળતા દાન દ્વારા આ વ્યવસ્થા સંચાલિત કરવામાં આવશે. રામ મંદિર ટ્રસ્ટનું માનવું છે કે પ્રોફેશનલ મેનેજમેન્ટ દ્વારા અયોધ્યા આવતા લાખો શ્રદ્ધાળુઓને વધુ સારી અને વિશ્વસ્તરીય સુવિધાઓ પૂરી પાડી શકાશે.
