કેનેડામાં રચાઈ રહ્યું છે ભારત વિરોધી કાવતરું, ગુપ્તચર એજન્સીઓએ આપી માહિતી

• કેનેડાના આઠ શહેરોમાં ભારત વિરોધી ષડયંત્રનો પર્દાફાશ
• ગુપ્તચર એજન્સીઓએ પંજાબ સરકારને આ અંગે એલર્ટ કરી
• ખાલિસ્તાન સમર્થકો અને તેમના નજીકના લોકો પર નજર રાખવા માટે કહેવામાં આવ્યું

અમૃતસર, 30 ઑક્ટોબરઃ પંજાબમાં ખાલિસ્તાની આતંકવાદને વેગ આપવા માટે કેનેડાના આઠ શહેરોમાંથી કાવતરું રચવામાં આવી રહ્યું છે. કેનેડાના કેટલાક ગુરુદ્વારાનો પણ આ માટે ઉપયોગ કરવામાં આવી રહ્યો છે. ગુપ્તચર એજન્સીઓએ પંજાબ સરકારને ખાલિસ્તાન સમર્થકો અને તેમના નજીકના લોકોની ગતિવિધિઓ પર નજર રાખવા ચેતવણી આપી છે. વિદેશમાં છુપાયેલા આતંકવાદીઓ પણ પંજાબનું વાતાવરણ બગાડવાની તૈયારીમાં છે.

રાજ્ય સરકારને મોકલવામાં આવેલા રિપોર્ટમાં ગુપ્તચર એજન્સીઓએ કેનેડાના એ શહેરનો પણ ઉલ્લેખ કર્યો છે જ્યાં તાજેતરમાં આતંકવાદી નિજ્જરની હત્યા કરવામાં આવી હતી. કેનેડાના કેટલાક શહેરોમાં ભારત વિરોધી પોસ્ટર લગાવવામાં આવ્યા છે. એજન્સીઓએ જણાવ્યું કે આતંકવાદીઓ અને ખાલિસ્તાન સમર્થકો આ શહેરોમાં આવતા-જતા રહે છે. કેટલાક ધાર્મિક સ્થળોની મેનેજમેન્ટ કમિટી પણ તેમને મદદ કરી રહી છે. એજન્સીઓએ આવા ગુરુદ્વારા સંચાલકોની યાદી પણ તૈયાર કરી છે. ભારતમાં તેમના નજીકના અને સંબંધીઓ પર નજર રાખવા માટે આ યાદી પંજાબ સરકારને આપવામાં આવી છે.

ભારત વિરોધી પ્રચાર વધ્યો

ગુપ્તચર એજન્સીઓએ એમ પણ કહ્યું છે કે કેનેડાના વડાપ્રધાન જસ્ટિસ ટ્રુડોના ખાલિસ્તાન સમર્થકોના પક્ષમાં નિવેદન બાદ સરે, બ્રેમ્પટન અને વેનકુવરમાં ભારત વિરોધી પ્રચાર વધ્યો છે. એજન્સીઓએ માહિતી આપી છે કે ખાલિસ્તાની આતંકવાદી પ્રવૃત્તિને વેગ આપવા માટે કેનેડાના કેટલાંક શહેરોમાં ફરીથી લોકમત કરાવવાની તૈયારીઓ શરૂ કરી દેવામાં આવી છે.

આ સિવાય પંજાબમાં અમૃતપાલ સિંહની ધરપકડને લઈને કેનેડામાં ધર્મની આડમાં લોકોને ગેરમાર્ગે દોરવામાં આવી રહ્યા છે. પંજાબ પોલીસની ઇન્ટેલિજન્સ વિંગના એક અધિકારીના જણાવ્યા અનુસાર, કેનેડાના આઠ શહેરોમાં અને ત્યાંથી મુસાફરી કરી રહેલા ખાલિસ્તાનીઓના નજીકના સંબંધીઓ પર દેખરેખ શરૂ કરવામાં આવી રહી છે.

આ પણ વાંચો, મનીષ સિસોદિયાને સુપ્રીમ કોર્ટનો ઝટકો, કોર્ટે જામીન અરજી ફગાવી