- જલાલાબાદ શહેર અને આસપાસના વિસ્તારોમાં 400થી વધુ મકાનો નાશ પામ્યા
- જાનમાલના નુકસાનનો આંકડો હજુ વધવાની શક્યતા
કાબુલ, 17 જુલાઈ : અફઘાનિસ્તાનમાં ભારે વરસાદ અને કરા સાથે આવેલા તોફાનના કારણે 35 લોકોએ જીવ ગુમાવ્યા જ્યારે 230 લોકો ઘાયલ થયા છે. અહેવાલો અનુસાર, નાંગરહાર પ્રાંતના જલાલાબાદ શહેર અને આસપાસના વિસ્તારોમાં 400 થી વધુ મકાનો નાશ પામ્યા છે.
માહિતી અને સંસ્કૃતિ વિભાગે જાનમાલના નુકસાનની પુષ્ટિ કરી
માહિતી અને સાંસ્કૃતિક વિભાગે નાંગરહારના કેટલાક જિલ્લાઓમાં જાનમાલના નુકસાનની પુષ્ટિ કરી હતી. માહિતી આપતાં સરકારે કહ્યું કે કુદરતી આફત બાદ અસરગ્રસ્ત સમુદાયોના પુનર્વસન માટે જરૂરી સહાય પૂરી પાડવા માટે કાર્યવાહી કરવામાં આવી રહી છે. અતિવૃષ્ટિને કારણે થયેલા વિનાશથી પ્રભાવિત લોકોની વેદનાને દૂર કરવા અને ક્ષતિગ્રસ્ત માળખાકીય સુવિધાઓને પુનઃસ્થાપિત કરવા માટે નક્કર રાહત પગલાં લેવા માટે સતત પ્રયાસો કરવામાં આવી રહ્યા છે. પ્રારંભિક અહેવાલો અનુસાર અંદાજે ચારસો ઘરો ધરાશાયી થયા છે. જેના કારણે રહેવાસીઓ અને ધંધાર્થીઓને મોટું આર્થિક નુકસાન થયું છે. જો કે મીડિયા રિપોર્ટ્સ અનુસાર આ આંકડો હજુ વધી શકે છે.
આ પણ વાંચો : ઓમાનનું ઓઈલ ટેન્કર દરિયામાં પલટી ગયું, 13 ભારતીયો સહિત 16 ક્રૂ મેમ્બર લાપતા
સરકારે કહ્યું- દરેક જરૂરિયાતમંદને મદદ પહોંચાડવાના પ્રયાસો ચાલુ
અફઘાન મીડિયાના જણાવ્યા અનુસાર, અધિકારીઓ એ સુનિશ્ચિત કરવા પર ધ્યાન કેન્દ્રિત કરી રહ્યા છે કે દરેક જરૂરિયાતમંદને તેમને જરૂરી સહાય મળે. બચાવ અને પુનઃપ્રાપ્તિના પ્રયાસો ચાલુ છે, અને અસરગ્રસ્ત પરિવારો અને સમુદાયો માટે એકતા અને સમર્થન પર ભાર મૂકવામાં આવી રહ્યો છે. માહિતી આપતાં સરકારે કહ્યું કે નાંગરહાર પ્રાંતમાં થયેલા વિનાશએ એ પણ દર્શાવ્યું છે કે આપણે કુદરતી આફતોનો સામનો કરવા માટે કેટલા સંવેદનશીલ છીએ અને તેની અસરને ઘટાડવા માટે આપણે કેવી રીતે તાત્કાલિક કામ કરી શકીએ છીએ.
ગત વર્ષે પણ વરસાદ અને પૂરના કારણે તબાહી મચી હતી
2023માં પણ અફઘાનિસ્તાનમાં પૂર અને વરસાદના કારણે ભારે તબાહી મચી હતી. જેમાં અનેક લોકોએ જીવ ગુમાવ્યા હતા. દેશના નવ પ્રાંતોમાં સાડા સાતસોથી વધુ મકાનો ધરાશાયી થયા હતા.
આ પણ વાંચો : કેન્દ્ર સરકારે નીતિ આયોગનું પુનર્ગઠન કર્યું, જાણો કોણ અધ્યક્ષ અને સભ્યો બન્યા ?
