દોઢ વર્ષ અગાઉ અલ નીનોની આગાહી થશે, હવામાન સંબંધિત આફતોની આગોતરી સૂચના માટે નવું મોડલ તૈયાર

• હવામાન સંબંધિત આપત્તિઓના જોખમોને ટાળવામાં સફળતા પ્રાપ્ત થશે
• મોડલે 16થી 18 મહિના અગાઉથી સચોટ અનુમાનો આપ્યા

નવી દિલ્હી, 06 જુલાઈ : હવે આબોહવા અને આત્યંતિક હવામાન સંબંધિત આપત્તિઓના જોખમોને ટાળવામાં સફળતા પ્રાપ્ત થશે. સંશોધકોએ એક મોડેલ વિકસાવ્યું છે જે 18 મહિના અગાઉ અલ નીનો સધર્ન ઓસિલેશન (ENSO) જેવી ઘટનાઓની આગાહી કરી શકે છે.

એક્સટેન્ડેડ નોનલાઈનિયર રિચાર્જ ઓસીલેટર નામ અપાયું

મનોઆ ખાતેની હવાઈ યુનિવર્સિટીની સ્કૂલ ઑફ ઓશન એન્ડ અર્થ સાયન્સ એન્ડ ટેક્નોલોજી (SOEST)ના સંશોધકોએ આ મહત્ત્વની સિદ્ધિ હાંસલ કરી છે. અભ્યાસ સંબંધિત તારણો નેચર જર્નલમાં પ્રકાશિત કરવામાં આવ્યા છે. સંશોધકોએ નવા મોડલને એક્સટેન્ડેડ નોનલાઈનિયર રિચાર્જ ઓસીલેટર (XRO) મોડલ નામ આપ્યું છે. સંશોધકોના મતે આ મોડેલ અલ નીનોના ભૌતિકશાસ્ત્ર અને વૈશ્વિક મહાસાગરોમાં અન્ય આબોહવાની પેટર્ન સાથે તેની આંતરિક ક્રિયાપ્રતિક્રિયાઓ પર અસરકારક રીતે કામ કરે છે. આ મોડેલે 16થી 18 મહિના અગાઉથી સચોટ અનુમાનો આપ્યા છે.

આ પણ વાંચો : છેલ્લા 24 કલાકમાં રાજ્યના 131 તાલુકામાં મેઘરાજા મન મૂકીને વરસ્યા, ઉમરપાડામાં સૌથી વધુ 5 ઇંચ

ENSO દુષ્કાળ, પૂર, પાકને નુકસાન અને ખોરાકની અછતનું બને છે કારણ

સંશોધકો કહે છે કે AI મોડલ્સની પ્રકૃતિથી વિપરીત અમારું XRO મોડલ વિષુવવૃત્તીય પેસિફિક અને ઉષ્ણકટિબંધીય પેસિફિકની બહારના અન્ય આબોહવા પેટર્ન સાથે તેની આંતરિક ક્રિયાપ્રતિક્રિયાઓ વિશે પારદર્શક છે. સંશોધકોએ તેમના નિષ્કર્ષમાં જણાવ્યું હતું કે અલ નીનો સધર્ન ઓસિલેશન (ENSO) ભારત સહિત સમગ્ર એશિયા, પેસિફિક મહાસાગર અને અમેરિકામાં પવન, હવામાન અને સમુદ્રના તાપમાનમાં ફેરફાર લાવવા માટે જાણીતું છે. તે દુષ્કાળ, પૂર, પાકને નુકસાન અને ખોરાકની અછતનું કારણ બને છે.

ENSOની અસરથી અર્થવ્યવસ્થા નાશ પામે છે. વિશ્વએ વર્ષ 2023 અને મે 2024માં અલ નીનોની ઘટના અનુભવી હતી. સમગ્ર વિશ્વમાં હવામાન, આબોહવા, ઇકોસિસ્ટમ અને અર્થતંત્રો પર તેની ભારે અસર પડી હતી. આવી સ્થિતિમાં, સંશોધકોનું કહેવું છે કે નવું મોડલ વૈશ્વિક ક્લાઈમેટ મોડલની આગામી પેઢી માટે માર્ગ મોકળો કરશે, જે આબોહવા પરિવર્તનની અસરોની આગાહી કરવા અને તેને ઘટાડવાના અમારા અભિગમમાં સુધારો કરશે.

આ પણ વાંચો : ગગનયાન ક્યારે ભરશે ઉડાન? આવી ગયું મોટું અપડેટ; નાસા કરી રહ્યું છે મદદ