- વડાપ્રધાન પુષ્પ કમલ દહલ ‘પ્રચંડ’એ આ અઠવાડિયે તેમના બે મુખ્ય સત્તા ગઠબંધન ભાગીદારોનું સમર્થન ગુમાવ્યું
- વડાપ્રધાન પ્રચંડને માત્ર 63 સભ્યોનું સમર્થન, જ્યારે સરકારને ગૃહમાં વિશ્વાસ મત જીતવા માટે 138 મતોની જરૂર
નવી દિલ્હી, 06 જુલાઈ : નેપાળમાં છેલ્લા 16 વર્ષમાં 13 વખત સરકાર બની છે અને પડી ગઈ છે. જે દેશની નબળી રાજકીય વ્યવસ્થાનું નાજુક પાસું દર્શાવે છે. દેશના વર્તમાન વડાપ્રધાન પુષ્પ કમલ દહલ ‘પ્રચંડ’એ આ અઠવાડિયે તેમના બે મુખ્ય સત્તા ગઠબંધન ભાગીદારોનું સમર્થન ગુમાવ્યું છે. જે બાદ એવી જાહેરાત કરવામાં આવી હતી કે વડાપ્રધાન પ્રચંડ ગુરુવાર 12 જુલાઈએ સંસદમાં વિશ્વાસ મત મેળવવા માટે તૈયાર છે.
વડાપ્રધાન પ્રચંડે વિશ્વાસ મતનો વિકલ્પ પસંદ કર્યો
મળતી માહિતી મુજબ, વડાપ્રધાન પ્રચંડે સંસદ સચિવાલયને એક પત્ર મોકલ્યો છે, જેમાં મતદાનની વ્યવસ્થા કરવા માટે કહેવામાં આવ્યું છે. વડાપ્રધાન દહલે દેશના બંધારણના અનુચ્છેદ 100(2) હેઠળ વિશ્વાસના મત માટે જવાનું પસંદ કર્યું છે, જે જણાવે છે કે ‘વડાપ્રધાન જે રાજકીય પક્ષનું પ્રતિનિધિત્વ કરે છે તે વિભાજિત થઈ જાય અથવા ગઠબંધન સરકારમાંનો કોઈપણ રાજકીય પક્ષ પોતાનો ટેકો પાછો ખેંચી લે તો, વડાપ્રધાને 30 દિવસની અંદર સંસદમાં વિશ્વાસ મત માટે પ્રસ્તાવ રજૂ કરવો પડશે.
આ પણ વાંચો : દરેક જીલ્લામાં પક્ષના કાર્યાલયનું નિર્માણ થાય તે માટે વડાપ્રધાનનો સંકલ્પ ગુજરાતમાં મહંદઅંશે પુર્ણ થયો : સી.આર.પાટીલ
વડાપ્રધાન પ્રચંડે રાજીનામું આપવાની ના પાડી દીધી હતી
અગાઉ વડાપ્રધાન પ્રચંડે જાહેરાત કરી હતી કે તેઓ સૌથી મોટા પક્ષમાંથી આઠ કેબિનેટ પ્રધાનોના રાજીનામાને પગલે પદ છોડશે નહીં અને તેના બદલે સંસદમાં વિશ્વાસ મતનો સામનો કરશે. તેમણે નેપાળી કોંગ્રેસ (NC)ના પ્રમુખ શેર બહાદુર દેઉબા અને કોમ્યુનિસ્ટ પાર્ટી ઓફ નેપાળ-યુનિફાઈડ માર્ક્સિસ્ટ લેનિનિસ્ટ (CPN UML)ના પ્રમુખ કે.ની હાજરીમાં આ જાહેરાત કરી હતી.
નેપાળની સંસદમાં બેઠકોનું સમીકરણ શું છે?
નેપાળના 275-સભ્ય ગૃહ (HoR)માં સૌથી મોટી પાર્ટી નેપાળી કોંગ્રેસ પાસે 89 બેઠકો છે, જ્યારે CPN-UML પાસે 78 બેઠકો છે. વડાપ્રધાન પ્રચંડની પાર્ટી, કોમ્યુનિસ્ટ પાર્ટી ઓફ નેપાળ-માઓઇસ્ટ સેન્ટર (CPN MC) પાસે 32 બેઠકો છે. તે જ સમયે, CPN-Unified Socialist (CPN-US), જે નીચલા ગૃહમાં 10 બેઠકો ધરાવે છે, તેણે કહ્યું છે કે તે પ્રચંડના નેતૃત્વવાળી સરકારની તરફેણમાં મતદાન કરશે. આમ છતાં વડાપ્રધાન પ્રચંડને સંસદના માત્ર 63 સભ્યોનું સમર્થન છે. જ્યારે સરકારને ગૃહમાં વિશ્વાસ મત જીતવા માટે 138 મતોની જરૂર છે.
આ પણ વાંચો : અમિત શાહ આજથી બે દિવસીય ગુજરાત પ્રવાસે, જાણો તેમનો સંપૂર્ણ કાર્યક્રમ
