ભારતીય ટીમની જીત પછી હાર્દિક પંડ્યા ઈચ્છે છે આ બાબતમાં સુધારો, કહ્યું- ‘આપણે આના પર ધ્યાન આપવાની જરુર’

• ભારતીય ટીમે સુપર 8માં બાંગ્લાદેશ સામે રમાયેલી મેચમાં 50 રને જીત મેળવી
• આ મેચમાં ટીમ ઈન્ડિયા તરફથી હાર્દિક પંડ્યાનું ઓલરાઉન્ડ પ્રદર્શન જોવા મળ્યું
• હાર્દીક પંડ્યાએ બેટથી અડધી સદી ફટકાર્યા બાદ બોલિંગમાં પણ એક વિકેટ ઝડપી

HD ન્યૂઝ ડેસ્ક, 23 જૂન: T20 વર્લ્ડ કપ 2024માં ભારતીય ટીમ અત્યાર સુધી જીતતી આવી છે, ત્યાર સુપર 8 રાઉન્ડમાં બાંગ્લાદેશ સામેની બીજી મેચ પણ ટીમ ઈન્ડિયાએ 50 રનેથી જીતી લીધી છે. આ મેચમાં ટીમ ઈન્ડિયાની જીતમાં સૌથી મહત્વની ભૂમિકા સ્ટાર ઓલરાઉન્ડર હાર્દિક પંડ્યાએ ભજવી હતી. IPL 2024 દરમિયાન પોતાની રમત માટે ટીકાનો શિકાર બનેલા અને આ ટીમમાં તેના સ્થાનને લઈને એક સમયે શંકાની નજરે જોવામાં આવતા હાર્દિકે અત્યાર સુધી આ ટૂર્નામેન્ટમાં બોલ અને બેટથી પોતાના પ્રદર્શન દ્વારા તમામ ટીકાકારોને જવાબ આપવાનું કામ કર્યું છે . બાંગ્લાદેશ સામેની મેચમાં શાનદાર પ્રદર્શન કરવા બદલ હાર્દિકને પ્લેયર ઓફ ધ મેચનો એવોર્ડ આપવામાં આવ્યો હતો, ત્યારબાદ તેણે પોતાના નિવેદનમાં એક વાત અંગે ચિંતા વ્યક્ત કરી હતી.

આપણી ટીમે સતત વિકેટ ગુમાવવાનું ટાળવું પડશે: હાર્દિક પંડ્યા

હાર્દિક પંડ્યાએ બાંગ્લાદેશ સામેની મેચમાં એવા સમયે 50 રનની અણનમ ઇનિંગ રમી જ્યારે ટીમની સ્થિતિ થોડી ગંભીર દેખાઈ રહી હતી. હાર્દિકની ઈનિંગના કારણે આ મેચમાં પ્રથમ બેટિંગ કરવા ઉતરેલી ભારતીય ટીમ 20 ઓવરમાં 196 રન બનાવી શકી હતી. બાદમાં હાર્દિકે બોલ વડે લિટન દાસની મહત્વની વિકેટ પણ લીધી હતી. આ મેચમાં હાર્દિકને પ્લેયર ઓફ ધ મેચનો એવોર્ડ પણ મળ્યો હતો, ત્યારબાદ તેણે પોતાના નિવેદનમાં કહ્યું હતું કે અમે આ મેચમાં ખૂબ જ સારું રમ્યા જેમાં બધાએ સાથે મળીને પોતપોતાની યોજનાને અંજામ આપ્યો. બોલિંગ કરતી વખતે, હું સમજી ગયો કે બેટ્સમેનો હવાનો ઉપયોગ કરવા માટે તે બાજુ શોટ રમવા માગે છે અને મારો પ્રયાસ એ હતો કે તેમને તે સ્થિતિમાં બોલિંગ ન કરવી કારણ કે આવી પરિસ્થિતિઓમાં તેમનાથી એક પગલું આગળ રહેવું પડશે. અમારે સતત વિકેટ ગુમાવવાથી બચવાનો પ્રયાસ કરવો પડશે, તે સિવાય અમે સારું પ્રદર્શન કરી રહ્યા છીએ.

હું મારી જાતને ભાગ્યશાળી માનું છું: હાર્દિક પંડ્યા

પોતાના નિવેદનમાં હાર્દિક પંડ્યાએ વધુમાં કહ્યું કે હું મારી જાતને ભાગ્યશાળી માનું છું કે મને દેશ માટે રમવાનો મોકો મળ્યો કારણ કે મને એક વિચિત્ર ઈજા થઈ હતી. હું મેદાનમાં પાછા ફરવા માંગતો હતો, પરંતુ કદાચ મારા નસીબમાં કંઈક બીજું હતું. મેં આ વિશે રાહુલ દ્રવિડ સાથે પણ વાત કરી હતી અને તેમણે મને કહ્યું હતું કે જેઓ સખત મહેનત કરે છે, નસીબ પણ તેમની સાથે રહે છે અને આ અત્યાર સુધી મારી સાથે રહ્યું છે.

આ પણ વાંચો: કુસ્તીબાજ બજરંગ પુનિયાને વધુ એક વખત ફટકો, જાણો કારણ