AAPને વિદેશમાંથી કરોડોનું ગેરકાયદે ભંડોળ મળ્યું, EDનો મોટો દાવો

નવી દિલ્હી, 20 મે: દિલ્હીની વિવાદાસ્પદ લિકર પોલિસી હોય કે સ્વાતિ માલીવાલ કેસ… AAPની મુશ્કેલીઓ ઓછી થવાના કોઈ સંકેત દેખાતા નથી. હવે EDએ પોતાના તપાસ રિપોર્ટમાં પાર્ટીના વિદેશી ફંડિંગને લઈને મોટો ખુલાસો કર્યો છે. EDએ આમ આદમી પાર્ટીના વિદેશી ફંડિંગની સંપૂર્ણ તપાસ રિપોર્ટ કેન્દ્રીય ગૃહ મંત્રાલયને સોંપી દીધી છે. રિપોર્ટ અનુસાર AAPને 2014-2022 દરમિયાન 7.08 કરોડ રૂપિયાનું વિદેશી દાન મળ્યું હતું.

EDએ પોતાના તપાસ રિપોર્ટમાં આમ આદમી પાર્ટી પર FCRA, RPA અને IPCના નિયમોનું ઉલ્લંઘન કરવાનો આરોપ લગાવ્યો છે. આ તપાસ રિપોર્ટમાં આમ આદમી પાર્ટીને વિદેશી ફંડિંગ આપનારાઓની ઓળખ અને રાષ્ટ્રીયતા સાથે અન્ય તમામ જરૂરી દસ્તાવેજો પણ જોડવામાં આવ્યા છે, જે આમ આદમી પાર્ટી માટે એક નવી મુશ્કેલીનો સંકેત આપી રહ્યા છે.

AAP ક્યાંથી મળ્યું દાન?

AAPના વિદેશી ભંડોળની તપાસ કરતી વખતે, EDએ કહ્યું છે કે પાર્ટીને યુનાઇટેડ સ્ટેટ્સ ઑફ અમેરિકાથી, કેનેડા, ઑસ્ટ્રેલિયા, ન્યુઝીલેન્ડ, સાઉદી અરેબિયા, સંયુક્ત આરબ અમીરાત, કુવૈત, ઓમાન અને અન્ય દેશોમાંથી ઘણા દાતાઓ પાસેથી પૈસા મળ્યા છે. લોકોએ ફંડ ટ્રાન્સફર કરવા માટે એક જ પાસપોર્ટ નંબર, ક્રેડિટ કાર્ડ, ઈમેલ આઈડી અને મોબાઈલ નંબરનો ઉપયોગ કર્યો છે.

આ સમયગાળા દરમિયાન, EDએ તેની તપાસમાં AAP અને તેના નેતાઓ દ્વારા વિદેશી ભંડોળ એકત્ર કરવામાં અનિયમિતતાના ઘણા કેસોનો ઉલ્લેખ કર્યો છે. જેમાં પાર્ટીના ધારાસભ્ય દુર્ગેશ પાઠક અને અન્ય નેતાઓ પર 2016માં કેનેડામાં ફંડ રેઈઝિંગ દ્વારા એકત્ર કરાયેલા નાણાંમાંથી અંગત લાભ લેવાનો પણ આરોપ છે.

દાતાઓની છુપી ઓળખ

આમ આદમી પાર્ટીના વિદેશી દાન અંગે ED દ્વારા આપવામાં આવેલી માહિતી અનુસાર, અમેરિકા અને કેનેડામાં ફંડ રેઇડિંગ અભિયાન દ્વારા માત્ર પૈસા એકત્ર કરવામાં આવ્યા ન હતા, પરંતુ વિદેશી ભંડોળ પર FCR હેઠળ લાદવામાં આવેલા નિયંત્રણોથી બચવા માટે AAPએ એકાઉન્ટ બુકમાં ફેરફાર કર્યો હતો. અસલી દાન આપનારાઓની ઓળખ પણ છુપાવવામાં આવી છે, જેના કારણે પાર્ટીની મુસીબતો વધુ વધી શકે છે.

કુમાર વિશ્વાસનું પણ નામ

મીડિયા રિપોર્ટ્સ અનુસાર, તપાસ એજન્સીએ દાવો કર્યો છે કે તેને આ માહિતી AAP સ્વયંસેવકો અને કાર્યકર્તાઓ વચ્ચે ઈમેલ એક્સચેન્જથી મળી છે. તેમાં અનિકેત સક્સેના (AAP ઓવરસીઝ ઈન્ડિયાના સંયોજક), કુમાર વિશ્વાસ (તત્કાલીન AAP ઓવરસીઝ ઈન્ડિયાના સંયોજક), કપિલ ભારદ્વાજ (તત્કાલીન AAP સભ્ય) અને દુર્ગેશ પાઠકના ઈમેલનો પણ સમાવેશ થાય છે.

EDએ ગૃહ મંત્રાલયને મહત્ત્વની માહિતી આપી

એવું કહેવામાં આવી રહ્યું છે કે EDએ કેન્દ્રીય ગૃહ મંત્રાલયને તેની તપાસ વિશે બધું જણાવી દીધું છે. તેમાં દાતાઓના નામ સાથે તેમની વિગતો, દાતાનો દેશ, પાસપોર્ટ નંબર, કુલ રકમ, દાનની પ્રક્રિયા અને રકમ પ્રાપ્ત કરનારનું બેંક એકાઉન્ટ પણ સામેલ છે. આ સિવાય બિલિંગનું નામ, બિલનું સરનામું, બિલ પર હાજર ટેલિફોન નંબર, બિલિંગ ઈમેલ, પૈસા મોકલવાનો સમય, ભંડોળ વિતરણની તારીખ અને ચુકવણીની પદ્ધતિ વગેરેનો સમાવેશ થાય છે. EDએ મંત્રાલયને કહ્યું છે કે તેને મની લોન્ડરિંગ કેસની તપાસ દરમિયાન આ તમામ માહિતી મળી છે.

ED અનુસાર, વિદેશમાં રહેતા 155 લોકોએ 55 પાસપોર્ટ નંબરનો ઉપયોગ કરીને 404 પ્રસંગોએ કુલ રૂ. 1.02 કરોડનું દાન આપ્યું હતું. આ સિવાય 71 દાતાઓએ 21 મોબાઈલ નંબરનો ઉપયોગ કરીને 256 પ્રસંગોએ આમ આદમી પાર્ટીને કુલ 99.90 લાખ રૂપિયાનું દાન આપ્યું છે. એ જ રીતે વિદેશમાં રહેતા 75 દાતાઓએ 15 ક્રેડિટ કાર્ડનો ઉપયોગ કરીને 148 પ્રસંગોએ રૂ. 19.92 લાખનું દાન આપ્યું હતું. EDએ કહ્યું છે કે કેનેડામાં રહેતા 19 લોકોના ઈમેલ આઈડી અને મોબાઈલ નંબરનો ઉપયોગ કરીને AAPને 51.15 લાખ રૂપિયા દાનમાં આપવામાં આવ્યા છે.

આ પણ વાંચો :આ દેશમાં ‘અંતિમ સંસ્કાર’ બન્યા મોંઘા, લોકો પોતાના જ સ્વજનોની લાશને ઓળખવાનો કરી રહ્યા છે ઇન્કાર