સંજય નિરૂપમે કર્યા PM મોદીના વખાણ, જાણો કઈ બેઠક ઉપર કર્યો દાવો
નવી મુંબઈ, 4 એપ્રિલ : લોકસભા ચૂંટણી પહેલા કોંગ્રેસે પાર્ટીના વરિષ્ઠ નેતા સંજય નિરુપમ વિરુદ્ધ મોટી કાર્યવાહી કરી અને તેમને 6 વર્ષ માટે હાંકી કાઢ્યા હતા. પાર્ટી વિરોધી ગતિવિધિઓને કારણે સંજય નિરુપમ વિરુદ્ધ આ કાર્યવાહી કરવામાં આવી છે. કોંગ્રેસમાંથી હાંકી કાઢવાના એક દિવસ બાદ પૂર્વ સાંસદ સંજય નિરુપમે દેશની સૌથી જૂની પાર્ટી પર નિશાન સાધ્યું અને દાવો કર્યો કે પાર્ટી નેતૃત્વમાં જબરદસ્ત ઘમંડ છે. સંજય નિરુપમે રાજીનામું આપી દીધું છે, આ સાથે જ સંજયનું આગળનું પગલું શું હશે તે અંગે અટકળોનું બજાર ગરમ થઈ ગયું છે. એકનાથ શિંદેની શિવસેના કે ભાજપ… તેઓ કયા રસ્તે જશે?
નિરુપમ કઈ સીટ પર દાવેદારી કરી રહ્યા છે?
પ્રેસ કોન્ફરન્સને સંબોધિત કરતી વખતે સંજયે ‘જય શ્રી રામ’થી શરૂઆત કરી હતી. સંજય નિરુપમે એક ખૂબ જ મહત્વપૂર્ણ પંક્તિ પણ કહી, જેણે બધાનું ધ્યાન ખેંચ્યું હતું. નિરુપમે કહ્યું કે, આપણા દેશમાં સોનાની કિંમત અને પીએમ મોદીની લોકપ્રિયતા સતત વધી રહી છે. સંજય નિરુપમે એમ પણ કહ્યું કે તેઓ ચૂંટણી લડશે અને માત્ર મુંબઈ ઉત્તર પશ્ચિમ લોકસભા બેઠક પરથી જ ચૂંટણી લડશે. તેમણે એમ પણ કહ્યું કે તેઓ સ્વતંત્ર રીતે નહીં પરંતુ પાર્ટીના ચિન્હ પર ચૂંટણી લડશે.
સંજય શુભ મુહૂર્તની રાહ જોઈ રહ્યા છે
સંજય નિરુપમે કહ્યું કે અત્યારે સમય યોગ્ય નથી, તેથી તેઓ નવરાત્રિની રાહ જોઈ રહ્યા છે કે ક્યારે તેઓ તેમની ભવિષ્યની યોજનાઓ જાહેર કરશે. નિરુપમની નજર મુંબઈ ઉત્તર પશ્ચિમ લોકસભા સીટ પર છે. નિરુપમે કોંગ્રેસ છોડી દીધી છે અને તેથી તેમની MVAમાં જોડાવાની કોઈ શક્યતા નથી. હવે મહાગઠબંધનમાં ત્રણ પક્ષો છે, ભાજપ, એકનાથ શિંદેની શિવસેના અને અજિત પવારની એનસીપી. સીટ શેરિંગ ફોર્મ્યુલામાં મુંબઈની નોર્થ વેસ્ટ લોકસભા સીટ સીએમ એકનાથ શિંદેની પાર્ટી શિવસેના પાસે છે.
‘કોંગ્રેસને કાટ લાગ્યો છે, પાર્ટી નેતૃત્વમાં જબરદસ્ત ઘમંડ છે’
સંજય નિરુપમે દાવો કર્યો હતો કે કોંગ્રેસ હવે ઈતિહાસ છે, તેનું કોઈ ભવિષ્ય નથી અને મહાવિકાસ અઘાડી ત્રણ બીમાર એકમોનું વિલીનીકરણ છે. તેમણે કહ્યું કે કોંગ્રેસમાં 5 પાવર સેન્ટર છે. સોનિયા ગાંધી, રાહુલ ગાંધી, પ્રિયંકા ગાંધી, AICC પ્રમુખ મલ્લિકાર્જુન ખડગે અને પાર્ટીના મહાસચિવ કેસી વેણુગોપાલ. તેમણે દાવો કર્યો હતો કે કોંગ્રેસના સાંસદ રાહુલ ગાંધી એવા લોકોથી ઘેરાયેલા છે જેમનો પાયાના સ્તર સાથે કોઈ સંબંધ નથી. તેમણે આરોપ લગાવ્યો કે પાર્ટીનું નેતૃત્વ જૂનું અને નકામું થઈ ગયું છે. મહારાષ્ટ્ર પાર્ટીના અધ્યક્ષ નાના પટોલે અને વેણુગોપાલ પર નિશાન સાધતા નિરુપમે દાવો કર્યો કે કોંગ્રેસને હવે કાટ લાગી ગયો છે અને પાર્ટી નેતૃત્વમાં જબરદસ્ત ઘમંડ છે.
ઉદ્ધવે મુંબઈ નોર્થ વેસ્ટ સીટ પરથી ઉમેદવાર ઉભા રાખ્યા
સૂત્રોના જણાવ્યા અનુસાર શિંદેની શિવસેના હજુ પણ આ બેઠક પરથી ઉમેદવારની શોધમાં છે. ઉદ્ધવ ઠાકરે આ બેઠક પરથી અમોલ કીર્તિકરને ઉમેદવાર જાહેર કરી ચૂક્યા છે. શિવસેનાને ઉદ્ધવ જૂથ સામે ચૂંટણી લડવા માટે મજબૂત ઉમેદવારની જરૂર છે. ત્યારે મુંબઈ ઉત્તર પશ્ચિમ બેઠક પર મરાઠી મતદારોનો મજબૂત આધાર છે. નિરુપમ એક મજબૂત ઉત્તર ભારતીય ચહેરો છે. જો કે, તે વિસ્તારમાં પણ નોંધપાત્ર લોકપ્રિયતા ધરાવે છે.
