CAA વિરુદ્ધ સુપ્રીમ કોર્ટમાં 237 અરજીઓ, CJI આજે કરશે સુનાવણી
- કેન્દ્ર સરકાર દ્વારા 11 માર્ચના રોજ દેશમાં CAAનો કાયદો લાગુ કરવામાં આવ્યો
- કાયદા મુજબ પાકિસ્તાન, અફઘાનિસ્તાન અને બાંગ્લાદેશના લઘુમતીઓને ભારતીય નાગરિકતા આપવાની જોગવાઈ
નવી દિલ્હી, 19 માર્ચ: નાગરિકતા સંશોધન અધિનિયમ (CAA)ના અમલીકરણ સાથે, તેની સામે વિરોધના ભણકારા પણ ઝડપથી પડી રહ્યા છે. CAA વિરુદ્ધ સુપ્રીમ કોર્ટમાં અરજીઓ પણ દાખલ કરવામાં આવી છે. આ કેસોની સુનાવણી આજે મંગળવારથી સુપ્રીમ કોર્ટમાં શરૂ થશે. ભારતના મુખ્ય ન્યાયાધીશ (CJI) DY ચંદ્રચુડ પોતે આ અરજીઓ પર સુનાવણી કરશે. તેમની સાથે બેંચમાં અન્ય બે જજ પણ હશે. દેશની સર્વોચ્ચ અદાલતમાં આ મામલે કુલ 237 અરજીઓ દાખલ કરવામાં આવી છે.
નાગરિકતા સંશોધન કાયદો(CAA) 11 ડિસેમ્બર 2019ના રોજ સંસદ દ્વારા પસાર કરવામાં આવ્યો હતો, તે સમયે પણ તેના સંબંધમાં ઘણી અરજીઓ દાખલ કરવામાં આવી હતી. આ વર્ષે 11 માર્ચે કેન્દ્ર સરકારે CAAના નિયમોને જાહેર કર્યા હતા. તે પછી પણ કેટલીક અરજીઓ દાખલ કરવામાં આવી હતી અને વહેલી સુનાવણીની વિનંતી કરવામાં આવી હતી. આ તમામ અરજીઓમાં CAAને ધર્મના આધારે અને બંધારણની વિરુદ્ધ ભેદભાવપૂર્ણ ગણાવવામાં આવ્યો છે.
CAA પર સરકારની શું દલીલ છે?
ગયા મંગળવારે, કેન્દ્ર સરકાર દ્વારા નાગરિકતા સંશોધન કાયદાને લઈને એક નિવેદન બહાર પાડવામાં આવ્યું હતું, જેમાં CAA અંગે મુસ્લિમ સમાજમાં પ્રવર્તતી અનિશ્ચિતતાઓ વિશે વિગતવાર ચર્ચા કરવામાં આવી હતી. જેના પર ગૃહ મંત્રાલયે સ્પષ્ટ કર્યું છે કે, CAAને કારણે કોઈપણ ભારતીય પોતાની નાગરિકતા ગુમાવશે નહીં. ભારતીય મુસ્લિમોને ચિંતા કરવાની કોઈ જરૂર નથી કારણ કે નાગરિકતા સંશોધન કાયદો તેમની નાગરિકતા પર અસર કરશે નહીં. તેઓ હિંદુ સમાજની તર્જ પર સમાન અધિકારના હકદાર છે.
કોઈ દસ્તાવેજો રજૂ કરવાના રહેશે નહીં
ગૃહ મંત્રાલયે કહ્યું કે, આ કાયદા પછી કોઈપણ ભારતીય નાગરિકને તેની નાગરિકતા સાબિત કરવા માટે કોઈ દસ્તાવેજ રજૂ કરવા માટે કહેવામાં આવશે નહીં. “ભારતીય મુસ્લિમોએ ચિંતા કરવાની જરૂર નથી કારણ કે CAA તેમની નાગરિકતાને અસર કરે તેવી કોઈ જોગવાઈ કરતું નથી અને વર્તમાન 18 કરોડ ભારતીય મુસ્લિમો સાથે કોઈ લેવાદેવા નથી કે જેમને તેમના હિંદુ સમકક્ષો જેવા જ અધિકારો છે.”
આ પણ જુઓ: Breaking News : કોંગ્રેસના રોહન ગુપ્તાએ અમદાવાદ પૂર્વથી ચૂંટણી નહીં લડવાની કરી જાહેરાત
