- આરોગ્યમંત્રી વીણા જ્યોર્જના નેતૃત્વમાં બેઠક
- કેટલીક ગાઈડલાઈન્સ બહાર પાડવામાં આવી
- વૃદ્ધો, ગંભીર બીમારીવાળા લોકો અને ગર્ભવતીઓ માટે માસ્ક પહેરવાનું ફરજિયાત
દેશમાં એકતરફ કોરોના સામે કાબુ મેળવવા કેન્દ્ર સરકાર પ્લાન બનાવી રહી છે ત્યારે દક્ષિણ ભારતમાં કોરોનાએ હાહાકાર મચાવ્યો છે. છેલ્લા 24 કલાકમાં કેરળમાં કોરોનાના 1801 નવા કેસ નોંધાયા છે. જેના કારણે સરકાર એક્શનમાં આવી ગઈ છે. કેરળના આરોગ્ય મંત્રી વીણા જ્યોર્જે કહ્યું કે એર્નાકુલમ, તિરુવનંતપુરમ અને કોટ્ટાયમ જિલ્લામાં સૌથી વધુ કોવિડ કેસ નોંધાયા છે. હવે ફરી એકવાર રાજ્ય સરકાર કોવિડને લઈને એલર્ટ મોડ પર આવી છે.
મોટાભાગના દર્દીઓ હોમ ક્વોરોન્ટાઈન
સરકારે તાકીદે એક્શન લેવાનું શરૂ કરી દીધું છે. ટેસ્ટિંગમાં વધારો કરવામાં આવ્યો છે. જો કે હોસ્પિટલમાં દાખલ દર્દીઓની સંખ્યા ઓછી છે. કુલ દર્દીઓમાંથી માત્ર 0.8 ટકાને ઓક્સિજન બેડ અને 1.2 ટકાને આઈસીયુ બેડની જરૂર પડી હતી. આ ઉપરાંત કોવિડની સ્થિતિની સમીક્ષા કરવા માટે આરોગ્ય મંત્રી વીણા જ્યોર્જના નેતૃત્વમાં એક બેઠક યોજાઈ હતી. આ બેઠકમાં કોરોનાને લઈને ઘણા મહત્વપૂર્ણ નિર્ણયો લેવામાં આવ્યા હતા. કોવિડ-19ને કારણે 60 વર્ષથી વધુ ઉંમરના લોકો અને ડાયાબિટીસ, હાઈ બ્લડ પ્રેશરના દર્દીઓના મૃત્યુના મોટાભાગના કેસો સામે આવી રહ્યા છે. તે જ સમયે, જીનોમ સિક્વન્સિંગ માટે મોકલવામાં આવેલા મોટાભાગના નમૂનાઓમાં ઓમિક્રોન વેરિઅન્ટ જોવા મળ્યું છે.
વૃદ્ધ, બાળકો, ગર્ભવતીઓ માટે માસ્ક ફરજિયાત
આરોગ્ય મંત્રીનું કહેવું છે કે કેન્દ્ર સરકારની સૂચના મુજબ મોકડ્રીલ કરવામાં આવી રહી છે. કોવિડના 85 ટકા મૃત્યુ 60 વર્ષથી વધુ ઉંમરના લોકોમાં થયા છે. તે જ સમયે, એવા 15 ટકા લોકો હતા જેઓ કોઈ ગંભીર બીમારીથી પીડિત હતા. બેઠકમાં કહેવામાં આવ્યું હતું કે વૃદ્ધો, ગંભીર બીમારીવાળા લોકો અને ગર્ભવતી મહિલાઓ માટે માસ્ક પહેરવાનું ફરજિયાત કરવામાં આવ્યું છે.
