દિલ્હી વિધાનસભામાં મંગળવારે બજેટ રજૂ કરવામાં આવશે નહીં. આ અંગે દિલ્હીના સીએમ અરવિંદ કેજરીવાલે ટ્વીટ કરીને માહિતી આપી છે. કેન્દ્રની ભાજપ સરકાર પર પ્રહાર કરતા દિલ્હીના મુખ્યમંત્રીએ કહ્યું કે ભારતના ઈતિહાસમાં પહેલીવાર એવું બન્યું છે કે દિલ્હી સરકારનું બજેટ મંગળવારે રજૂ થવાનું હતું અને સોમવારે સાંજે કેન્દ્ર સરકારે બજેટ નહીં રજૂ કરવાનું કહ્યું છે. સીએમ કેજરીવાલે કહ્યું કે આ તો ગુંડાગીરી ચાલી રહી છે.
ટ્રાન્સપોર્ટ સેક્ટરમાં સૌથી વધુ ખર્ચ થયોઃ નાણામંત્રી
ગૃહમાં આર્થિક સર્વેક્ષણ રજૂ કરતી વખતે નાણાપ્રધાન કૈલાશ ગેહલોતે જણાવ્યું હતું કે સરકાર દિલ્હીને સર્વસમાવેશક, તમામ માટે સમાન સુવિધા અને વધુ સારી રહેવાની ક્ષમતા ધરાવતું વિશ્વ કક્ષાનું શહેર બનાવવા અને નાગરિકોની આકાંક્ષાઓને પૂર્ણ કરવાના ઉદ્દેશ્ય સાથે કામ કરી રહી છે. 2022-23 માં યોજના, કાર્યક્રમ અને પ્રોજેક્ટ બજેટ ફાળવણીમાં પરિવહન ક્ષેત્રને ટોચની અગ્રતા આપવામાં આવી છે અને કુલ બજેટના 20 ટકા આ ક્ષેત્રને ફાળવવામાં આવ્યા છે, ત્યારબાદ શિક્ષણ ક્ષેત્ર 17 ટકા, પાણી પુરવઠા અને સ્વચ્છતા 15 ટકા અને બજેટના 13 ટકા મેડિકલ અને પબ્લિક હેલ્થ માટે ફાળવવામાં આવ્યા હતા.
ગત વર્ષે રૂ.75,800 કરોડનું બજેટ રજૂ કર્યું હતું
દિલ્હી સરકારે વર્ષ 2022-23 માટે રૂ. 75,800 કરોડનું બજેટ રજૂ કર્યું હતું, જેમાં સરકારની યોજનાઓ, કાર્યક્રમો અને પ્રોજેક્ટ માટે રૂ. 43,600 કરોડની ફાળવણી કરવામાં આવી હતી. આ ફાળવણી બજેટ અંદાજના આધારે 2021-22 માટે રૂ. 37,800 કરોડ કરતાં રૂ. 5,800 કરોડ વધુ હતી. સરકારની પહેલથી 2021 સુધીમાં દિલ્હીમાં જંગલો અને વૃક્ષોથી ઘેરાયેલો વિસ્તાર વધ્યો છે. હવે આ વિસ્તાર 342 ચોરસ કિલોમીટર થઈ ગયો છે. તેના કારણે આ વિસ્તારમાં જંગલોનો હિસ્સો વધીને 23.06 ટકા થયો છે. ફોરેસ્ટ કવર રિપોર્ટ 2021 મુજબ, સાત મોટા શહેરોમાં દિલ્હીમાં સૌથી વધુ 194.24 ચોરસ કિમીનું જંગલ આવરણ છે, ત્યારબાદ મુંબઈ 110.77 ચોરસ કિમી અને બેંગ્લોર 89.02 ચોરસ કિમી છે.
વિદેશી પ્રવાસીઓ મામલે દિલ્હી ત્રીજા ક્રમે
દિલ્હીમાં બાંધકામ ક્ષેત્રની આવક 2011-12માં રૂ. 18,907 કરોડથી વધીને 2022-23માં રૂ. 39,897 કરોડ થશે. વિદેશી અને સ્થાનિક પ્રવાસીઓ માટે દિલ્હી મુખ્ય શહેર છે. ઈન્ડિયા ટુરિઝમ સ્ટેટિસ્ટિક્સ એટ અ ગ્લાન્સ 2022 મુજબ, 2021માં કુલ વિદેશી પ્રવાસીઓના આગમનમાં દિલ્હી 9.50 ટકાના હિસ્સા સાથે ત્રીજા ક્રમે હતું.
