કેન્દ્રીય આરોગ્ય મંત્રાલય સમગ્ર દેશમાં AIIMSમાં કેન્દ્રીય ભરતી કરવા પર વિચાર કરી રહ્યું છે. આ નિમણૂંકો શૈક્ષણિક અને બિન-શૈક્ષણિક બંને સ્તરે હશે. જણાવી દઈએ કે દેશમાં નવા ખોલવામાં આવેલા AIIMSમાં સ્ટાફની અછત એક મોટી સમસ્યા છે. આ જ કારણ છે કે કેન્દ્ર સરકાર પોતે આ સંસ્થાઓમાં નિમણૂકો કરવાની શક્યતાઓ પર વિચાર કરી રહી છે. હાલમાં, AIIMS સંસ્થાઓ પોતે જ પોતાના સ્તરે કર્મચારીઓની નિમણૂક કરે છે.
સરકારે કમિટીની રચના કરી
AIIMSમાં કેન્દ્ર સરકાર દ્વારા સ્ટાફની નિમણૂકની શક્યતાઓ પર વિચાર કરવા માટે એક સમિતિની રચના કરવામાં આવી છે, જેમાં નીતિ આયોગના સભ્ય ડૉ. વી.કે. પૉલ, અધિક સચિવ, પ્રધાન મંત્રી સ્વાસ્થ્ય સુરક્ષા યોજના, આરોગ્ય મંત્રાલયના અધિકારીઓ, AIIMS, નવી દિલ્હીના ડિરેક્ટરનો સમાવેશ થાય છે. ઉલ્લેખનીય છે કે, 8 જાન્યુઆરીએ AIIMS ભુવનેશ્વરમાં સેન્ટ્રલ ઈન્સ્ટિટ્યૂટ બોડી (CIB)ની બેઠક મળી હતી, જેમાં વિવિધ AIIMSમાં ફેકલ્ટી અને અન્ય કર્મચારીઓની ઝડપથી નિમણૂક કરવા પર ચર્ચા થઈ હતી. આ બેઠકમાં AIIMS સંસ્થાઓમાં કેન્દ્રીય સ્તરે કર્મચારીઓની નિમણૂક પર વિચારણા કરવામાં આવી હતી. આ અંગે 28 ફેબ્રુઆરીના રોજ એક સમિતિની રચના કરવામાં આવી હતી.
AIIMS સ્ટાફની અછતનો સામનો કરી રહી છે
મહત્વનું છે કે દેશની 18 નવી AIIMSમાં લગભગ 44 ટકા ફેકલ્ટીની જગ્યાઓ ખાલી છે. AIIMS રાજકોટમાં 183 મંજૂર જગ્યાઓ છે પરંતુ તેમાંથી માત્ર 40 જગ્યાઓ જ ભરાઈ છે. સ્વાસ્થ્ય મંત્રાલયે ગયા વર્ષે લોકસભામાં આ માહિતી આપી હતી. એઈમ્સ રાજકોટની સાથે એઈમ્સ વિજયપુર અને એઈમ્સ ગોરખપુરમાં પણ ફેકલ્ટીની ઘણી જગ્યાઓ ખાલી છે. AIIMS સંસ્થાઓમાં તબીબી વિદ્યાર્થીઓને ભણાવવા માટે સરકાર દ્વારા પર્યાપ્ત ફેકલ્ટી બેઠકો મંજૂર કરવામાં આવી હતી. આ સાથે એક એઈમ્સમાંથી બીજી એઈમ્સમાં ફેકલ્ટીના ટ્રાન્સફરની સુવિધા પણ આપવામાં આવી હતી.
4026 પદોને ભરવાની મંજૂરી આપવામાં આવી હતી
સ્વાસ્થ્ય મંત્રાલયના ડેટા અનુસાર, દેશની 18 નવી AIIMSમાં 4026 પદોને મંજૂરી આપવામાં આવી હતી, જેમાંથી માત્ર 2259 જગ્યાઓ જ ભરાઈ શકી હતી. AIIMSમાં નિમણૂક માટે, સરકારે પ્રોફેસરના પદ પર નિમણૂક માટેની વય મર્યાદા પણ 50 વર્ષથી વધારીને 58 વર્ષ કરી દીધી છે. આ સાથે સરકારી મેડિકલ કોલેજમાંથી ફેકલ્ટીને ડેપ્યુટેશન પર લેવાની પણ મંજૂરી આપવામાં આવી હતી. આ સાથે જ નિવૃત્તિની ઉંમર પણ વધારીને 70 વર્ષ કરવામાં આવી છે. વિદેશમાં રહેતા ભારતીય નાગરિકોને AIIMSમાં ફેકલ્ટી પોસ્ટ્સ પર નિમણૂક માટે પણ છૂટ આપવામાં આવી હતી. જો કે, આટલી બધી જોગવાઈઓ હોવા છતાં, AIIMS સ્ટાફની અછત સાથે ઝઝૂમી રહી છે.
