Flash Back 2022 : વિરાટની કેપ્ટનશીપથી લઈને સૂર્યાનો 360 અવતાર, ભારતીય ક્રિકેટ માટે કંઈક આવું રહ્યું આ વર્ષ

વર્ષ 2022 ને પૂરુ થવામાં હવે ગણતરીના દિવસો જ બાકી રહ્યા છે. ત્યારે હમ દેખેંગેની ટીમ આપને આ વર્ષની કેટલીક યાદગાર પળો યાદ અપાવા જઈ રહી છે અને આજે આપણે આજે વાત કરીએ છીએ આ વર્ષ 2022 ભારતીય ક્રિકેટ માટે કેવું રહ્યું ? વર્ષ 2022 આમ તો ભારતીય ક્રિકેટ માટે મિશ્ર રહ્યું. ટીમે દ્વિપક્ષીય શ્રેણીમાં સારું પ્રદર્શન કર્યું હતું, પરંતુ ભારતીય ટીમ મહત્વની ટૂર્નામેન્ટમાં મહત્વની મેચોમાં સારું પ્રદર્શન કરી શકી નહોતી. ચાલો જાણીએ આ વર્ષે ભારતીય ક્રિકેટમાં કઈ કઈ ઘટનાઓ થઈ…..

આ પણ વાંચો : Flash Back 2022 : આ વર્ષે આ મહાન ખેલાડીઓએ આંતરરાષ્ટ્રીય ક્રિકેટમાંથી લીધી નિવૃત્તિ

દક્ષિણ આફ્રિકા સામે ટેસ્ટ શ્રેણીની હાર સાથે વર્ષની શરૂઆત કરી હતી

ભારતીય ટીમે વર્ષ 2022ની શરૂઆત સાઉથ આફ્રિકા સામેની ટેસ્ટ શ્રેણી હારીને કરી હતી. દક્ષિણ આફ્રિકાએ ત્રણ ટેસ્ટ મેચની શ્રેણીમાં ભારતને 2-1થી હરાવ્યું. જો કે ભારતે જે મેચ જીતી હતી તે ગયા વર્ષે ડિસેમ્બરમાં રમાઈ હતી. આ હારને કારણે ભારતીય ટીમ પર અનેક સવાલો ઉભા થયા છે. આ સાથે કેએલ રાહુલની કેપ્ટનશિપની ક્ષમતા પણ શંકાના દાયરામાં આવી ગઈ હતી.

કોહલીએ ટેસ્ટ કેપ્ટનશીપ પણ છોડી, રોહિત ત્રણેય ફોર્મેટનો નિયમિત કેપ્ટન બન્યો.

સાઉથ આફ્રિકા સામેની ટેસ્ટ સિરીઝમાં હાર સાથે વિરાટ કોહલીએ પણ ટેસ્ટ કેપ્ટનશિપ છોડી દીધી હતી. જોકે ચાહકો ઇચ્છતા ન હતા કે આવું થાય, કોહલીએ વર્કલોડને ટાંકીને ટેસ્ટ કેપ્ટનશીપમાંથી રાજીનામું આપ્યું. વાસ્તવમાં, ગયા વર્ષે T20 વર્લ્ડ કપમાં ખરાબ પ્રદર્શન બાદ કોહલીને T20 અને ODIની કેપ્ટન્સીથી હટાવી દેવામાં આવ્યો હતો. આવી સ્થિતિમાં કોહલીએ એમ પણ કહ્યું કે વિભાજીત કેપ્ટનશીપ ભારત માટે મદદરૂપ નથી. આવી સ્થિતિમાં T20, ODI બાદ રોહિતને ટેસ્ટનો પણ કેપ્ટન બનાવવામાં આવ્યો હતો.

IPL મેગા ઓક્શનમાં ઈશાન કિશન ચમક્યો

ફેબ્રુઆરીમાં આઈપીએલ 2022 માટે મેગા ઓક્શનમાં બિહારના ઈશાન કિશન મેગા ઓક્શનનો સૌથી મોંઘો ખેલાડી હતો. તેને મુંબઈ ઈન્ડિયન્સે 15.25 કરોડમાં ખરીદ્યો હતો. જ્યારે દીપક ચહર (CSK) 14 કરોડ સાથે બીજા નંબરનો સૌથી મોંઘો ખેલાડી બન્યો. શ્રેયસ અય્યર (KKR) રૂ. 12.25 કરોડ સાથે મેગા ઓક્શનનો ત્રીજો સૌથી મોંઘો ખેલાડી બન્યો. જોકે, આઈપીએલ 2022માં આ ત્રણેયને ખરીદનારી ટીમોનું પ્રદર્શન ખરાબ રહ્યું હતું. મુંબઈ પોઈન્ટ ટેબલમાં સૌથી નીચેના 10માં સ્થાને હતું અને CSK નવમા સ્થાને. આ વર્ષના સૌથી મોંઘા ખેલાડી ઈશાન કિશને 14 મેચમાં માત્ર 418 રન બનાવ્યા હતા.

ગુજરાત ટાઇટન્સ ડેબ્યૂ IPLમાં જ ચેમ્પિયન બની, હાર્દિક પંડ્યાનું શાનદાર કમબેક

IPL 2022માં બે ટીમોએ ડેબ્યૂ કર્યું હતું. લખનૌ સુપરજાયન્ટ્સ અને ગુજરાત ટાઇટન્સ. આ બંને ટીમો પ્લેઓફમાં પહોંચશે તેવી કોઈને આશા નહોતી, પરંતુ રાહુલના નેતૃત્વમાં લખનૌ અને હાર્દિક પંડ્યાના નેતૃત્વમાં ગુજરાત પ્લેઓફમાં પહોંચી ગયું હતું. ગુજરાત તેની પહેલી જ IPLમાં ચેમ્પિયન પણ બન્યું હતું. આ સાથે હાર્દિક પંડ્યા એક સફળ કેપ્ટન તરીકે કારગર સાબિત થયો હતો. કેપ્ટન તરીકે હાર્દિકની આ પ્રથમ ટુર્નામેન્ટ હતી અને તેણે પોતાના ઓલરાઉન્ડ પ્રદર્શનથી ટીમને ચેમ્પિયન બનાવી હતી. ગુજરાતે ફાઇનલમાં રાજસ્થાન રોયલ્સને હરાવ્યું હતું.

જોસ બટલર અને યુઝવેન્દ્ર ચહલ IPL 2022માં ચમક્યાં

IPL 2022માં રાજસ્થાન રોયલ્સના જોસ બટલર સૌથી વધુ રન બનાવનાર ખેલાડી હતો. તેણે 17 મેચમાં ચાર સદીની મદદથી 149.05ના સ્ટ્રાઈક રેટથી 863 રન બનાવ્યા. તે જ સમયે યુઝવેન્દ્ર ચહલ સૌથી વધુ વિકેટ ઝડપનાર બોલર હતો. તેણે 17 મેચમાં 27 વિકેટ લીધી હતી. આ દરમિયાન તેનો ઈકોનોમી રેટ 7.75 હતો. 40 રનમાં પાંચ વિકેટ તેનું સર્વશ્રેષ્ઠ પ્રદર્શન હતું.

આ પણ વાંચો : Flash Back 2022: એવું લાગ્યુ વૈજ્ઞાનિકોએ ભગવાનને પડકાર્યા

બર્મિંગહામ કોમનવેલ્થ ગેમ્સમાં ભારતીય મહિલા ટીમે જીત્યો સિલ્વર મેડલ

ભારતીય મહિલા ક્રિકેટ ટીમને બર્મિંગહામ કોમનવેલ્થ ગેમ્સમાં સિલ્વર મેડલથી જ સપડાવું પડ્યું હતું. ઓસ્ટ્રેલિયાએ ફાઇનલમાં ભારતને નવ રનથી હરાવ્યું હતું. આ રીતે, ઓસ્ટ્રેલિયન ટીમે પ્રથમ વખત કોમનવેલ્થ ગેમ્સમાં શરૂ થયેલી મહિલા ક્રિકેટમાં ઐતિહાસિક ગોલ્ડ મેડલ જીત્યો હતો અને ભારતે સિલ્વર મેડલ જીત્યો હતો.

મિતાલી રાજ અને ઝુલન ગોસ્વામીએ જાહેર કરી નિવૃત્તિ

ભારતીય મહિલા ક્રિકેટના બે મહાન ખેલાડીઓ – મિતાલી રાજ અને ઝુલન ગોસ્વામીએ ક્રિકેટના તમામ ફોર્મેટમાંથી નિવૃત્તિ લીધી હતી. મિતાલી રાજે પોતાની 23 વર્ષની લાંબી આંતરરાષ્ટ્રીય કારકિર્દીમાં ઘણા રેકોર્ડ બનાવ્યા. તેણે 232 વનડેમાં 7805 રન બનાવ્યા છે, જ્યારે 89 ટી20માં તેના 2364 રન છે. મિતાલીએ 12 ટેસ્ટમાં 699 રન બનાવ્યા જેમાં એક સદી અને ચાર અડધી સદી સામેલ છે. તે જ સમયે, ઝુલને તેની આંતરરાષ્ટ્રીય કારકિર્દીમાં 12 ટેસ્ટ, 204 ODI અને 68 T20 મેચ રમી હતી. ઝુલને તમામ ફોર્મેટમાં કુલ 355 વિકેટ લીધી હતી.

ઇંગ્લેન્ડ સામેની રી-શિડ્યુલ ટેસ્ટમાં ભારતનો પરાજય 

વર્ષ 2021 માં, ભારતીય ટીમ પાંચ ટેસ્ટ મેચની શ્રેણી રમવા માટે ઈંગ્લેન્ડના પ્રવાસે ગઈ હતી. જોકે સિરીઝની પાંચમી મેચ કોરોનાના કારણે રમાઈ શકી નોહતી. તે સમયે ભારતે ઈંગ્લેન્ડ પર 2-1થી સરસાઈ મેળવી લીધી હતી. આવી સ્થિતિમાં, પાંચમી ટેસ્ટને લઈને ઘણો વિવાદ થયો હતો, ત્યારબાદ તેને 2022માં ફરીથી શેડ્યૂલ કરવામાં આવી હતી. પાંચમી ટેસ્ટ આ વર્ષે જુલાઈમાં રમાઈ હતી. બંને ટીમના કેપ્ટન નવા હતા. આ શ્રેણીની બાકીની ચાર મેચો વિરાટ કોહલી (ભારત) અને જો રૂટ (ઈંગ્લેન્ડ)ની કપ્તાની હેઠળ રમાઈ હતી. તે જ સમયે, જ્યારે રોહિત પાંચમી ટેસ્ટમાં ઈજાગ્રસ્ત થયો હતો ત્યારે જસપ્રિત બુમરાહ ભારતીય ટીમની કમાન સંભાળી રહ્યો હતો. તે જ સમયે, બેન સ્ટોક્સ ઇંગ્લેન્ડના કેપ્ટન હતા. એજબેસ્ટન ખાતે રમાયેલી આ મેચમાં ઇંગ્લેન્ડની ટીમે ભારતને સાત વિકેટે હરાવ્યું હતું. ભારતે ઈંગ્લેન્ડ સામે 378 રનનો લક્ષ્યાંક રાખ્યો હતો, જેને ઇંગ્લેન્ડની ટીમે બે સત્ર બાકી રહેતાં હાંસલ કરી લીધો હતો. જો રૂટ (અણનમ 142) અને જોની બેયરસ્ટો (114 અણનમ) ઈંગ્લેન્ડની જીતના હીરો રહ્યા હતા. આ રીતે શ્રેણી 2-2થી ડ્રોમાં સમાપ્ત થઈ હતી.

આ પણ વાંચો : ક્રિકેટમાં બોક્સિંગ ડે ટેસ્ટ મેચ શું હોય છે? જાણો

કોહલીના ફોર્મએ વધારી ચિંતા 

જુલાઈમાં ઈંગ્લેન્ડ પ્રવાસ સુધી ભારતીય ટીમ મેનેજમેન્ટ માટે સૌથી મોટી સમસ્યા અનુભવી બેટ્સમેન વિરાટ કોહલીના ફોર્મની ઉણપ હતી. આવી સ્થિતિમાં તેની પસંદગી પર પણ સવાલો ઉઠ્યા હતા. સુનીલ ગાવસ્કર, કપિલ દેવ જેવા ભૂતપૂર્વ દિગ્ગજ ક્રિકેટરો કોહલીની હકાલપટ્ટીની માંગ કરી રહ્યા હતા. આવી સ્થિતિમાં કોહલીએ ઈંગ્લેન્ડ સામેની શ્રેણી બાદ ક્રિકેટમાંથી બ્રેક લીધો હતો. આ દરમિયાન તે ક્રિકેટથી દૂર રહ્યો હતો.

એશિયા કપમાં સારી શરૂઆત બાદ ભારતીય ટીમ સુપર-ફોરમાંથી બહાર

રોહિત શર્માની કેપ્ટન્સીમાં ભારતીય ટીમ એશિયા કપ ટૂર્નામેન્ટ રમવા પહોંચી હતી. ભારતે ગ્રુપ સ્ટેજમાં પાકિસ્તાનને હરાવીને ટુર્નામેન્ટની શાનદાર શરૂઆત કરી હતી. ટીમ ગ્રૂપ સ્ટેજમાં પોતાની તમામ મેચ જીતીને સુપર-ફોરમાં પહોંચી હતી. જોકે, સુપર-ફોરમાં પાકિસ્તાન અને શ્રીલંકા સામે હાર્યા બાદ તેઓ ટુર્નામેન્ટમાંથી બહાર થઈ ગઈ હતી. આ પછી ભારતીય ટીમની પસંદગી અને રોહિત શર્માની કેપ્ટનશીપ પર પણ ઘણાં સવાલો ઉઠવા લાગ્યા હતા.

આ પણ વાંચો : બાંગ્લાદેશ સામેની ટેસ્ટ શ્રેણી જીત્યા બાદ પણ ભારતને WTCની ફાઈનલમાં પહોંચવુ મુશ્કેલ : જાણો શું છે સમીકરણો

કોહલીએ 33 મહિના બાદ આંતરરાષ્ટ્રીય ક્રિકેટમાં ફટકારી સદી 

વિરાટ કોહલીએ એશિયા કપમાં અફઘાનિસ્તાન સામે સદી ફટકારી હતી. તેણે 33 મહિના પછી આંતરરાષ્ટ્રીય ક્રિકેટમાં સદી ફટકારી હતી. છેલ્લી સદી કોહલીએ 23 નવેમ્બર 2019ના રોજ બાંગ્લાદેશ સામે ફટકારી હતી. કોહલીએ આંતરરાષ્ટ્રીય ક્રિકેટમાં 83 ઇનિંગ્સ બાદ સદી ફટકારી હતી. આ તેની આંતરરાષ્ટ્રીય કારકિર્દીની 71મી સદી અને T20માં પ્રથમ સદી હતી. અગાઉ, T20 આંતરરાષ્ટ્રીયમાં તેનો સર્વશ્રેષ્ઠ સ્કોર 94* હતો. કોહલીએ 2 વર્ષ, 9 મહિના, 16 દિવસ બાદ આંતરરાષ્ટ્રીય ક્રિકેટમાં સદી ફટકારી હતી.

T20 વર્લ્ડ કપમાં ભારતીય ટીમની શાનદાર શરૂઆત, રોમાંચક મેચમાં પાકિસ્તાનને હરાવ્યું

T20 વર્લ્ડ કપમાં ભારત અને પાકિસ્તાનને એક જ ગ્રુપમાં રાખવામાં આવ્યા હતા. બંને એકબીજા સામે વર્લ્ડ કપ અભિયાનની શરૂઆત થઈ હતી. મેલબોર્ન ક્રિકેટ ગ્રાઉન્ડ પર રમાયેલી મેચમાં ભારતને 160 રનનો ટાર્ગેટ મળ્યો હતો, જેને ટીમે સાત વિકેટ ગુમાવીને હાંસલ કરી લીધો હતો. ભારતે છેલ્લા બોલ પર બે રન બનાવીને રોમાંચક મેચમાં પાકિસ્તાનને હરાવ્યું હતું. કોહલીએ 53 બોલમાં અણનમ 82 રનની યાદગાર ઇનિંગ રમી હતી. ભારતીય ટીમ પોતાના ગ્રુપમાં ટોપ પર રહીને સેમિફાઈનલ સુધી પહોંચી હતી.

T20 વર્લ્ડ કપની સેમીફાઈનલમાં ઈંગ્લેન્ડ સામે ટીમ ઈન્ડિયાની કારમી હાર

ભારતીય ટીમને T20 વર્લ્ડ કપની સેમિફાઇનલમાં ઇંગ્લેન્ડ સામે 10 વિકેટથી કારમી હારનો સામનો કરવો પડ્યો હતો. ભારતીય ટીમ 168 રનનો બચાવ કરી શકી ન હતી. આ હાર બાદ ભારતીય ટીમ પર અનેક સવાલો ઉભા થયા છે. આ સાથે રોહિત શર્માની કેપ્ટનશિપ પણ શંકાના દાયરામાં આવી ગઈ છે. ત્યારબાદ ઇંગ્લેન્ડની ટીમે ફાઇનલમાં પાકિસ્તાનને હરાવીને T20 વર્લ્ડ કપનો ખિતાબ જીત્યો હતો.

કેએલ રાહુલ અને રોહિત શર્માનું ફોર્મ હજુ પણ મોટો પ્રશ્ન

આ વર્ષે કેએલ રાહુલ અને રોહિત શર્માનું ફોર્મ સવાલોના ઘેરામાં રહ્યું હતું. બંને કંઈ ખાસ પ્રદર્શન કરી શક્યા ન હતા. T20માં જ્યાં રોહિતે 29 મેચમાં 656 રન બનાવ્યા છે, તો રાહુલે 16 મેચમાં 434 રન બનાવ્યા છે. સૌથી મોટો સવાલ એ હતો કે ઈશાન કિશન ભારત માટે આખું વર્ષ ટી-20માં રમતો રહ્યા, જ્યારે રાહુલ ઈજા સાથે સંઘર્ષ કરી રહ્યો હતો. એશિયા કપ પહેલા રાહુલ ફિટ હતો અને તેને ટીમમાં સામેલ કરવામાં આવ્યો હતો. વનડેમાં રોહિત-રાહુલનું પ્રદર્શન ખરાબ રહ્યું હતું. રોહિતે આ વર્ષે આઠ વનડેમાં 249 રન બનાવ્યા હતા, જ્યારે રાહુલે 10 વનડેમાં 251 રન બનાવ્યા હતા. ટેસ્ટમાં રાહુલ ચાર મેચમાં માત્ર 137 રન જ બનાવી શક્યો હતો જ્યારે રોહિતે બે મેચમાં 90 રન બનાવ્યા હતા.

ચેતન શર્માની આગેવાની હેઠળની પસંદગી સમિતિને હટાવી દેવામાં આવી 

T20 વર્લ્ડ કપમાંથી ભારતની બહાર થયા બાદ BCCIએ ચેતન શર્માની આગેવાની હેઠળની પસંદગી સમિતિને હટાવી દીધી હતી. જોકે, આગામી સમિતિની પસંદગી ન થાય ત્યાં સુધી તેમને ટીમ સિલેક્શનની જવાબદારી સોંપવામાં આવી હતી. આ સાથે ત્રણેય ફોર્મેટ માટે નવા કેપ્ટનની નિમણૂક કરવાની જવાબદારી પણ નવી પસંદગી સમિતિને સોંપવામાં આવી હતી. આ સિવાય એ વાત પણ સામે આવી છે કે હવે 2024 T20 વર્લ્ડ કપ માટે નવી ટીમ બનાવવામાં આવશે. આ ઉપરાંત હાર્દિક પંડ્યાને T20 કેપ્ટન બનાવવાની વાત પણ સામે આવી હતી.

આ પણ વાંચો : કાનપુરના આ ખેલાડીને IPL 2023માં રમવાની સુવર્ણ તક મળી

સૂર્યકુમાર યાદવ વિશ્વનો નંબર વન T20 બેટ્સમેન બન્યો

સૂર્યકુમાર યાદવે આ વર્ષે પોતાની બેટિંગથી દુનિયાભરના લોકોને અને ભૂતપૂર્વ ક્રિકેટરોને પણ દિવાના બનાવી દીધા. તે T20 વર્લ્ડ કપમાં ICC T20 રેન્કિંગમાં પાકિસ્તાનના મોહમ્મદ રિઝવાનને પાછળ છોડીને નંબર વન બેટ્સમેન પણ બન્યો હતો. સૂર્યકુમાર આ વર્ષે T20માં સૌથી વધુ રન બનાવનાર બેટ્સમેન હતો. તેણે 31 T20 મેચોમાં 46.56ની એવરેજ અને 187.43ની સ્ટ્રાઈક રેટથી 1164 રન બનાવ્યા. તે એક કેલેન્ડર વર્ષમાં T20માં 1000 રન બનાવનાર પ્રથમ ભારતીય બેટ્સમેન પણ બન્યો હતો. સૂર્યકુમાર મેદાનના કોઈપણ ખૂણામાં સિક્સર મારવામાં માહેર છે અને આ જ કારણથી તેને ન્યૂ મિસ્ટર 360 ડિગ્રી પણ કહેવામાં આવે છે. અગાઉ આ નામનો ઉપયોગ દક્ષિણ આફ્રિકાના પૂર્વ બેટ્સમેન એબી ડી વિલિયર્સ માટે થતો હતો.

મહિલા IPL શરૂ થવાની જાહેરાત

BCCIએ મોટો નિર્ણય લેતા મહિલા IPLની જાહેરાત કરી છે. BCCI આવતા વર્ષે માર્ચમાં મહિલા IPLની પ્રથમ સિઝનનું આયોજન કરવા માટે તૈયાર છે. ટુર્નામેન્ટમાં 20 લીગ મેચો હશે, જેમાં ટીમો એકબીજા સાથે બે વખત રમશે. પોઈન્ટ ટેબલમાં ટોપ પર રહેલી ટીમ સીધી ફાઇનલમાં જશે. તે જ સમયે, બીજા અને ત્રીજા સ્થાને રહેલી ટીમ વચ્ચે એલિમિનેટર મેચ રમાશે.

T20 વર્લ્ડ કપ ફોર ધ બ્લાઈન્ડમાં ભારત સતત ત્રીજી વખત ચેમ્પિયન બન્યું 

ભારતીય ટીમે T20 વર્લ્ડ કપ ફોર બ્લાઈન્ડની ફાઇનલમાં બાંગ્લાદેશને હરાવીને ટાઈટલ જીત્યું હતું. ટીમ સતત ત્રીજી વખત ચેમ્પિયન બની હતી. ટીમ ઈન્ડિયાએ ફાઇનલમાં 120 રનથી જીત મેળવી હતી. પ્રથમ બેટિંગ કરતા તેણે બે વિકેટે 277 રન બનાવ્યા હતા. જવાબમાં બાંગ્લાદેશની ટીમ 20 ઓવરમાં ત્રણ વિકેટે 157 રન જ બનાવી શકી હતી. ભારતીય ટીમે આ પહેલા 2012 અને 2017માં પણ આ ટુર્નામેન્ટ જીતી હતી.

IPL મિની ઓક્શનમાં વિદેશી ખેલાડીઓનો દબદબો રહ્યો 

IPL-2023ની મિની ઓક્શન વિદેશી ક્રિકેટરો માટે મેગા ઓક્શન બની ગઈ. IPL ફ્રેન્ચાઇઝી માલિકોએ વિદેશી ક્રિકેટરો પર પૈસા ઉડાડ્યા હતા. બોલી એટલી જોરદાર હતી કે IPL ઈતિહાસના તમામ રેકોર્ડ તૂટી ગયા. ઈંગ્લેન્ડના ઓલરાઉન્ડર સેમ કુરન IPL ઈતિહાસમાં રૂ. 18.5 કરોડ સાથે અને ઓસ્ટ્રેલિયન ઓલરાઉન્ડર કેમેરોન ગ્રીન રૂ. 17.50 કરોડ સાથે સૌથી મોંઘા પ્રથમ બે ક્રિકેટર બન્યા છે. કરણને પંજાબ કિંગ્સે અને ગ્રીનને મુંબઈ ઈન્ડિયન્સે ખરીદ્યો હતો.

આ પણ વાંચો : Flash Back 2022 : સાઉથની એ ફિલ્મો જેણે આ વર્ષે બોક્સઓફિસ પર તોડી બોલિવુડની કમર !

બાંગ્લાદેશે સાત વર્ષ બાદ ભારતથી ODI સિરીઝ જીતી, ટીમ ઈન્ડિયાએ ટેસ્ટ ક્લીન-અપ કર્યું

ભારતીય ટીમ વર્ષની છેલ્લી શ્રેણી માટે બાંગ્લાદેશ પહોંચી હતી. બાંગ્લાદેશે ત્રણ મેચની વનડે શ્રેણીમાં ભારતને 2-1થી હરાવ્યું. બાંગ્લાદેશે સાત વર્ષ બાદ ભારતને વનડે શ્રેણીમાં હરાવ્યું. આ સાથે જ ભારતે બે મેચની ટેસ્ટ શ્રેણીમાં બાંગ્લાદેશનો ક્લીન સ્વીપ કર્યો હતો. આ રીતે ટીમ ઈન્ડિયાનું આ વર્ષ પૂરું થયું.