સવા કિલો ચાંદી, 31 તોલા સોનું, નોટોના બંડલ; રાજસ્થાનમાં ભાણેજની લગ્નમાં મામાઓએ ખોલ્યો ખજાનો

ભાણેજ-ભાણેજીના લગ્નમાં ભાત (મામેરું) આપવાની પરંપરા દેશમાં સદીઓ જૂની છે. ક્યાંક તેને ‘ભાત’ કહેવાય છે તો ક્યાંક ‘માયરા’. દેશભરમાં અલગ-અલગ જગ્યાએ તેને અલગ-અલગ નામ આપવામાં આવ્યા છે. રાજસ્થાનમાં તેને ‘માયરા’ કહેવામાં આવે છે.

માયરાની રસ્મ લગ્નમાં ખૂબ જ ખાસ માનવામાં આવે છે. આ દરમિયાન ભાઈ પોતાની બહેનને ખૂબ ભેટ-સોગાદો આપે છે. રાજસ્થાનના બીકાનેરનું શાહી માયરું આ દિવસોમાં ચર્ચામાં છે. બીકાનેરના નોખામાં બે મામાએ મળીને પોતાના ભાણેજોના લગ્નની માયરાની રસ્મમાં એટલી મોટી રકમ આપી કે જોનારાઓનું મોં ખુલ્લું જ રહી ગયું. આ ખાસ માયરાની ચર્ચા આખા રાજ્યમાં થઈ રહી છે.

માયરામાં 1 કરોડ 56 લાખના બંડલ!

પ્રસંગ હતો નોખામાં ગિરધારી અને જગદીશ ગોદારાના બાળકોના લગ્નનો. 1 નવેમ્બરની સાંજે યોજાયેલી માયરાની રસ્મમાં RLP સુપ્રીમો અને નાગૌરના સાંસદ હનુમાન બેનીવાલ પણ પહોંચ્યા હતા. માયરામાં 1 કરોડ 56 લાખના નોટોના બંડલ સિનિયાલા ગામના ભંવર અને જગદીશ લેઘાએ પોતાની બહેન મીરાના બાળકોના લગ્નમાં આપ્યા તો દરેક જણ દંગ રહી ગયા.

માયરામાં નોટોના આટલા બધા બંડલ જોઈને ત્યાં હાજર મહેમાનોની આંખો ફાટી ગઈ. જોતજોતામાં આ વાત આસપાસના વિસ્તારોમાં પણ ફેલાઈ ગઈ. માયરામાં આટલી મોટી રકમ આપવી દરેકના ગજાની વાત નથી હોતી. આ શાહી માયરા પછી દરેક જણ એવું જ કહી રહ્યું છે કે ભગવાન આવા મામા બધાને આપે.

સવા કિલો ચાંદી અને 31 તોલા સોનું પણ આપ્યું

માયરું ભરનાર મામા ભંવર લેઘાએ જણાવ્યું કે, બે ભાણેજોના લગ્નમાં તેમણે માયરામાં એક કરોડ 11 લાખ રોકડા આપ્યા છે. વળી, સવા કિલો ચાંદી અને 31 તોલા સોનું પણ આપ્યું છે, જેની કિંમત આશરે 45 લાખ રૂપિયા છે.

માયરામાં આટલી રકમ આપનાર બંને શખ્સો જેપી કન્સ્ટ્રક્શન પ્રાઇવેટ લિમિટેડના સંચાલક ભંવર લેઘા અને જગદીશ લેઘા છે. તેમનું કહેવું છે કે તેમના પરિવારનું આ પહેલું માયરું હતું. તેમની મોટી બહેન મીરાના બે બાળકોના લગ્ન છે. બંને ભાઈઓએ મળીને આ માયરું ભર્યું છે.

બીકાનેરના શાહી માયરાની ચર્ચા જોરશોરથી

બીકાનેરમાં ભરાયેલા આ દોઢ કરોડ રૂપિયાના માયરાની ચર્ચા હવે આખા જિલ્લામાં જોરશોરથી થઈ રહી છે. સોશિયલ મીડિયા પર પણ માયરાની તસવીરો અને વીડિયો જબરદસ્ત વાયરલ થઈ રહ્યા છે. માયરામાં સામેલ લોકોએ કહ્યું કે આ માત્ર દેખાડો કરવા માટે નથી કરાયું, પરંતુ આ પરિવાર અને પરંપરા પ્રત્યે સન્માનનું પ્રતીક છે. ભાણેજો પ્રત્યે મામાના આ પ્રેમની ચર્ચા જોરશોરથી થઈ રહી છે. આ માયરું માત્ર કપડાં, ઘરેણાં અને રકમ નહીં પરંતુ સંબંધોની ઊંડાઈ અને સન્માન દર્શાવે છે. આ રાજસ્થાનની સમૃદ્ધ પરંપરાનું પણ શાનદાર ઉદાહરણ છે.