પરિણીતા અન્ય પુરુષ સાથે ભાગી ગયાની શંકાએ તોડી પાડ્યા યુવકના મકાન, જાણો ક્યાંની છે ઘટના

ભરૂચ, 25 માર્ચ : ગુજરાતમાં એક આશ્ચર્યજનક ઘટના બની છે. આમ તો અત્યાર સુધી તમે પોલીસ વિભાગ દ્વારા આરોપીના ઘર પર બુલડોઝર ચલાવતા જોયા અને સાંભળ્યા હશે પરંતુ દક્ષિણ ગુજરાતમાં 6 લોકોએ કથિત આરોપી અને તેના સંબંધીઓના ઘરો પર બુલડોઝર ચલાવ્યું અને તેમના ઘરો તોડી પાડ્યા છે. આ ઘટના ભરૂચ જિલ્લામાં બની હતી. શખસ પર એક પરિણીતાનું અપહરણ કરવાનો આરોપ છે. આ મામલે આરોપીની માતાની ફરિયાદના આધારે પોલીસે 6 શખસોની ધરપકડ કરી છે.

મળતી માહિતી મુજબ, ભરૂચ જિલ્લાના વેડાચ પોલીસ સ્ટેશનના પીઆઈ બીએમ ચૌધરીએ આ મામલાની વિગત આપતા જણાવ્યું હતું કે પરિણીતાના પરિવારના સભ્યો સહિતના આરોપીઓએ બુલડોઝરથી યુવક અને તેના સંબંધીઓના ઘર તોડી પાડ્યા હતા કારણ કે તેમને શંકા હતી કે પરિણીતા તેની સાથે ભાગી ગઈ છે. જેથી તેમણે આ રીતે પોતાનો ગુસ્સો ઠાલવવાનું નક્કી કર્યું હતું.

આરોપીઓમાં પરિણીતાનો પતિ પણ સામેલ છે. તેને શંકા છે કે બીજા સમુદાયનો કોઈ વ્યક્તિ તેની પત્ની સાથે ભાગી ગયો છે. પોલીસે જણાવ્યું કે આ ઘટના 21 માર્ચે જિલ્લાના કરેલી ગામમાં બની હતી. અધિકારીએ જણાવ્યું હતું કે 21 માર્ચની રાત્રે આરોપીઓએ ફુલમાલી સમુદાયના છ ઘરોને બુલડોઝરથી તોડી પાડ્યા હતા, જેમાં તે પુરુષનું ઘર પણ સામેલ હતું જે મહિલા સાથે ભાગી ગયો હોવાનો શંકાસ્પદ હતો. આ પછી પોલીસે બુલડોઝર ચાલક સહિત છ લોકો સામે FIR નોંધી હતી.

પીઆઈ ચૌધરીએ જણાવ્યું કે તમામ આરોપીઓની ધરપકડ કરવામાં આવી છે. પીઆઈ ચૌધરીએ જણાવ્યું કે મહિલા આણંદ જિલ્લાના આંકલાવ તાલુકામાં તેના માતા-પિતાને મળવા ગઈ હતી. જ્યાંથી મહિલા અને પુરુષ ભાગી ગયા હોવાનું જાણવા મળ્યું છે. પોલીસ અધિકારીએ જણાવ્યું કે મહિલાના માતા-પિતાએ ફરિયાદ નોંધાવી છે અને આણંદ પોલીસ આ મામલાની તપાસ કરી રહી છે.

ફરિયાદ મુજબ હેમંત પઢિયાર, સુનીલ પઢિયાર, બલવંત પઢિયાર, સોહમ પઢિયાર અને ચિરાગ પઢિયાર સહિતના આરોપીઓ તે પુરુષના ઘરે ગયા અને તેના પરિવારના સભ્ય પર મહિલા સાથે ભાગી જવાનો આરોપ લગાવ્યો અને તેને બે દિવસમાં હાજર કરવા કહ્યું હતું.

દરમિયાન 21 માર્ચે રાત્રે 9 વાગ્યાની આસપાસ આરોપી બુલડોઝર લઈને તે વ્યક્તિના ઘરે ગયો અને શેડ અને શૌચાલય સહિત ઘરના ભાગો તોડી પાડવાનું શરૂ કર્યું હતું. એફઆઈઆર મુજબ, તેમણે આ વિસ્તારના છ ઘરોના ભાગો તોડી પાડ્યા હતા. પીઆઈ ચૌધરીએ જણાવ્યું કે બીજા દિવસે તે વ્યક્તિની માતાએ વેડાચ પોલીસ સ્ટેશનમાં ફરિયાદ નોંધાવી, જેના પગલે છ લોકોની ધરપકડ કરવામાં આવી છે.

આ પણ વાંચો :- iPhoneમાં આવી રહ્યા છે 5 નવા ફીચર્સ, લિસ્ટ જોયા પછી તમે ખુશ થઈ જશો