ડેટિંગથી લઈ લગ્નની તારીખ સુધી મળશે સરકારી મદદ, જાણો ક્યાં બનાવવામાં આવ્યું સેક્સ મંત્રાલય ?

રશિયા, 9 નવેમ્બર : રશિયામાં વસ્તી ઘટવાની ગંભીર સમસ્યાનો સામનો કરવા માટે એક ખૂબ જ અનોખું પગલું માનવામાં આવી રહ્યું છે. મીડિયા રિપોર્ટ્સ અનુસાર, રાષ્ટ્રપતિ વ્લાદિમીર પુતિનની સાથી અને રશિયન સંસદની ફેમિલી પ્રોટેક્શન એન્ડ ચાઈલ્ડ પ્રોટેક્શન કમિટીના અધ્યક્ષ નીના ઓસ્ટાનિના ‘સેક્સ મંત્રાલય’ સ્થાપિત કરવાના પ્રસ્તાવની સમીક્ષા કરી રહી છે. આ મંત્રાલયનો ઉદ્દેશ્ય દેશનો જન્મ દર વધારવાની વ્યૂહરચના તૈયાર કરવાનો રહેશે. આ પગલું એવા સમયે લેવામાં આવી રહ્યું છે જ્યારે યુક્રેન યુદ્ધના કારણે દેશમાં વસ્તી સંકટ વધી ગયું છે.

રશિયન મેગેઝિન મોસ્કવિચ અનુસાર, ગ્લાવપીઆર એજન્સી દ્વારા રજૂ કરવામાં આવેલી અરજીમાં ‘સેક્સ મંત્રાલય’ સ્થાપવાનું સૂચન કરવામાં આવ્યું હતું જે જન્મ દર સંબંધિત યોજનાઓનું નેતૃત્વ કરશે. મોસ્કોના ડેપ્યુટી મેયર અનાસ્તાસિયા રાકોવાએ ભારપૂર્વક જણાવ્યું હતું કે દેશમાં વસ્તી વૃદ્ધિ અત્યંત મહત્ત્વપૂર્ણ છે. રાકોવાએ કહ્યું કે મોસ્કોમાં મહિલાઓની પ્રજનન ક્ષમતાની ચકાસણી કરવા માટે એક ખાસ પદ્ધતિ અપનાવવામાં આવી રહી છે, જેથી મહિલાઓને બાળકો પેદા કરવા માટે પ્રોત્સાહિત કરી શકાય.

વિચિત્ર દરખાસ્તો પર ચર્ચા થઈ રહી છે
જન્મ દર વધારવા માટે ઘણી વિચિત્ર દરખાસ્તો પર ચર્ચા થઈ રહી છે. આમાંની એક યોજના અનુસાર, રાત્રે 10 વાગ્યાથી સવારના 2 વાગ્યા સુધી ઇન્ટરનેટ અને વીજળી બંધ રાખવાની વાત કરવામાં આવી છે, જેથી લોકો આ કલાકો દરમિયાન તેમના સંબંધો પર ધ્યાન કેન્દ્રિત કરી શકે અને સંતાનના જન્મદર વધારવા આગળ વધી શકે.

આ સિવાય પ્રસ્તાવમાં ગૃહિણીઓને તેમના ઘરેલુ કામ માટે પગાર આપવાની વાત કરવામાં આવી છે, જે તેમનું  પેન્શનમાં ગણવામાં આવશે. આ ઉપરાંત, સરકાર પ્રથમ ડેટિંગ માટે 5,000 રુબેલ્સ (લગભગ £40) ની નાણાકીય સહાય પણ પ્રદાન કરી શકે છે, જેથી યુગલો તેમના સંબંધોને આગળ વધારવા માટે પ્રેરિત થઈ શકે.

એટલું જ નહીં, સરકારી ખર્ચે યુગલો માટે લગ્નની રાત્રિ માટે હોટેલમાં રહેવાની સુવિધા પણ ઉપલબ્ધ કરાવવાનો પ્રસ્તાવ છે, જેનો ખર્ચ અંદાજે 26,300 રુબેલ્સ (આશરે 208 પાઉન્ડ) થશે. જુદા જુદા પ્રદેશો લોકોને બાળકો પેદા કરવા માટે પ્રોત્સાહિત કરવા માટે વિવિધ પગલાં પણ અમલમાં મૂકી રહ્યા છે. ખાબોરોવસ્કમાં, 18 થી 23 વર્ષની વયની મહિલા વિદ્યાર્થીઓને જ્યારે બાળક હોય ત્યારે તેમને £900 સુધી આપવામાં આવે છે, જ્યારે ચેલ્યાબિન્સ્કમાં પ્રથમ બાળક માટે £8,500 સુધીની રકમ આપવામાં આવે છે.

વસ્તી વધારવા માટે અંગત જીવનની દેખરેખ

મોસ્કોમાં સરકારી અધિકારીઓ મહિલાઓના અંગત જીવનની ઊંડી તપાસ કરી રહ્યા છે. જાહેર ક્ષેત્રની મહિલા કર્મચારીઓને તેમના જાતીય અને પ્રજનન સ્વાસ્થ્ય સંબંધિત પ્રશ્નો ધરાવતી વિગતવાર પ્રશ્નાવલિ આપવામાં આવી છે. આ પ્રશ્નાવલી ઊંડાણપૂર્વક વ્યક્તિગત પ્રશ્નો પૂછે છે.

પ્રશ્નાવલિ ખાલી રાખનાર કર્મચારીઓને કન્સલ્ટ કરવા ડૉક્ટરને બોલાવવામાં આવ્યા હતા, જ્યાં તેમને આ પ્રશ્નો સીધા પૂછવામાં આવ્યા હતા. આ બધી યોજનાઓ અને પહેલો હોવા છતાં, વસ્તી વૃદ્ધિ માટે લેવામાં આવેલા આવા પગલાઓએ દેશમાં એક અલગ પ્રકારનું સામાજિક અને સાંસ્કૃતિક ચર્ચા શરૂ કરી છે. શું રશિયામાં સેક્સ મંત્રાલય બનાવીને વસ્તી સંકટનો ઉકેલ શોધી શકાય છે? તે જોવું રહ્યું, પરંતુ એટલું ચોક્કસ છે કે આ પહેલ સમગ્ર વિશ્વમાં ચર્ચાનો વિષય બની છે.

આ પણ વાંચો : હવે ભારત પણ વૈશ્વિક મહાસત્તાઓની યાદીમાં સામેલ થવા હક્કદાર’, વ્લાદિમીર પુતિન