સંભલ હિંસા પર યોગીનો કડક આદેશ – ‘પોસ્ટર લગાડો, ઈનામની જાહેરાત કરો, નુકસાનની વસૂલી કરો

યુપી, 27 નવેમ્બર 2024 :  યુપીમાં સંભલ રમખાણોમાં પથ્થરમારો કરનારા સોથી વધુ બદમાશોની ઓળખ કરવામાં આવી છે. યોગી સરકાર તેમની સામે કડક કાર્યવાહી કરવા જઈ રહી છે. સીએમ યોગી આદિત્યનાથે ઉચ્ચ સ્તરીય સમીક્ષા બેઠકમાં આ અંગે અધિકારીઓને સૂચનાઓ આપી છે. ટૂંક સમયમાં તેમના પોસ્ટર જાહેર સ્થળો પર લગાવવામાં આવશે. હંગામા દરમિયાન તોફાનીઓ દ્વારા જાહેર સંપત્તિને થયેલ નુકસાનની ભરપાઈ કરાવડાવામાં આવશે. તેમની પાસેથી ખોટ વસૂલ કરવામાં આવશે. યોગી સરકાર પહેલાથી જ બદમાશો અને ગુનેગારો સામે વળતર અંગે વટહુકમ બહાર પાડી ચૂકી છે. ફરાર બદમાશો પર ઈનામ પણ જાહેર થઈ શકે છે. સંભલ રમખાણોમાં અત્યાર સુધીમાં 27 બદમાશોની ધરપકડ કરવામાં આવી છે. પોલીસે તેમની તસવીરો પણ જાહેર કરી છે. દરમિયાન, મુરાદાબાદના કમિશનરે સંભલના હોબાળા અંગે સંભલ પ્રશાસન દ્વારા તૈયાર કરાયેલ અહેવાલ સરકારને મોકલી આપ્યો છે. જેમાં સરકારને તમામ પાસાઓની જાણકારી આપવામાં આવી છે. રિપોર્ટમાં પહેલા દિવસના સર્વે અને ત્યારપછીના સર્વેથી લઈને હંગામો કેવી રીતે વધ્યો અને કયા પુરાવા મળ્યા તે બધું જ મોકલવામાં આવ્યું છે.

સીએમ યોગી આદિત્યનાથે ઉચ્ચ સ્તરીય સમીક્ષા બેઠકમાં આ નિર્દેશો આપ્યા હતા. બીજી તરફ પોલીસે આરોપીઓને પકડવા માટે દરોડા પાડી રહી છે. વાતાવરણ ધીમે ધીમે સામાન્ય થઈ રહ્યું છે. મંગળવારે શાળાઓ ખુલી હતી પરંતુ બાળકોની હાજરી નહિવત રહી હતી. જો કે મંગળવારે પણ ઈન્ટરનેટ સેવા પુનઃસ્થાપિત થઈ શકી નથી. વહીવટીતંત્રે સાવચેતી રૂપે પ્રતિબંધ 24 કલાક માટે લંબાવ્યો છે. સોશિયલ મીડિયા પર પણ ઝીણવટભરી નજર રાખવામાં આવી રહી છે. જામા મસ્જિદની આસપાસના વિસ્તારોને છોડીને, શહેરના બજારો સંપૂર્ણપણે ખુલી ગયા હતા પરંતુ સન્નાટો હતો. શહેરમાં શાંતિ સ્થાપવા માટે પોલીસ અધિકારીઓ સતત પેટ્રોલિંગ કરી રહ્યા છે.

ઉલ્લેખનીય છે કે શાહી જામા મસ્જિદની પૂર્વમાં સ્થિત હરિહર મંદિરની અરજી પર કોર્ટે રમેશ રાઘવને કોર્ટ કમિશનર નિયુક્ત કર્યા છે. ગયા રવિવારે જ્યારે તેમની ટીમ બીજી વખત સર્વે માટે જામા મસ્જિદ પહોંચી ત્યારે ત્યાં હંગામો થયો હતો. ગુસ્સે ભરાયેલા લોકોએ પથ્થરમારો, ફાયરિંગ અને આગચંપી કરી હતી. હિંસા દરમિયાન ચાર લોકો માર્યા ગયા હતા, જ્યારે એક ડઝન અધિકારીઓ અને પોલીસકર્મીઓ ઘાયલ થયા હતા. સોમવારે પોલીસે એસપી સાંસદ ઝિયાઉર રહેમાન બર્ક, ધારાસભ્યના પુત્ર સુહેલ ઈકબાલ સહિત 2500 અજાણ્યા લોકો સામે કેસ નોંધ્યો છે. હિંસા દરમિયાન થયેલા નુકસાનનું વળતર આરોપીઓ પાસેથી વસૂલ કરવાનો નિર્ણય લેવામાં આવ્યો છે. મંગળવારે, પોલીસે બદમાશોની ઓળખ કરવા માટે મસ્જિદની પાછળની દુકાનોમાં લગાવેલા સીસીટીવીના ડીવીઆર પણ એકત્રિત કર્યા. જોકે, હિંસા દરમિયાન બદમાશોએ ઘણા કેમેરા તોડી નાખ્યા હતા.

આ પણ વાંચો : શું પોલીસ અમદાવાદના એ ટ્રાવેલ એજન્ટને બચાવવા માગે છે? એફિડેવિટમાં છીંડાં કેમ?