ICC T20 રેન્કિંગમાં યશસ્વી જયસ્વાલનો મોટો ધડાકો, સૂર્યકુમાર યાદવની નજીક પહોંચ્યો આ બેટ્સમેન

• ICC T20ની નવી રેન્કિંગમાં ત્રણ ભારતીય બેટ્સમેન ટોપ 10માં પોતાનું સ્થાન બનાવવામાં સફળ રહ્યા છે. સૂર્યકુમાર યાદવ ઉપરાંત યશસ્વી જસવાલ અને રૂતુરાજ ગાયકવાડનું નામ પણ આ યાદીમાં સામેલ છે

મુંબઈ, 17 જુલાઈ: ICC દ્વારા નવી T20 રેન્કિંગ જાહેર કરવામાં આવી છે. ભારતીય ટીમનો સ્ટાર બેટ્સમેન સૂર્યકુમાર યાદવ હજુ પણ નંબર વનનું સ્થાન નથી મેળવી શક્યો. પરંતુ હવે મોટી વાત એ થઈ છે કે ઈંગ્લેન્ડનો ઓપનિંગ બેટ્સમેન ફિલ સોલ્ટ સૂર્યાની ખૂબ નજીક આવી ગયો છે. તેમની વચ્ચે રેટિંગમાં કોઈ તફાવત નથી, જોકે સૂર્યકુમાર યાદવ ચોક્કસપણે રેન્કિંગમાં સોલ્ટથી આગળ છે. આ દરમિયાન ભારતના સ્ટાર બેટ્સમેનોમાંના એક બની ગયેલા યશસ્વી જયસ્વાલે ધૂમ મચાવી છે, તે જોરદાર છલાંગ લગાવવામાં સફળ રહ્યો છે.

ટ્રેવિસ ICC T20 રેન્કિંગમાં નંબર વન બેટ્સમેન

તાજેતરની T20 રેન્કિંગમાં ઓસ્ટ્રેલિયાનો ટ્રેવિસ હેડ હજુ પણ નંબર વનના સ્થાન પર છે. તે 844ના રેટિંગ પર પહોંચી ગયો છે. છેલ્લા કેટલાક અઠવાડિયાથી તે નંબર વન પર જ છે. આ દરમિયાન ભારતના સૂર્યકુમાર યાદવ બીજા નંબરે છે અને હવે તેનું નંબર ટુનું સ્થાન પણ જોખમમાં છે. નવી ICC T20 રેન્કિંગમાં સૂર્યકુમાર યાદવ 797 રેટિંગ સાથે બીજા સ્થાને છે. ઈંગ્લેન્ડના ફિલ સોલ્ટનું પણ આ જ રેટિંગ છે. તેઓ સંયુક્ત બીજા સ્થાન પર છે એમ કહી શકાય. સૂર્યને વાસ્તવમાં નુકસાન થયું છે કારણ કે તે ઝિમ્બાબ્વે સામે T20 આંતરરાષ્ટ્રીય શ્રેણી રમી રહ્યો ન હતો. પરંતુ હવે તે શ્રીલંકા સામેની શ્રેણીમાં રમતો જોવા મળશે, જેનો અર્થ છે કે તેની પાસે ફિલ સોલ્ટ કરતા ઉંચુ રેટિંગ મેળવીને પોતાનું નંબર ટુ પોઝિશન વધુ મજબૂત કરવાની અને ટ્રેવિસ હેડની નજીક જવાની તક હશે.

યશસ્વી જયસ્વાલે લગાવી લાંબી છલાંગ

આ ત્રણ ટોપ 3 ખેલાડીઓની વાત કરીએ તો પાકિસ્તાનનો બાબર આઝમ 755 રેટિંગ સાથે ચોથા નંબર પર છે. જ્યારે પાકિસ્તાનનો મોહમ્મદ રિઝવાન 746 રેટિંગ સાથે 5માં નંબર પર છે. તેમની રેન્કિંગમાં કોઈ ફેરફાર થયો નથી. ભારતના યશસ્વી જયસ્વાલે રેન્કિંગમાં જોરદાર છલાંગ લગાવી છે. તે હવે 743 રેટિંગ સાથે 6માં નંબરે પહોંચી ગયો છે. ઝિમ્બાબ્વે સામે રમાયેલી તેની ઇનિંગ્સના કારણે તે ચાર સ્થાનની છલાંગ લગાવવામાં સફળ રહ્યો છે.

રૂતુરાજ ગાયકવાડને થયું એક સ્થાનનું નુકશાન

યશસ્વી જયસ્વાલ આગળ વધવાને કારણે કેટલાક વધુ બેટ્સમેનોને નુકસાન થયું છે. ઈંગ્લેન્ડનો જોસ બટલર એક સ્થાન ગુમાવીને 716 રેટિંગ સાથે નંબર 7 પર પહોંચી ગયો છે. ભારતના રુતુરાજ ગાયકવાડનું રેટિંગ હાલમાં 684 છે અને તે પણ એક સ્થાનના નુકસાન સાથે 8માં નંબરે પહોંચી ગયો છે. 656 રેટિંગ ધરાવતા વેસ્ટ ઈન્ડિઝના બ્રેન્ડન કિંગ એક સ્થાન નીચે નં.9 પર આવી ગયા છે. વેસ્ટ ઈન્ડિઝનો જોનસન ચાર્લ્સ 655 રેટિંગ સાથે દસમા નંબર પર છે, તેને પણ એક સ્થાનનું નુકસાન થયું છે. આ દરમિયાન સાઉથ આફ્રિકાનો એડન માર્કરામ ટોપ 10માંથી બહાર થઈ ગયો છે અને 11માં નંબર પર પહોંચી ગયો છે. તેનું રેટિંગ 646 છે.

આ પણ વાંચો: IND vs SL: રોહિત શર્મા રમી શકે છે શ્રીલંકા સામેની વનડે સીરીઝ, જાણો