વર્લ્ડ ટેસ્ટ ચેમ્પિયનશિપ : આફ્રિકા અને ઓસ્ટ્રેલિયા વચ્ચેનો મેચ ડ્રો, બીજા નંબર માટે ભારત ફેવરીટ

દક્ષિણ આફ્રિકા અને ઓસ્ટ્રેલિયા વચ્ચે ત્રણ મેચની ટેસ્ટ શ્રેણીની છેલ્લી મેચ ડ્રોમાં સમાપ્ત થઈ હતી. ઓસ્ટ્રેલિયાએ આ સીરીઝની પ્રથમ બે મેચ જીતી લીધી હતી અને પહેલા જ સીરીઝ જીતી લીધી હતી. આ પછી ત્રીજી મેચ ડ્રો રહી હતી અને ઓસ્ટ્રેલિયાએ શ્રેણી 2-0થી જીતી લીધી હતી. જો કે, જો ઓસ્ટ્રેલિયન ટીમ ત્રીજી મેચ જીતી શકી તો તે સાઉથ આફ્રિકાને ક્લીન સ્વીપ કરીને વર્લ્ડ ટેસ્ટ ચેમ્પિયનશિપમાં પોતાનું સ્થાન મજબૂત કરી શકે છે. જો કે આ મેચ ડ્રોમાં પુરી થતા ભારતને ફાયદો પણ થયો છે. વર્લ્ડ ટેસ્ટ ચેમ્પિયનશિપની ફાઇનલમાં ઓસ્ટ્રેલિયાનું સ્થાન લગભગ નિશ્ચિત છે. ત્યારે ભારત સિવાય શ્રીલંકા અને દક્ષિણ આફ્રિકાની ટીમો બીજા સ્થાન માટે સ્પર્ધા કરી રહી છે. જોકે ઓસ્ટ્રેલિયા સામેની શ્રેણીમાં ખરાબ પ્રદર્શન બાદ દક્ષિણ આફ્રિકાની ટીમ આ રેસમાં પાછળ રહી ગઈ છે.

ઓસ્ટ્રેલિયા પછી ભારતનો દાવો સૌથી મજબૂત છે

ઓસ્ટ્રેલિયા વર્લ્ડ ટેસ્ટ ચેમ્પિયનશિપના પોઈન્ટ ટેબલમાં ટોપ પર છે. ઓસ્ટ્રેલિયાએ અત્યાર સુધીમાં 75.56 ટકા પોઈન્ટ મેળવ્યા છે. તે જ સમયે, બીજા સ્થાને રહેલા ભારતે 58.93 ટકા પોઈન્ટ મેળવ્યા છે. શ્રીલંકાની ટીમ 53.33 ટકા પોઈન્ટ સાથે ત્રીજા અને દક્ષિણ આફ્રિકા 48.72 ટકા પોઈન્ટ સાથે ચોથા ક્રમે છે. ઓસ્ટ્રેલિયા અને ભારત વચ્ચેની ચાર મેચની ટેસ્ટ શ્રેણી વર્લ્ડ ટેસ્ટ ચેમ્પિયનશિપની દ્રષ્ટિએ ખૂબ જ મહત્વપૂર્ણ છે. આ શ્રેણીમાં વધુ સારું પ્રદર્શન કરીને બંને ટીમો ફાઇનલમાં પોતાનું સ્થાન નિશ્ચિત કરવા ઇચ્છશે. જોકે, ઓસ્ટ્રેલિયાને માત્ર 4-0 થી હારથી બચવાની જરૂર છે, જ્યારે ભારતને ફાઇનલમાં પહોંચવા માટે ઓછામાં ઓછી સિરીઝ જીતની જરૂર છે. ભારત માટે સારી વાત એ છે કે આ શ્રેણી ભારતની ધરતી પર જ યોજાવાની છે.

શ્રીલંકાને ન્યૂઝીલેન્ડ સાથે રમવું જોઈશે

ત્રીજા સ્થાને રહેલી શ્રીલંકા માટે ફાઇનલમાં પહોંચવાનો રસ્તો મુશ્કેલ છે. શ્રીલંકાને હવે રમવા માટે ન્યુઝીલેન્ડ જવું પડશે. આવી સ્થિતિમાં શ્રીલંકાની ટીમ માટે ન્યૂઝીલેન્ડને ઘરઆંગણે હરાવવું ઘણું મુશ્કેલ હશે. આ સાથે જ દક્ષિણ આફ્રિકાએ હવે વેસ્ટ ઈન્ડિઝ સામે ઘરઆંગણે બે ટેસ્ટ મેચ રમવાની છે. આફ્રિકાની ટીમ બંને મેચ સરળતાથી જીતી શકે છે, પરંતુ જો તે બંને મેચ જીતી જાય તો પણ દક્ષિણ આફ્રિકા માટે ભારતને પાછળ છોડવું આસાન નહીં હોય.