વિશ્વ ધ્યાન દિવસ-2024: ગુજરાત યુનિવર્સિટીના સેનેટ હોલમાં મુખ્ય કાર્યક્રમનું આયોજન

• ગુજરાત રાજ્ય યોગ બોર્ડ દ્વારા ધ્યાનના માધ્યમથી મનની શાંતિ અને આત્મશુદ્ધીનો સંદેશ આપવામાં આવશે

અમદાવાદ, 21 ડિસેમ્બર: ગુજરાત યુનિવર્સિટીના સેનેટ હોલમાં વિશ્વ ધ્યાન દિવસ-2024 નિમિતે આજે શનિવારે પરમ પૂજ્ય શિવકૃપાનંદ સ્વામીની અધ્યક્ષતામાં મુખ્ય કાર્યક્રમ યોજાશે. યોગ અને ધ્યાનની ભવ્ય ઉજવણીમાં ગુજરાત રાજ્ય યોગ બોર્ડ દ્વારા ધ્યાનના માધ્યમથી મનની શાંતિ અને આત્મશુદ્ધીનો સંદેશ આપવામાં આવશે. વિશ્વ ધ્યાન દિવસ-2024 નિમિતે ગુજરાત રાજ્ય યોગ બોર્ડ દ્વારા નવતર પ્રયાસ હાથ ધરવામાં આવ્યો છે. જેના ભાગરૂપે રાજ્યના વિવિધ શહેરો અને ગામડાઓ મળીને કુલ 40 સ્થળોએ વિશેષ કાર્યક્રમોનો આયોજન કરવામાં આવ્યું છે.

ભારત માટે ગૌરવપૂર્ણ અને ઐતિહાસિક ક્ષણ

યુનાઇટેડ નેશન્સ (UNO) દ્વારા 21 ડિસેમ્બરને ‘વિશ્વ ધ્યાન દિવસ’ તરીકે ઘોષિત કરવું ભારત માટે ગૌરવપૂર્ણ અને ઐતિહાસિક ક્ષણ છે. વિશ્વ ધ્યાન દિવસ-2024ની ઉજવણી સૌપ્રથમ વાર આજે શનિવારે સમગ્ર વિશ્વમાં કરવામાં આવશે. ભારતની પ્રાચીન મજબૂત યોગ અને ધ્યાન પરંપરાઓને જીવનના એક પવિત્ર ભાગ તરીકે ગણવામાં આવે છે. આ પ્રાચીન વિજ્ઞાન આજે તણાવમુક્ત અને આધુનિક જીવન માટે ઉત્તમ ઉપાય બની ગયું છે. પ્રધાનમંત્રી નરેન્દ્ર મોદીના દ્રઢ પ્રયત્નોથી, યોગ અને ધ્યાનને વૈશ્વિક સ્તરે સ્વીકાર અને લોકપ્રિયતા મળી રહી છે. આજે તે માનવજાત માટે આશાનું પ્રતીક બનીને દરેક નાગરિકોને એકતા અને શક્તિનો સંદેશ આપે છે.

યોગ બોર્ડના ચેરમેન યોગસેવક શીશપાલના માર્ગદર્શનમાં ગુજરાત રાજ્ય યોગ બોર્ડ તેમજ સમર્પણ ધ્યાન, પતંજલિ યોગ સમિતિ, હાર્ટફુલનેસ, આર્ટ ઓફ લિવિંગ તેમજ વિપાષ્યના જેમ યોગ અને ધ્યાન સાથે સંલગ્ન અન્ય સંસ્થાઓ દ્વારા આજે 21 ડિસેમ્બરના રોજ વિશ્વ ધ્યાન દિવસની ઉજવણી વિશાળ અને પ્રેરણાત્મક રીતે કરવામાં આવશે. ‘વિશ્વ ધ્યાન દિવસ–2024’નો મુખ્ય કાર્યક્રમ અમદાવાદના ગુજરાત યુનિવર્સિટી સેનેટ હોલમાં પરમ પૂજ્ય શિવકૃપાનંદ સ્વામીની અધ્યક્ષતામાં યોજાશે તેમજ નવા સચિવાલય ખાતે ધ્યાનનું વિશેષ ટેકનીકલ સત્ર પણ યોજાશે. વિશ્વ ધ્યાન દિવસના વિશેષ કાર્યક્રમો રાજ્યના વિવિધ શહેરો-ગામડાઓ મળીને કુલ 40 સ્થળોએ યોજાશે. જેમા લાખો નાગરીકો સહભાગી બનીને શરીરમાં શાંતિ, સુખ, અને તદુરસ્તી લાવશે.

આ પણ જૂઓ: અમદાવાદના ભારતીય માનક બ્યૂરો દ્વારા વિદ્યાર્થીઓ માટે J.K. સિમેન્ટ વર્ક્સની એક્સપોઝર વિઝિટ