શ્રીલંકા સામે વર્લ્ડ ચેમ્પિયન ઓસ્ટ્રેલિયાની જીત : સ્ટોઈનિસે 17 બોલમાં ફટકારી અર્ધી સદી

વર્લ્ડ ચેમ્પિયન ઓસ્ટ્રેલિયાએ T20 વર્લ્ડ કપમાં જોરદાર વાપસી કરી છે. પ્રથમ મેચમાં ન્યુઝીલેન્ડ સામે હાર્યા બાદ તેણે બીજી મેચમાં શ્રીલંકાને 7 વિકેટે હરાવ્યું છે. ટોસ હાર્યા બાદ બેટિંગ કરવા ઊતરેલી શ્રીલંકાની ટીમે 120 રનના સ્કોર પર 6 વિકેટ ગુમાવી દીધી હતી. ત્યાર બાદ અસલંકા અને ચમિકા કરુણારત્નેએ સાતમી વિકેટની ભાગીદારીમાં 15 બોલમાં 37 રન જોડી ટીમનો સ્કોર 157 સુધી પહોંચાડ્યો હતો.  શ્રીલંકાએ ઓસ્ટ્રેલિયાને જીતવા માટે 158 રનનો ટાર્ગેટ આપ્યો હતો, જેમાં ઓપનર પથુમ નિશંકાએ 40 રન અને ચરિત અસલંકાએ અણનમ 37 રન બનાવ્યા હતા. ઓસ્ટ્રેલિયા તરફથી પાંચેય બોલરોએ 1-1 વિકેટ ઝડપી હતી.

આ પણ વાંચો : શું પાકિસ્તાન સામે અન્યાય થયો ? #NoBall અને #DeadBall પર જાણો ICC ના નિયમો શું કહે છે

જવાબમાં લક્ષ્યનો પીછો કરતાં ઓસ્ટ્રેલિયાએ 16.3 ઓવરમાં જ 3 વિકેટનાં નુકસાને ટાર્ગેટ હાંસલ કરી લીધો હતો. ઓસ્ટ્રેલિયા તરફથી માર્કસ સ્ટોઈનિસે મેચમાં ધમાકેદાર બેટિંગ કરતા 18 બોલમાં 59 રન બનાવ્યા હતા. તે જ સમયે , કેપ્ટન એરોન ફિન્ચે 42 બોલમાં 31 રન આવ્યા હતા. શ્રીલંકા તરફથી મહેશ થિક્શાના, ધનંજય ડી સિલ્વા અને ચમિકા કરુણારત્નેને 1-1 વિકેટ મળી હતી

માર્કસ સ્ટોઈનિસે 17 બોલમાં ફટકારી અર્ધી સદી

સ્ટોઇનિસે માત્ર 17 બોલમાં પોતાની અર્ધી સદી પૂરી કરી હતી. માર્કસ સ્ટોઈનિસે 327.78ની રનરેટથી 6 છગ્ગા અને 4 ચોગ્ગાની મદદથી પોતાની ફિફ્ટી પૂરી કરી હતી. માર્કસ સ્ટોઈનિસ આ વર્લ્ડ કપમાં સૌથી ઝડપી ફિફ્ટી પૂરી કરનાર પહેલો બેટર બની ચુક્યો છે.