મહિલા IPL માર્ચમાં રમાવાની શક્યતા, પાંચ ટીમોની વચ્ચે ટક્કર થવાની સંભાવના

એક તરફ બીસીસીઆઈમાં નવા અધિકારીઓની પસંદગીને લઈને ભારે ધમાલ ચાલી રહી છે. બીજી તરફ આગામી વર્ષથી મહિલા IPLની માહિતી સામે આવી છે. એક ન્યૂઝ એજન્સીના જણાવ્યા અનુસાર મહિલા આઈપીએલ આવતા વર્ષે માર્ચથી શરૂ થવા જઈ રહી છે. પ્રથમ સિઝનમાં પાંચ ટીમો રમી શકે છે. પુરુષોની IPL પહેલા મહિલા IPL રમાશે. આ લીગ શરૂ થતાં જ ભારત ઓસ્ટ્રેલિયા અને ઈંગ્લેન્ડ જેવા દેશોની યાદીમાં સામેલ થઈ જશે. મહિલા બિગ બેશ ઓસ્ટ્રેલિયામાં રમાય છે, જ્યારે ઈંગ્લેન્ડ વિમેન્સ હંડ્રેડ ટૂર્નામેન્ટ રમાય છે.

શું રહેશે મહિલા IPL ના નિયમો અને કાર્યક્રમની રૂપરેખા ?

સમાચાર એજન્સીના જણાવ્યા અનુસાર, ટૂર્નામેન્ટમાં 20 લીગ રાઉન્ડની મેચો રમાશે અને તમામ ટીમો એકબીજા સામે બે વખત રમશે. ટેબલમાં ટોચ પર રહેનારી ટીમો સીધી ફાઇનલમાં પહોંચશે. તે જ સમયે, બીજા અને ત્રીજા સ્થાને રહેલી ટીમો એલિમિનેટર રમશે. એક ટીમના પ્લેઈંગ-11માં વધુમાં વધુ પાંચ વિદેશી ખેલાડીઓનો સમાવેશ થઈ શકે છે. આ સિવાય ટીમમાં પાંચથી વધુ વિદેશી ખેલાડીઓ ન હોઈ શકે. પાંચ વિદેશી ખેલાડીઓમાંથી, ICCના સંપૂર્ણ સભ્યોમાંથી ચાર કરતાં વધુ નહીં અને ICCના સહયોગી સભ્યોમાંથી એક વ્યક્તિ દરેક ટીમની પ્લેઈંગ ઈલેવનનો ભાગ હોઈ શકે છે. ઓસ્ટ્રેલિયામાં મહિલા બિગ બેશ લીગ અને યુકેમાં ધ હન્ડ્રેડમાં ત્રણથી વધુ વિદેશી ખેલાડીઓને મંજૂરી નથી અને તેમની ટીમનું કદ 15 છે.

મહિલા T20 વર્લ્ડ કપ પછી તરત જ મહિલા IPL થવાની ધારણા

બોર્ડનું એવું પણ માનવું છે કે ઓછી ટીમોને કારણે હોમ અને અવે ફોર્મેટનો અમલ કરી શકાતો નથી. દક્ષિણ આફ્રિકામાં 9 થી 26 ફેબ્રુઆરી દરમિયાન યોજાનાર મહિલા T20 વર્લ્ડ કપ પછી તરત જ મહિલા IPL થવાની ધારણા છે. બીસીસીઆઈના મતે, પાંચથી છ ટીમો સાથે દરરોજ એક મેચ રમવી શક્ય નથી. આવી સ્થિતિમાં એક ગ્રાઉન્ડ પર દસ મેચ અને બીજા ગ્રાઉન્ડ પર દસ મેચ રમી શકાય છે.

કેવી રીતે બની શકે છે ક્રિકેટ ટીમ ?

જ્યાં સુધી ટીમોના વેચાણનો સંબંધ છે, તે ઝોનના આધારે નક્કી કરી શકાય છે. દરેક ઝોનમાંથી બે શહેરોને શોર્ટલિસ્ટ કરી શકાય છે. આમાં ધર્મશાલા/જમ્મુ (ઉત્તર ઝોન), પુણે/રાજકોટ (પશ્ચિમ ઝોન), ઇન્દોર/નાગપુર/રાયપુર (મધ્ય ઝોન), રાંચી/કટક (પૂર્વ ઝોન), કોચી/વિઝાગ (દક્ષિણ ઝોન) અને ગુવાહાટી (ઉત્તર પૂર્વ ઝોન) નો સમાવેશ થાય છે. મહિલા આઈપીએલની મેચો તે શહેર દ્વારા યોજવામાં આવી શકે છે જે હાલમાં પુરુષોની આઈપીએલનું આયોજન કરી રહ્યું છે. જેમાં અમદાવાદ, બેંગલુરુ, ચેન્નાઈ, દિલ્હી, કોલકાતા અને મુંબઈનો સમાવેશ થાય છે. જોકે, મહિલા IPLને લગતી તમામ બાબતો પર અંતિમ નિર્ણય IPL ગવર્નિંગ કાઉન્સિલ અને BCCIના પદાધિકારીઓ દ્વારા લેવામાં આવશે.