શું વંદે ભારત ટ્રેનનું ભાડું ઓછું થશે? આ કારણોસર રેલવે ડિપાર્ટમેન્ટ સમીક્ષા કરવા જઈ રહ્યો છે

ખાલી સીટોને ધ્યાનમાં રાખીને રેલવે કેટલીક ટૂંકા અંતરની વંદે ભારત ટ્રેનોમાં ભાડાની સમીક્ષા કરી રહી છે. સૂત્રોએ બુધવારે (5 જુલાઈ) આ માહિતી આપી હતી. સૂત્રોના જણાવ્યા અનુસાર, કેટલીક ટૂંકા અંતરની વંદે ભારત ટ્રેનોમાં સીટો સંપૂર્ણ રીતે ભરાઈ રહી નથી. આવી સ્થિતિમાં, રેલવે તેમના ભાડાની સમીક્ષા કરીને તેમને આકર્ષક બનાવવાની યોજના બનાવી રહી છે. જેથી વધારે સંખ્યામાં લોકો તેમાં મુસાફરી કરવા પ્રેરાઈ શકે.

ઈન્દોર-ભોપાલ, ભોપાલ-જબલપુર અને નાગપુર-બિલાસપુર જેવી વંદે ભારત ટ્રેનોના ભાડાની સમીક્ષા કરવામાં આવી રહી છે. આ ટ્રેનોમાં સીટો ઘણી હદ સુધી ખાલી ચાલી રહી છે. સમાચાર એજન્સી પીટીઆઈ દ્વારા જૂન સુધી પ્રાપ્ત સત્તાવાર માહિતી અનુસાર, ભોપાલ-ઈન્દોર વંદે ભારત ટ્રેનમાં માત્ર 29 ટકા બેઠકો હતી જ્યારે ઈન્દોર-ભોપાલ ટ્રેનમાં 21 ટકા બેઠકો આરક્ષિત હતી.

“ભાડામાં ઘટાડો સારો વિકલ્પ બની શકે છે”

આ વંદે ભારત ટ્રેનોમાં લગભગ ત્રણ કલાકની મુસાફરી કરવા માટે એસી ચેરનું ભાડું 950 રૂપિયા છે જ્યારે એક્ઝિક્યુટિવ ચેરનું ભાડું 1525 રૂપિયા છે. સૂત્રોએ જણાવ્યું કે આ ટ્રેનના ભાડાની રેલવે દ્વારા સમીક્ષા કરવામાં આવી શકે છે.

દેશની સૌથી આધુનિક અને ઝડપી વંદે ભારત ટ્રેનની સૌથી લાંબી મુસાફરી લગભગ 10 કલાકની છે જ્યારે સૌથી ટૂંકી મુસાફરી 3 કલાકની છે.

રેલવેના એક વરિષ્ઠ અધિકારીએ જણાવ્યું હતું કે, “આની પાછળનો વિચાર એ છે કે તમામ વંદે ભારત ટ્રેનોમાં મુસાફરોને આરામદાયક મુસાફરી કરવાનો મોકો મળવો જોઈએ.” અમે પરિસ્થિતિની સમીક્ષા કરી છે અને અમે અભિપ્રાય આપ્યો છે કે કેટલીક વંદે ભારત ટ્રેનો, ખાસ કરીને ટૂંકા અંતરની ટ્રેનો, જો ભાડા ઘટાડવામાં આવે તો તે મુસાફરો અને રેલ્વે વિભાગ માટે વધુ સારું રહેશે. અમે ઈચ્છીએ છીએ કે આ ટ્રેનોમાં વધુને વધુ લોકો મુસાફરી કરે.’

આ ટ્રેનોનું પ્રદર્શન શ્રેષ્ઠ રહ્યુ છે

કેટલીક વંદે ભારત ટ્રેનોમાં ખાલી રહેતી સીટોની સમસ્યાને દૂર કરવા માટે ભાડાની સમીક્ષા કરવામાં આવી રહી છે. જો કે વંદે ભારત ટ્રેનોમાં સીટો લગભગ ભરેલી હોય છે પરંતુ કેટલીક ટ્રેનોમાં એવું નથી. તેમને પણ સફળ બનાવવા માટે રેલવે જરૂરી ફેરફારો કરવા જઈ રહી છે. અત્યાર સુધીમાં દેશના 24 રાજ્યો અને કેન્દ્રશાસિત પ્રદેશોમાં વંદે ભારત ટ્રેનો ચાલી રહી છે.

તેમાંથી કાસરગોડ-ત્રિવેન્દ્રમ એક્સપ્રેસમાં 183 ટકા બુકિંગ રહે છે અને તે શ્રેષ્ઠ પ્રદર્શન કરતી વંદે ભારત ટ્રેન છે. ગાંધીનગર-મુંબઈ સેન્ટ્રલ, વારાણસી-નવી દિલ્હી, દેહરાદૂન-અમૃતસર અને મુંબઈ-શોલાપુર વચ્ચે ચાલતી વંદે ભારત ટ્રેનોમાં પણ 100 ટકાથી વધુ બુકિંગ રહે છે.

આ પણ વાંચો: Chandrayaan-3 Mission: લોન્ચ વ્હીકલમાં ઉમેરવામાં આવ્યો ચંદ્રયાન-3નો આ મહત્વપૂર્ણ હિસ્સો