ઉદ્ધવ ઠાકરેની શિવસેના ‘યુનિફોર્મ સિવિલ કોડ’નું સમર્થન કરશે કે વિરોધ?

મહારાષ્ટ્રના પૂર્વ સીએમ ઉદ્ધવ ઠાકરેની પાર્ટી શિવસેના (UBT) યુનિફોર્મ સિવિલ કોડ (UCC)ને સમર્થન આપી શકે છે. સૂત્રોએ આ માહિતી આપી છે. ઔપચારિક રીતે, ઉદ્ધવ ઠાકરેના પક્ષના કોઈપણ નેતાએ યુનિફોર્મ સિવિલ કોડ અંગે કોઈ સત્તાવાર નિવેદન આપ્યું નથી, તેમ છતાં સૂત્રોના જણાવ્યા અનુસાર જો UCCનું બિલ સંસદમાં લાવવામાં આવશે, તો ઉદ્ધવ ઠાકરેની પાર્ટી તેને ટેકો આપશે.

મહત્વનું છે કે સ્વ. બાળાસાહેબ ઠાકરેના 3 મહત્વના સપના હતા – 1. અયોધ્યામાં રામ મંદિર, 2. કાશ્મીરમાંથી 370 હટાવવી અને 3. દેશમાં સમાન નાગરિક સંહિતાનો અમલ (UCC) ઉદ્ધવ ઠાકરેએ 20 જૂને પ્રેસ કોન્ફરન્સમાં UCCને સમર્થન આપવાની વાત કરી હતી. આ સાથે તેમણે સવાલો પણ ઉઠાવ્યા હતા.

સંજય રાઉતનું શું કહેવું છે?

શિવસેના (UBT)ના સાંસદ સંજય રાઉતનું કહેવું છે કે યુનિફોર્મ સિવિલ કોડનો ડ્રાફ્ટ આવ્યો નથી. આવી સ્થિતિમાં અમે તેની વિરુદ્ધ છીએ તે કહેવું ખોટું છે. ડ્રાફ્ટ આવ્યા બાદ જ ઉદ્ધવ ઠાકરેની શિવસેના પોતાની ભૂમિકા સ્પષ્ટ કરશે.

ચોમાસુ સત્રમાં બિલ લાવી શકે છે સરકાર

મહત્વનું છે કે સરકાર સંસદના ચોમાસુ સત્રમાં યુનિફોર્મ સિવિલ કોડ બિલ લાવી શકે છે. સંસદીય સ્થાયી સમિતિએ યુનિફોર્મ સિવિલ કોડ (UCC)ના મુદ્દા પર વિવિધ હિતધારકોના મંતવ્યો મેળવવા માટે કાયદા પંચ દ્વારા જારી કરાયેલી તાજેતરની નોટિસ પર (કાયદો) કમિશન અને કાયદા મંત્રાલયના પ્રતિનિધિઓને 3 જુલાઈએ બોલાવ્યા છે.

NCPએ પણ UCC અંગે પોતાનું વલણ સ્પષ્ટ કર્યું

શિવસેના (UBT)ની સહયોગી પાર્ટી NCP પ્રમુખ શરદ પવારે પણ UCCના સમર્થનને લઈને નિવેદન આપ્યું છે. તેમણે ગુરુવારે કહ્યું હતું કે સરકાર દ્વારા કેટલીક બાબતોની સ્પષ્ટતા કર્યા પછી તેમની પાર્ટી સમાન નાગરિક સંહિતા પર પોતાનું વલણ નક્કી કરશે.

મહારાષ્ટ્ર કોંગ્રેસે UCC અંગે સમિતિની કરી રચના

પવારે કહ્યું કે તેઓ UCCને સમર્થન આપવા ઈચ્છુક નથી. તેથી શીખ સમુદાયના અભિપ્રાયને ધ્યાનમાં લીધા વિના UCC પર નિર્ણય લેવો યોગ્ય રહેશે નહીં. આ સિવાય મહારાષ્ટ્ર કોંગ્રેસે યુનિફોર્મ સિવિલ કોડની અસરનો અભ્યાસ કરવા માટે મુંબઈ યુનિવર્સિટીના ભૂતપૂર્વ વાઇસ ચાન્સેલર બાલચંદ્ર મુંગેકરના નેતૃત્વમાં નવ સભ્યોની સમિતિની રચના કરી છે.

આ પણ વાંચો: UCC અંગે મુસ્લિમ પર્સનલ લો બોર્ડે કાયદા પંચને લખ્યો પત્ર, સમાન નાગરિક સંહિતાને લઈ માંગ