ભારત-પાકિસ્તાન મેચ રદ્દ થશે ?  જાણો શું છે કારણ ? 

T20 વર્લ્ડ કપ શરૂ થવામાં હવે ગણતરીના દિવસો જ બાકી છે. ભારતીય ટીમ આ ટુર્નામેન્ટની પહેલી મેચ પાકિસ્તાન સામે રમશે. ભારત-પાકિસ્તાન સહિત વિશ્વભરના કરોડ ક્રિકેટ ફેન્સ આ મેચની આતુરતાથી રાહ જોઈ રહ્યા છે. તેવામાં આ મેચને લઈ એક મહત્વનાં સમાચાર સામે આવ્યાં છે. આ સમાચારથી ક્રિકેટ પ્રેમીઓના દિલ પણ તૂટી શકે છે.

આ પણ વાંચો : ક્રિકેટ ફિવર : ભારત-પાકિસ્તાન મેચની 90 હજાર ટિકિટો માત્ર 10 મિનિટમાં વેચાઈ ગઈ

આ કારણે મેચ રદ્દ થઈ શકે છે

વર્લ્ડ કપની સૌથી મોટી મેચ ભારત અને પાકિસ્તાન વચ્ચે રમાશે. આ મેચને ક્રિકેટ જગતમાં સૌથી મોટી રાઈવલરી માનવામાં આવે છે, તેથી જ તમામ ક્રિકેટ પ્રેમીઓ આ મેચની આતુરતાથી રાહ જોઈ રહ્યા છે. આ બંને ટીમો વચ્ચેની મેચ 23 ઓક્ટોબરે મેલબોર્ન ક્રિકેટ ગ્રાઉન્ડ પર રમાશે,પરંતુ આ મેચ થવાની શક્યતા ઓછી છે. સમાચાર આવ્યાં છે કે આ મેચ વરસાદને કારણે રદ્દ થઈ શકે છે.

વરસાદ બની શકે છે વિલન

વર્લ્ડ કપના શેડ્યૂલ મુજબ ભારત અને પાકિસ્તાન વચ્ચે આ મેચ 23 ઓક્ટોબરે મેલબોર્નમાં રમાશે. પરંતુ હવામાન વિભાગની આગાહી અનુસાર, 23 ઓક્ટોબરે મેલબોર્નમાં વરસાદ પડી શકે છે. મેલબોર્નમાં 20 ઓક્ટોબરથી 28 ઓક્ટોબર સુધી વરસાદની શક્યતા છે. આવી સ્થિતિમાં આ મેચની આતુરતાથી રાહ જોઈ રહેલા તમામ ક્રિકેટ પ્રેમીઓના દિલ તૂટી શકે છે. હવામાનની આગાહી અનુસાર, 23 ઓક્ટોબરે વરસાદની 60% શક્યતા છે.

મેચ રદ્દ થાય તો શું થશે

ભારે વરસાદને લીધે જો આ મેચ રદ થાય છે તો બંને ટીમને 1-1 અંક મળશે. આઇસીસીએ આ સંબંધિત નિર્દેશન પહેલાં જ જાહેર કરી ચૂકી છે. ખાસ વાત તો  એ છે કે સુપર 12 સ્ટેજની મેચો માટે કોઇ રિઝર્વ ડે પણ ફાળવવામાં આવ્યો નથી. તેથી રદ થયેલ મેચ બીજા દિવસે રમવાનું પણ શક્ય બનશે નહીં.

મેચની તમામ ટિકિટો વેચાઈ ચૂકી છે.

વિશ્વભરના ક્રિકેટ પ્રેમીઓ ભારત અને પાકિસ્તાન વચ્ચેની મેચની આતુરતાથી રાહ જોઈ રહ્યા છે. ભારત અને પાકિસ્તાન વચ્ચેની આ શાનદાર મેચની તમામ ટિકિટો પણ વેચાઈ ચૂકી છે. ભારતીય ચાહકો ગયા વર્ષે  T20 વર્લ્ડ કપમાં પાકિસ્તાનના હાથે મળેલી હારનો બદલો લેવા માટે રાહ જોઈ રહ્યા છે. આવી સ્થિતિમાં હવામાનનો આવો મિજાજ કરોડો ચાહકોના દિલ તોડી શકે છે.

ભારત અને પાકિસ્તાન  : T20 માં હેડ ટુ હેડ

ભારત અને પાકિસ્તાન વચ્ચે T20 ઈન્ટરનેશનલમાં કુલ 11 મેચ રમાઈ છે. જેમાંથી 8 મેચ ભારતે જીતી છે. જ્યારે 3 મેચ પાકિસ્તાને જીતી છે. પરંતુ ગત વર્લ્ડ કપમાં મળેલી હારને કારણે ભારતીય ટીમ અને તેનાં ફેન્સ બદલો લેવા માટે રાહ જોઈ રહ્યા છે. આ વર્ષે એશિયા કપમાં પણ બંને ટીમો વચ્ચે બે મેચ રમાઈ હતી. જેમાંથી એક મેચ ભારતે અને એક મેચ પાકિસ્તાને જીતી હતી.