GST રિફોર્મ લાગુ થઈ ગયા પછી સસ્તા થઈ જશે પેટ્રોલ- ડિઝલ? સિગારેટ અને દારુ મોંઘા થશે
નવી દિલ્હી, 18 ઓગસ્ટ 2025: આગામી દિવાળી અથવા તે પછી GST (ગુડ્સ એન્ડ સર્વિસ ટેક્સ)માં મોટા સુધારા જોવા મળી શકે છે. વડાપ્રધાન નરેન્દ્ર મોદીએ આની જાહેરાત પહેલા જ કરી દીધી છે. તેમણે લાલ કિલ્લા પરથી જણાવ્યું હતું કે આગામી સમયમાં GSTમાં મોટા ફેરફારો કરવામાં આવશે, જેનાથી રોજિંદી જરૂરિયાતની ચીજવસ્તુઓ સસ્તી થશે. હવે સવાલ ઉઠી રહ્યો છે કે શું પેટ્રોલ અને ડીઝલ પણ GSTના દાયરામાં આવશે? અને જો આવશે તો તેને કયા સ્લેબમાં મૂકવામાં આવશે?
પેટ્રોલ-ડીઝલ પર GST હજુ દૂર
બિઝનેસ ટુડેના અહેવાલ મુજબ, એક અધિકારીએ સ્પષ્ટ કર્યું કે પેટ્રોલિયમ ઉત્પાદનોને GSTના દાયરામાં લાવવામાં હજુ સમય લાગશે. એટલે કે, GST 2.0 લાગુ થયા પછી પણ તમારું પેટ્રોલ-ડીઝલનું બિલ ઓછું થશે નહીં.
સિગારેટ અને દારૂ પર 40 ટકા GST
વિત્ત મંત્રાલયએ હાલમાં ખાસ દરો સાથે બે GST સ્લેબનો પ્રસ્તાવ ગ્રુપ ઓફ મિનિસ્ટર્સ (GoM)ને મોકલ્યો છે. અહેવાલો મુજબ, સિગારેટ, તમાકુ અને દારૂને 40 ટકાના GST સ્લેબમાં મૂકવામાં આવી શકે છે. જો આવું થશે તો આ ઉત્પાદનો માટે ગ્રાહકોને વધુ નાણાં ચૂકવવા પડશે.
પેટ્રોલ-ડીઝલ અને દારૂથી સરકારની મોટી કમાણી
પેટ્રોલિયમ ઉત્પાદનો હોય કે દારૂ અને તમાકુ, આ બધું સરકારની આવકનો મોટો સ્ત્રોત છે. આથી સરકાર આવા ઉત્પાદનો પર કોઈ નિર્ણય લેતા પહેલા ઊંડી ચર્ચા કરશે. નોંધનીય છે કે GST કાઉન્સિલની બેઠક સપ્ટેમ્બરમાં યોજાઈ શકે છે. હવે જોવાનું રહેશે કે ગ્રુપ ઓફ મિનિસ્ટર્સ કયા પ્રસ્તાવો પર સહમત થાય છે અને કયા પર નહીં.
દિવાળીએ સામાન્ય માણસને રાહત
જોકે, પેટ્રોલિયમ ઉત્પાદનોને GSTથી બહાર રાખવામાં આવે તો પણ, વડાપ્રધાન નરેન્દ્ર મોદીની જાહેરાત બાદ એક વાત સ્પષ્ટ છે કે આ દિવાળીએ સામાન્ય નાગરિકોને મોટી રાહત મળી શકે છે. ટીવી, ફ્રિજ, ગાડી, કપડાં, દવાઓ જેવી જરૂરિયાતની ચીજવસ્તુઓ પર GST ઘટાડી શકાય છે. આ ઉપરાંત, વીમા પર લાગતા GSTમાં પણ ઘટાડો થઈ શકે છે.
GST રિફોર્મ્સ સાથે સરકારનો ઉદ્દેશ્ય સામાન્ય નાગરિકોની જરૂરિયાતની ચીજવસ્તુઓને સસ્તી કરવાનો છે, પરંતુ પેટ્રોલ-ડીઝલને GSTના દાયરામાં લાવવું હજુ દૂરની વાત લાગે છે. બીજી તરફ, સિગારેટ, તમાકુ અને દારૂ જેવા ઉત્પાદનો પર 40 ટકા GST લાગુ થવાથી તેની કિંમતોમાં વધારો થઈ શકે છે. GST કાઉન્સિલની આગામી બેઠકમાં આ પ્રસ્તાવો પર નિર્ણય લેવાશે, જેનાથી આ સુધારાઓની દિશા સ્પષ્ટ થશે.
આ પણ વાંચો : મુખ્ય ચૂંટણી કમિશનર સામે મહાભિયોગ લાવવા અંગે વિચારણા કરવા માટે વિપક્ષ એકત્ર થયો
