શું અરવિંદ કેજરીવાલને મળશે જામીન? દિલ્હી હાઈકોર્ટે નિર્ણય રાખ્યો અનામત

નવી દિલ્હી, 17 જુલાઈ: મુખ્યમંત્રી અરવિંદ કેજરીવાલના વચગાળાના જામીન અને CBI દ્વારા તેમની ધરપકડને પડકારતી અરજી પર દિલ્હી હાઈકોર્ટે પોતાનો ચુકાદો અનામત રાખ્યો છે. કેજરીવાલના રેગ્યુલર જામીનની સુનાવણી 29 જુલાઈએ થશે. કોર્ટે કહ્યું કે તે વચગાળાના જામીન પર નિર્ણય અનામત રાખે છે. નિર્ણય લખવામાં 5-7 દિવસ લાગશે. 29મી જુલાઈના રોજ નિયમિત જામીનની સુનાવણી હાથ ધરવામાં આવશે.

દરમિયાન આજે સુનાવણી દરમિયાન સીબીઆઈના વકીલ અને કેજરીવાલના વકીલ અભિષેક મનુ સિંઘવી વચ્ચે કોર્ટમાં ઉગ્ર બોલાચાલી થઈ હતી. જ્યારે સીબીઆઈએ અરવિંદ કેજરીવાલના જામીનનો જોરદાર વિરોધ કર્યો તો સિંઘવીએ કહ્યું કે અરવિંદ કેજરીવાલ સમાજ માટે ખતરો નથી.

કેજરીવાલના વકીલ સિંઘવીએ કહ્યું કે વચગાળાના જામીન પર હાઈકોર્ટે નિર્ણય આપવો જોઈએ. તેમણે કહ્યું કે સૌથી પહેલા તમારે જોવું જોઈએ કે શું અરવિંદ કેજરીવાલ તપાસમાં સહકાર નથી આપી રહ્યા, શું તેઓ દેશ છોડીને જઈ રહ્યા છે?

સિંઘવીએ કહ્યું કે કોર્ટે બંને અરજીઓ પર પોતાનો નિર્ણય અનામત રાખવો જોઈએ. અરવિંદને ત્રણ વખત જામીન મળ્યા છે. અરવિંદ સમાજ માટે ખતરો નથી. સિંઘવીએ કહ્યું કે સીબીઆઈએ જામીન અરજી પર 26 પાનાનો જવાબ દાખલ કર્યો છે. સીબીઆઈએ સાબિત કરવું પડશે કે અરવિંદને કોઈ કારણસર તપાસમાં વિલંબ થયો છે.

સીબીઆઈની દલીલ હતી કે કેજરીવાલની જામીન અરજી પર પહેલા ટ્રાયલ કોર્ટમાં ચર્ચા થવી જોઈએ. ટ્રાયલ કોર્ટમાં ચાર ચાર્જશીટ પેન્ડીંગ છે અને તેથી ટ્રાયલ કોર્ટ તમામ હકીકતોથી પરિચિત હોવાથી જામીન માટે પહેલા ટ્રાયલ કોર્ટમાં દલીલ કરવી યોગ્ય છે.

આ પણ વાંચો : સૌનો સાથ, સૌનો વિકાસ બંધ કરો: બીજેપી નેતા સુવેન્દુ અધિકારીનું મોટું નિવેદન