નારિયેળને કેમ કહેવાય છે સુપર ફૂડ? જાણો તેના પાંચ ખાસ ફાયદા

• નાળિયેર આપણને દિવસભર ઊર્જા અને આરોગ્ય આપે છે, તેને સુપર ફૂડ શા માટે કહેવાય છે જાણો છો? તે તમને અઢળક ફાયદા આપે છે

HD ન્યુઝ ડેસ્કઃ નારિયેળ જે પોષણથી ભરપૂર છે અને ઘણી બીમારીઓને દૂર રાખવામાં મદદરૂપ છે. સવારે વહેલા ઉઠીને નાળિયેર ખાવું હેલ્થ માટે અત્યંત ફાયદાકારક માનવામાં આવે છે, કારણ કે દિવસની શરૂઆતમાં તેનું સેવન કરવાથી શરીરને જરૂરી પોષક તત્વો મળે છે, જે આપણને દિવસભર ઊર્જા અને આરોગ્ય પ્રદાન કરે છે. તેથી જ તો તેને સુપર ફૂડ કહેવાય છે.

ઊર્જાનો સ્ત્રોત

નારિયેળમાં કુદરતી શર્કરા અને ચરબી હોય છે, જે આપણા શરીરને ઝડપી ઊર્જા પ્રદાન કરે છે. જો તમે સવારે નારિયેળ ખાઓ છો, તો તે તમને દિવસભર શારીરિક અને માનસિક પ્રવૃત્તિઓ માટે જરૂરી ઊર્જા પ્રદાન કરે છે. તે કુદરતી એનર્જી બૂસ્ટરની જેમ કામ કરે છે.

પાચનતંત્રને મજબૂત બનાવે છે

નારિયેળમાં હાજર ફાઇબર પાચનતંત્રને મજબૂત બનાવે છે. સવારે નારિયેળનું સેવન કરવાથી પાચનક્રિયા સુધરે છે અને કબજિયાત તેમજ અપચો જેવી સમસ્યાઓથી રાહત મળે છે. ફાઈબરથી ભરપૂર નારિયેળ ખાવાથી આંતરડા સાફ થાય છે અને શરીરમાંથી એકઠા થયેલા ઝેરી તત્વો બહાર નીકળે છે. તેથી તે પાચન સમસ્યાઓથી પીડાતા લોકો માટે ફાયદાકારક છે.

વજન ઘટાડે છે

જો તમે વજન ઘટાડવાનું વિચારી રહ્યા છો, તો સવારે નારિયેળ ખાવું એ એક ઉત્તમ ઉપાય છે. નાળિયેરમાં રહેલા ફેટી એસિડ્સ મેટાબોલિઝમને પ્રોત્સાહન આપે છે, જેના કારણે શરીરમાં ચરબી ઝડપથી બળી જાય છે. તેમજ નાળિયેર ખાવાથી પેટ લાંબા સમય સુધી ભરેલું રહે છે, જેનાથી ભૂખ ઓછી લાગે છે અને વારંવાર ખાવાની આદત સુધરે છે.

ત્વચા અને વાળ માટે ફાયદાકારક

નારિયેળનું સેવન આંતરિક સ્વાસ્થ્ય માટે જ નહીં, પરંતુ ત્વચા અને વાળ માટે પણ ફાયદાકારક છે. નારિયેળમાં વિટામિન ઈ અને એન્ટીઓક્સીડેન્ટ હોય છે, જે ત્વચાને સ્વસ્થ અને ચમકદાર રાખે છે. સવારે નારિયેળ ખાવાથી શરીરને જરૂરી ભેજ મળે છે, જે ત્વચાને હાઇડ્રેટેડ રાખે છે. તે વાળને પોષણ પણ આપે છે અને તેમને મજબૂત અને ચમકદાર બનાવે છે.

રોગપ્રતિકારક શક્તિને મજબૂત બનાવે છે

નારિયેળમાં એન્ટિબેક્ટેરિયલ, એન્ટિવાયરલ અને એન્ટિફંગલ ગુણ હોય છે, જે રોગપ્રતિકારક શક્તિને મજબૂત બનાવે છે. સવારે નારિયેળ ખાવાથી શરીરની રોગપ્રતિકારક શક્તિ વધે છે, જે શરદી, વાયરલ ઈન્ફેક્શન અને અન્ય રોગો સામે રક્ષણ આપે છે. તેમાં હાજર લોરિક એસિડ શરીરને ચેપ સામે લડવાની શક્તિ પ્રદાન કરે છે.

આ પણ વાંચોઃ ખાંસીથી ઝડપથી છુટકારો મેળવવા માટે અપનાવો ઘરેલુ નુસખા