કોણ હતો ઈસ્માઈલ હાનિયા, PM બનનાર વ્યક્તિ કેવી રીતે બન્યો મોસ્ટ વોન્ટેડ? જાણો
- ઈઝરાયેલ-હમાસ યુદ્ધ વચ્ચે ઈસ્માઈલ હાનિયાની હત્યાના સમાચારથી બધા આશ્ચર્યચકિત થઈ ગયા
નવી દિલ્હી, 31 જુલાઇ: ઈઝરાયેલ-હમાસ યુદ્ધ વચ્ચે એક એવા સમાચાર બહાર આવ્યા કે જેને બધાને ચોંકાવી દીધા છે. ઈરાનના ઈસ્લામિક રિવોલ્યુશનરી ગાર્ડ કોર્પ્સે માહિતી આપી છે કે હમાસના વડા ઈસ્માઈલ હાનિયાની હત્યા કરવામાં આવી છે. ઉલ્લેખનીય છે કે, ઈસ્માઈલ હાનિયા છેલ્લા ઘણા સમયથી હમાસના પ્રમુખ હતા. ઈસ્માઈલ હાનિયા પર ગત વર્ષે ઓક્ટોબરમાં ઈઝરાયેલમાં નાગરિકોના નરસંહારનું આયોજન કરવાનો આરોપ હતો.
ઈસ્માઈલ હાનિયાએ વડાપ્રધાન પદ સંભાળ્યું હતું
ઈસ્માઈલ હાનિયા હમાસના પોલિટિકલ બ્યુરોના પ્રમુખ હતા. તેઓ પેલેસ્ટિનિયન ઓથોરિટીની દસમી સરકારમાં વડાપ્રધાન પદ સંભાળતા હતા. હાનિયા 2006માં વડાપ્રધાન બન્યા હતા, પરંતુ એક વર્ષ પછી પેલેસ્ટિનિયન નેશનલ ઓથોરિટીના વડા મહમૂદ અબ્બાસ દ્વારા તેમને પદ પરથી બરતરફ કરવામાં આવ્યા હતા. આ એટલા માટે કરવામાં આવ્યું કારણ કે ગાઝા પટ્ટી પર અલ-કાસમ બ્રિગેડ દ્વારા કબજો કરી લેવામાં આવ્યો હતો અને ફતહ આંદોલનના નેતાઓને હાંકી કાઢવામાં આવ્યા હતા.
ઇઝરાયેલે 1989માં તેની ધરપકડ કરી હતી
અહેવાલ અનુસાર, 1989માં ઈઝરાયેલે ઈસ્માઈલ હાનિયાને ત્રણ વર્ષ સુધી જેલમાં રાખ્યા હતા. ત્યારપછી હાનિયાને હમાસના અન્ય નેતાઓ સાથે ઈઝરાયેલ અને લેબનોન વચ્ચે સ્થિત માર્જ અલ-ઝહુર ખાતે દેશનિકાલ કરવામાં આવ્યો હતો. હાનિયા ત્યાં એક વર્ષ રહ્યો અને દેશનિકાલ પૂરો થયા બાદ ગાઝા પરત ફર્યો.
અમેરિકાએ તેને આતંકવાદી જાહેર કર્યો હતો
US સ્ટેટ ડિપાર્ટમેન્ટે 2018માં ઈસ્માઈલ હાનિયાને આતંકવાદી જાહેર કર્યો હતો. ઈસ્માઈલ હાનિયા 2017માં હમાસના રાજકીય બ્યુરોના વડા તરીકે ચૂંટાયા હતા પરંતુ તેઓ ગાઝામાં નહીં પણ કતારમાં રહેતા હતા. ઇઝરાયલ સાથે ચાલી રહેલા યુદ્ધ વચ્ચે કતાર અને ઇજિપ્ત દ્વારા મધ્યસ્થી કરવામાં આવેલી શાંતિ વાટાઘાટોમાં હાનિયાએ હમાસનું નેતૃત્વ કર્યું હતું. ગત મે મહિનામાં જ ઈન્ટરનેશનલ ક્રિમિનલ કોર્ટે હાનિયા વિરુદ્ધ ધરપકડ વોરંટની માંગણી કરી હતી.
કઈ રીતે ઈસ્માઈલ હાનિયાની હત્યા કરવામાં આવી?
ઈસ્માઈલ હાનિયા આતંકી સંગઠન હમાસનો લીડર હતો. તેઓ ઈરાનના નવા પ્રમુખના શપથ ગ્રહણ સમારોહ માટે ઈરાનની મુલાકાતે ગયા હતા. ઈરાનના ઈસ્લામિક રિવોલ્યુશનરી ગાર્ડ કોર્પ્સે કહ્યું છે કે, હુમલામાં તેહરાનમાં હાનિયાના ઠેકાણાને નિશાન બનાવવામાં આવ્યું હતું, જેમાં હમાસના વડા તેમજ એક અંગરક્ષક માર્યા ગયા હતા.
આ પણ જૂઓ: હમાસ ચીફ ઈસ્માઈલ હાનિયાની હત્યા, 24 કલાકમાં ઈઝરાયેલના બે મોટા દુશ્મનોનો ખાત્મો
