ટીમ ઈન્ડિયાને ક્યારે મળશે નવા હેડ કોચ? BCCI સેક્રેટરી જય શાહે આપ્યું મોટું અપડેટ

• રાહુલ દ્રવિડનો મુખ્ય કોચ તરીકેનો કરાર થયો પુરો
• જય શાહે ભારતના મુખ્ય કોચને લઈને મોટું અપડેટ આપ્યું

મુંબઈ, 1 જુલાઈ: ટીમ ઈન્ડિયાએ ફરી એકવાર T20 વર્લ્ડ કપ 2024નો ખિતાબ પોતાના નામે કર્યો છે. આ વર્ષની ફાઇનલમાં સાઉથ આફ્રિકાને 7 રનથી હરાવીને ભારતે વધુ એક ICC ટાઇટલ જીત્યું છે. આ દરમિયાન મોટી વાત એ છે કે વર્લ્ડ ચેમ્પિયન બન્યા બાદ તરત જ ભારતીય કેપ્ટન રોહિત શર્મા અને વિરાટ કોહલીએ T20 ઈન્ટરનેશનલમાંથી સંન્યાસ લેવાની જાહેરાત કરી દીધી છે. થોડા સમય બાદ રવિન્દ્ર જાડેજાએ પણ આ ફોર્મેટ છોડવાની જાહેરાત કરી હતી. એટલું જ નહીં, મોટી વાત એ છે કે ભારતીય ટીમના મુખ્ય કોચ રાહુલ દ્રવિડનો કાર્યકાળ પણ સમાપ્ત થઈ ગયો છે. આ તેમની છેલ્લી મેચ હતી. આ દરમિયાન હવે ટીમ ઈન્ડિયાને નવો હેડ કોચ મળશે. આ કવાયત બીસીસીઆઈ દ્વારા છેલ્લા કેટલાક સમયથી કરવામાં આવી રહી છે. હવે BCCI સેક્રેટરીએ સ્પષ્ટ કર્યું છે કે ભારતીય ક્રિકેટ ટીમ શ્રીલંકા સાથે સિરીઝ રમશે ત્યાં સુધીમાં નવા મુખ્ય કોચની જાહેરાત કરવામાં આવશે.

શ્રીલંકા શ્રેણીમાં નવા મુખ્ય કોચ મળશે

BCCI સેક્રેટરી જય શાહે કહ્યું છે કે ભારતીય ક્રિકેટ ટીમના નવા મુખ્ય કોચ આ મહિનાના અંતમાં શ્રીલંકા સામેની મર્યાદિત ઓવરોની શ્રેણીમાં ટીમ સાથે જોડાશે. જોકે, તેમણે એ નથી જણાવ્યું કે રાહુલ દ્રવિડના ગયા બાદ કોના નામને મંજૂરી આપવામાં આવી છે. જય શાહે કહ્યું કે ટૂંક સમયમાં પસંદગીકારની પણ નિમણૂક કરવામાં આવશે. BCCI સેક્રેટરી હાલ વેસ્ટ ઈન્ડિઝમાં છે. મીડિયા સાથે વાત કરતા જય શાહે કહ્યું કે કોચ અને સિલેક્ટરની નિમણૂક ટૂંક સમયમાં કરવામાં આવશે. CAC એ બે દાવેદારોના ઇન્ટરવ્યુ લીધા છે અને મુંબઈ ગયા પછી અમે તેમના નિર્ણયનો અમલ કરીશું.

ક્યારે છે શ્રીલંકા શ્રેણી?

ભારતનો શ્રીલંકા પ્રવાસ 27 જુલાઈથી શરૂ થશે. ટીમ ઈન્ડિયા આ વર્ષે જુલાઈ અને ઓગસ્ટમાં વાઈટ બોલની શ્રેણી માટે શ્રીલંકાનો પ્રવાસ કરશે. શ્રીલંકા પ્રવાસ દરમિયાન ટીમ ઈન્ડિયા ત્રણ મેચની ટી-20 શ્રેણી અને એટલી જ વનડે શ્રેણી રમશે.

હવે ઝિમ્બાબ્વે સામે રમાશે ત્રણ મેચની શ્રેણી

હવે ભારતીય ટીમ ઝિમ્બાબ્વે સામે 5 T20 આંતરરાષ્ટ્રીય મેચોની શ્રેણી માટે ત્યાં જવાની છે. VVS લક્ષ્મણ આ પ્રવાસ પર જશે, પરંતુ નવા કોચ શ્રીલંકા શ્રેણી સમયે જ જોડાશે. ભારતીય ટીમ 27 જુલાઈથી ત્રણ ટી-20 અને ત્રણ વનડે રમવા માટે શ્રીલંકા જશે. ભારતે 11 વર્ષ બાદ ICC ખિતાબ જીતવા પર ખુશી વ્યક્ત કરતા શાહે રોહિત શર્મા અને વિરાટ કોહલીની પ્રશંસા કરી હતી. શાહે કહ્યું કે ગયા વર્ષે પણ તે કેપ્ટન હતો અને અહીં પણ. ગયા વર્ષે પણ અમે ફાઈનલ સિવાયની તમામ મેચો જીતી હતી. આ વખતે તેણે વધુ મહેનત કરી અને ટાઈટલ જીત્યું છે. જ્યારે અન્ય ટીમો સાથે સરખામણી કરવામાં આવે છે, ત્યારે અનુભવ મહત્વપૂર્ણ છે. રોહિતથી લઈને વિરાટ સુધી બધાએ શાનદાર પ્રદર્શન કર્યું છે. અનુભવથી ઘણો ફરક પડ્યો છે.

રોહિત અને કોહલીની નિવૃત્તિ પર જય શાહે શું કહ્યું?

જય શાહે મીડિયાને જણાવ્યું હતું કે એક સારો ખેલાડી જાણે છે કે તેને ક્યારે વિદાય લેવી. અમે ગઈકાલે જોયું. રોહિતનો સ્ટ્રાઈક રેટ ઘણા યુવા ખેલાડીઓ કરતા સારો છે. જ્યારે તેમને પૂછવામાં આવ્યું કે શું તેઓ આ ત્રણની નિવૃત્તિ પછી પરિવર્તનનો સમયગાળો જોઈ રહ્યા છે, ત્યારે તેમણે કહ્યું કે જ્યારે ત્રણેય દિગ્ગજ લોકો ગયા ત્યારે પરિવર્તન આવ્યું હતું. હાર્દિક પંડ્યાના શાનદાર પ્રદર્શન અને રોહિત બાદ તેને કેપ્ટન બનાવવાની સંભાવના અંગે શાહે કહ્યું કે કેપ્ટનશીપનો નિર્ણય પસંદગીકારો કરશે. અમે તેમની સાથે વાત કર્યા બાદ તેની જાહેરાત કરીશું. હાર્દિકના ફોર્મ પર ઘણા પ્રશ્નો ઉભા થઈ રહ્યા હતા, પરંતુ અમે અને પસંદગીકારોએ તેના પર વિશ્વાસ કર્યો અને તે તેના પર ખરો ઉતર્યો. BCCI ભારતીય ટીમના સન્માન સમારોહનું આયોજન કરી રહ્યું છે, પરંતુ તોફાનની ચેતવણીના કારણે બાર્બાડોસ એરપોર્ટ બંધ છે અને ટીમ અહીં અટવાઈ ગઈ છે. શાહે કહ્યું કે તમારી જેમ અમે પણ અહીં અટવાયા છીએ. ભારત પહોંચ્યા બાદ સમારોહ વિશે વિચારીશું.

આ પણ વાંચો: રોહિત શર્માની જગ્યા કોણ લેશે? જાણો વીરેન્દ્ર સેહવાગે કોનું નામ કર્યું આગળ